اللہ تعالیٰ نے اس کائنات کو پیدا فرمایا اس کی ہرچیز میں اپنی ذات اور صفات کے جلوے رکھے ہیں، انسان کو عقل کے نور سے سرفراز فرمایا، جس کی وجہ سے انسان اللہ تعالیٰ کی ذات اور صفات کی معرفت حاصل کرسکتا ہے اللہ تعالیٰ نے انسان کی راہنمائی کے لئے انبیاء اور رسول بھیجے، کتب اورصحائف نازل کئے تاکہ انسان کی راہنمائی ہو اور اللہ تعالیٰ اپنی ذات اور صفات کی معرفت عطا فرمائے، رب کائنات نے اپنی کمال مہربانی سے انسان کو گمراہیوں سے بچانے کا سامان فراہم کیا، وہ ہرزاویے اور ہر رُخ سے انسان کو اپنی طرف بلاتا ہے، سورج کے طلوع و غروب ، گردشِ ایام ، موت و حیات کے وقوع اور خوشی و غم غرض ہرطرح سے انسان کی سوچ کو اپنی طرف متوجہ کرتا ہے وہ آسمان و زمین کے حقائق و آثار اور بدلتے ہوئے حالات میں غور و فکر کی قوت دیتا ہے تاکہ کسی طرح انسان کج رَوی سے باز آئے اور اپنے خالق ومالک کو پہچانے، اس کی عنایات کا اعتراف کرے اور اس کے بے اندازہ لطف و کرم کے احساس سے ممنون ہوکر سجدہ شکر بجالائے ۔
اللہ تعالیٰ کی قدرت و حکمت اور واحدانیت پر چند دلائل:۔
٭ ....امام شافعی رحمٰ اللی تعالٰی علیہ ایک شہتوت کے درخت کے پاس کھڑے تھے کسی نے ان سے وجودِ باری تعالیٰ کے بارے میں سوال کیا کہ آپ کے نزدیک اللہ تعالیٰ کے وجود پر کیا دلیل ہے۔ آپ نے فرمایا اس شہتوت کے درخت کی طرف دیکھ لو اگر اس کے پتوں کو بکری کھائے تو دودھ دیتی ہے، شہد کی مکھی ان پتوں کو چاٹ لے تو شہد بنتا ہے، ریشم کا کیڑا ان پتوں کو کھائے تو ریشم بنتا ہے ہرن ان کو کھائے تو مُشک حاصل ہوتا ہے ان چاروں چیزوں کے حقائق و آثار مختلف ہیں اور شہتوت کے پتوں کا تقاضا ایک ہی ہوسکتا ہے کیونکہ طبیعت واحدہ کا تقاضا بھی واحد ہوتا ہے پس اگر ان پتوں کی طبیعت کا تقاضا دودھ ہے تو شہد کیسے حاصل ہوگا اور اگر ان کی طبیعت کا تقاضا شہد ہے تو ریشم کیسے بنے گا۔ معلوم ہو اکہ یہ اپنی ذات میں کسی چیز کا تقاضا نہیں رکھتے۔ اصل خواص پیدا کرنے والی ذات مقدسہ ہے جو چاہے وہی خواص پیدا ہوجائیں۔
٭ ....شیخ سعدی وجودِ باری تعالیٰ کے منکر کے بارے میں ایک حکایت بیان کرتے ہیں کہ ایک فقیر بغداد کے راستے میں بیٹھا تھا کہ اس کے پاس سے ایک دہریہ گزرا اس نے تین سوال پوچھے۔
(1) اللہ تعالیٰ ہے تو نظر کیوں نہیں آتا؟
(2)تم کہتے ہو کہ شیطان آگ سے بنا ہے اور اس کو دوزخ میں ڈالا جائےگا تو آگ کو آگ پر کیا اثر ہوگا؟
(3) جب ہر چیز کا خالق اللہ تعالیٰ ہے تو بندے سے کیوں پوچھا جائےگا؟
اُس فقیر نے مٹی کا بڑا سا ڈھیلا پکڑ کر اس کے مارا دہریے کو بڑی تکلیف ہوئی کہ میں نے تین سوال پوچھے ہیں اور تو مجھے مارتا ہے ۔ وہ دہریہ کوتوال کے پاس چلا گیا اور شکایت کی
کوتوال نے فقیر کو بلایا اور پوچھا کہ تو نے اس کو کیوں مارا؟ فقیر نے جواب دیا کہ میں نے اس کے سوالوں کے جواب دئیے ہیں
اس نے کہا تھا کہ اللہ تعالیٰ ہے تو نظر کیوں نہیں آتا۔ یہ بتائے اس کو دَرد ہوئی ہے تودکھائے ، اس نے کہا دَرد نظر نہیں آتی محسوس ہوتی ہے۔ فقیر نے کہا کہ اللہ تعالیٰ کی ذات بھی نظر نہیں آتی کائنات کی ہرچیز سے محسوس ہوتی ہے۔ دوسرا سوال اس نے پوچھا کہ شیطان آگ کا بنا ہو اہے تو آگ کو آگ پر کیا اثر ہوگا۔ تو انسان مٹی کا بنا ہوا ہے اگر مٹی کو مٹی پر اثر ہوسکتا ہے تو آگ بھی آگ پر اثر کرسکتی ہے۔ تیسرا سوال یہ تھا کہ جب ہرچیز کا خالق اللہ تعالیٰ ہے تو بندے سے کیوں پوچھا جائےگا۔ تو میں نے اس کو نہیں مارا بلکہ اللہ تعالیٰ نے مارا تو مجھے کوتوال کے پاس کیوں بلایا گیا ہے؟

__________________
اے ایمان والو اللّٰہ سے ڈرو اور اسکی طرف وسیلہ ڈھونڈو (جس کی بدولت تمہیں اس کا قُرب حاصل ہو ) اور اس کی راہ میں جہاد کرو اس امید پر کہ فلاح پاؤ (المائدہ 35)