حسن اور حسین رضی اللہ عنہما کی محبت و عظمت اور مقام و منقبت کے منہ بولتے ثبوت میں متعدد صحیح احادیث موجود ہیں۔ آئیے ۔۔۔ ان میں سے چند ایک کو ذیل میں ملاحظہ فرمائیں اور نبی کریم صلی اللہ علیہ وسلم کے چہیتے نواسوں (رضی اللہ عنہما) سے اپنی محبت کو اپنے دلوں میں بسا لیں۔

ابوھریرہ رضی اللہ عنہ سے منقول ہے کہ رسول اللہ صلی اللہ علیہ وسلم نے فرمایا :
مَنْ أَحَبَّ الْحَسَنَ وَالْحُسَيْنَ فَقَدْ أَحَبَّنِي ، وَمَنْ أَبْغَضَهُمَا فَقَدْ أَبْغَضَنِي
جس نےحسن و حسین (رضی اللہ عنہما) سے محبت کی ، پس تحقیق اس نے مجھ سے محبت کی اور جس نے ان سے بغض رکھا، اس نے مجھ سے بغض رکھا۔
سنن ابن ماجه , أبواب في فضائل أصحاب رسول الله ... » باب فضل الحسن والحسين ابني علي، حسنہ الالبانی

رسول کریم صلی اللہ علیہ وسلم نے حسن اور حسین رضی اللہ عنہما کے بارے میں فرمایا :
هُمَا رَيْحَانَتَايَ مِنَ الدُّنْيَا
یہ (حسن اور حسین رضی اللہ عنہما) دنیا میں میرے دو پھول ہیں۔
صحيح البخاري » كتاب المناقب » باب مناقب الحسن والحسين رضي الله

نبی کریم صلی اللہ علیہ وسلم نے مزید فرمایا ہے :
أَنَّ الْحَسَنَ وَالْحُسَيْنَ سَيِّدَا شَبَابِ أَهْلِ الْجَنَّةِ
اور حسن اور حسین (رضی اللہ عنہما) جنت کے نوجوانوں کے سردار ہوں گے۔
جامع الترمذي » كتاب الدعوات » أبواب المناقب » باب مناقب الحسن , والحسين رضي الله، صححہ الالبانی

ایک دفعہ رسول اللہ صلی اللہ علیہ وسلم خطبہ ارشاد فرما رہے تھے کہ اس دوران حسن اور حسین (رضی اللہ عنہما) نمودار ہوئے جنہوں نے سرخ رنگ کی قمیصیں پہنی ہوئی تھیں اور بار بار پھسل رہے تھے چنانچہ رسول اکرم صلی اللہ علیہ وسلم منبر سے نیچے اترے ، اپنا خطبہ روک دیا ، انہیں اٹھایا اور اپنی گود میں بٹھا لیا ، پھر آپ انہیں اٹھائے ہوئے منبر پر چڑھے اور فرمایا :
صَدَقَ اللَّهُ إِنَّمَا أَمْوَالُكُمْ وَأَوْلادُكُمْ فِتْنَةٌ سورة التغابن آية 15 ، رَأَيْتُ هَذَيْنِ فَلَمْ أَصْبِرْ
اللہ تعالیٰ نے سچ فرمایا ہے کہ (بےشک تمہارے اموال اور تمہاری اولاد آزمائش ہیں) میں نے انہیں دیکھا تو مجھ سے رہا نہ جا سکا۔ پھر آپ صلی اللہ علیہ وسلم نے اپنا خطبہ مکمل فرمایا۔
سنن أبي داود » كتاب الصلاة » باب تفريع أبواب الجمعة » باب الإمام يقطع الخطبة للأمر يحدث، صححہ الالبانی


اللہ تعالیٰ سے دعا ہے کہ ہم تمام مسلمانوں کے دلوں میں حسن اور حسین رضی اللہ عنہما کی محبت و عظمت کے جذبات پیدا کرے اور ہر قسم کے بغض و نفرت سے اپنا آئینہ دل صاف کرے۔ کیونکہ یہ کامیابی و کامرانی کے لیے ضروری ہے۔