اللہ تعالیٰ نے ہر امت کی طرف اپنے رسول مبعوث فرمائے تا کہ ان تک خالق کائنات کا پیغام پہنچا دیں اور انہیں اللہ کی طرف سے ایسا ضابطہ حیات دیں جو دنیا اور آخرت میں بھلائیوں کا سبب ہے۔ یہ سلسلہ آدم علیہ السلام سے شروع ہوا اور ہمارے نبی علیہ افضل الصلوۃ والتسلیم پر اس کا اختتام ہوا۔ رسول اللہ صلی اللہ علیہ وعلی آلہ وسلم کیوں کہ آخری نبی ہیں اس لیے اللہ سبحانہ و تعالٰی نے اپنا دین ان صلی اللہ علیہ و علی آلہ وسلم کے ذریعے مکمل کر دیا ہے:
الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الإِسْلاَمَ دِينًا (سورۃ المائدۃ آیت 3)
"آج مکمّل کردیا ہے میں نے تمہارے لیے تمہارا دین اور پُوری کردی تم پر اپنی نعمت اور پسند کرلیا ہے تمہارے لیے اسلام کو بطور دین۔"
یہ آیت شریعت کے مکمل اور پورے ہونے کی دلیل ہے۔ اللہ تعالیٰ نے جن و انس کو اپنی عبادت کے لیے تخلیق کیا ہے اور اس مقصد عبادت جو کچھ ضروری تھا وہ سب شریعت میں بیان کر دیا گیا ہے۔

امام ابن کثیر رحمۃ اللہ علیہ اپنی تفسیر “تفسیر القرآن العظیم” (تفسیر ابن کثیر) میں لکھتے ہیں:
“اس امت پر اللہ تعالیٰ کا سب سے بڑا احسان یہ ہے کہ اس نے ان کے لیے دین کو مکمل کر دیا ہے۔ اب انہیں کسی دوسرے دین کی ضرورت نہیں‌ ہے اور نہ نبی صلی اللہ علیہ و علی آلہ وسلم کے بعد کسی دوسرے نبی کی حاجت ہے۔ اللہ تعالیٰ نے اسی لیے رسول اکرم صلی اللہ علیہ و علی آلہ وسلم کو اپنا آخری نبی بنا کر جن و انس کی طرف بھیجا (کہ ان کے ذریعے دین کی تکمیل ہو جائے)۔ اب حلال وہی ہے جسے رسول اللہ صلی اللہ علیہ و علی آلہ وسلم نے حلال بتایا، اور حرام وہی ہے جسے ان صلی اللہ علیہ و علی آلہ وسلم نے حرام قرار دیا، دین وہی ہے جو ان صلی اللہ علیہ و علی آلہ وسلم کے ذریعے سے پہنچا اور ہر وہ چیز جس کی خبر رسول اللہ صلی اللہ علیہ وعلی آلہ وسلم نے دی وہ لا شک و لا ریب حق و سچ ہے۔”

قرآن کریم کی اس آیت اور ایک متفق علیہ تفسیر سے معلوم ہوا کہ اسلام میں اس بات کا کوئی تصور نہیں ہے کہ کوئی شخص اٹھے اور نیک نیتی یا بدنیتی سے شریعت میں کوئی اختراع کرنے بیٹھ جائے۔ ایسا کرنا رسول اللہ صلی اللہ علیہ و علی آلہ وسلم کی شان میں گستاخی ہے کیونکہ اس کا فاعل اپنی دانست میں دین کو مکمل نہیں سمجھتا۔ اس کے خیال میں دین میں کچھ نہ کچھ کمی ایسی رہ گئی ہے جسے وہ اپنے خیال و عقل فاسد سے پوری کرنا چاہتا ہے۔
امامِ مدینہ مالک بن انس رحمۃ اللہ علیہ کا قول ہے:
“جس نے اسلام میں کوئی نئی چیز اسے اچھا سمجھتے ہوئے نکالی اس نے(شعوری یا لاشعوری طور پر) گمان کیا کہ محمد صلی اللہ علیہ و علی آلہ وسلم نے (نعوذ باللہ) رسالت کا فریضہ ادا کرنے میں خیانت کی۔حالانکہ اللہ تعالیٰ کا فرمان ہے:
“الْيَوْمَ أَكْمَلْتُ لَكُمْ دِينَكُمْ” (المائدۃ)
“آج میں نے تمہارے لیے تمہارے دین کو مکمل کر دیا ہے”
تو جو چیز (اس آیت کے نزول کے وقت) دین نہیں تھی وہ آج بھی دین کا حصہ نہیں بن سکتی”

بعد کے اضافے دین کا حصہ نہیں بن سکتے۔ اور جو چیز دین کا حصہ ہی نہیں اس میں منہمک ہو جانا نہ صرف یہ کہ کار عبث اور سعی لا حاصل ہے بلکہ عذاب اور گناہ کا سبب ہے۔
هَلْ أَتَاكَ حَدِيثُ الْغَاشِيَةِ وُجُوهٌ يَوْمَئِذٍ خَاشِعَةٌ عَامِلَةٌ نَّاصِبَةٌ تَصْلَى نَارًا حَامِيَةً سورۃ الغاشیۃ آیات 1 تا 4
"بھلا تم کو ڈھانپ لینے والی ( قیامت کا) حال معلوم ہوا ہے؟ کتنے ہی چہرے اس دن ہوں گے خوفزدہ۔ (عبادت میں) محنت کرنے والے تھکنے والے۔ (لیکن) جائیں بھڑکتی آگ میں،ایک کھولتے ہوئے چشمے کا ان کو پانی پلایا جائے گا۔"
یہ کون بد نصیب ہیں جنہوں نے عبادتوں اور ریاضتوں میں زندگیاں گزار دیں، محنتیں کیں، جسم و جاں کو تھکا مارا لیکن صلہ کیا ملا؟ جہنم کی بھرکتی ہوئی آگ۔ اللہ مجھے اور آپ کو اس سے محفوظ رکھے۔ یہ وہ لوگ ہوں گے جنہوں نے انبیاء اور رسل کی ہدایات کے برعکس اپنے فہم اور عقل سے دین میں خود ساختہ عبادتیں متعارف کرائیں اور ان کی ترویج اور ان پر عمل میں لگے رہے۔ اس کی سب سے بڑی مثال نصارٰی ہیں جنہوں نے عیسیٰ علیہ السلام کے بتائے ہوئے صاف ستھرے سچے دین میں رہبانیت کی بدعت ایجاد کی۔ امام ابن کثیر رحمۃ اللہ علیہ اس آیت کی تفسیر میں امیر المومنین عمر بن خطاب رضی اللہ عنہ کا واقعہ بیان کرتے ہیں کہ
"مر عمر بن الخطاب رضي الله تعالى عنه بدير راهب قال فناداه يا راهب فأشرف قال فجعل عمر ينظر إليه ويبكي فقيل له يا أمير المؤمنين ما يبكيك من هذا ؟ قال ذكرت قول الله عز وجل في كتابه " عاملة ناصبة تصلى نارا حامية" فذاك الذي أبكاني "
"ایک مرتبہ امیرالمومنین عمر بن خطاب رضی اللہ عنہ کا گزر ایک راہب کی خانقاہ پر ہوا۔ راہب کو دیکھ کر انہوں نے اسے آواز دی۔ جب وہ حاضر ہوا تو عمر رضی اللہ تعالیٰ عنہ اس کی طرف دیکھتے جاتے اور روتے جاتے۔ کہا گیا "اے امیر المومنین! آپ اس شخص کو دیکھ کر کیوں روتے ہیں"؟ فرمایا " مجھے اللہ تعالیٰ‌کا فرمان یاد آ گیا کہ "(عبادت میں) محنت کرنے والے تھکنے والے۔ (لیکن) جائیں بھڑکتی آگ میں (تو یہ شخص بھی خود ساختہ عبادت میں زندگی گزار رہا ہے لیکن نہیں جانتا کہ اس کے بدلے میں اسے کچھ ملنے والا نہیں ہے۔"
اللہ تعالیٰ تمام مسلمانوں‌کو دین میں اضافہ کرنے سے بچائے اور اس خالص ستھرے دین پر چلنے کی توفیق عطا فرمائے جو اس نے اپنے بندے اور رسول محمد صلی اللہ علیہ و علی آلہ وسلم کے ذریعے نازل کیا۔
والسلام علیکم و رحمۃ اللہ و برکاتہ