حیدر

بلوچستان کے مسائل پر امریکہ میں عوامی سماعت

امریکی ایوانِ نمائندگان کی امورِ خارجہ کی کمیٹی میں بلوچستان کی صورتحال پر عوامی سماعت کے دوران کہا گیا ہے کہ پاکستان پر دباؤ ڈالا جائے کہ وہ اس شورش زدہ صوبے کے حالات معمول پر لانے کے لیے اقدامات کرے۔

سماعت کے دوران بیشتر امریکی ماہرین اور انسانی حقوق کے کارکنوں نے اتفاق کیا کہ بلوچستان کی خودمختاری مسائل کا حل نہیں ہے

امریکی ایوانِ نمائندگان کی امورِ خارجہ کی کمیٹی میں بلوچستان کے معاملے پر عوامی سماعت، کیلیفورنیا سے ایوان کے رکن ڈینا روباکر نے کی جو ایک مضمون میں مطالبہ کر چکے ہیں کہ امریکہ کو خودمختار بلوچستان کی حمایت کرنی چاہیے تاکہ شدت پسندی پر قابو پایا جا سکے۔

کرسٹین فیئر نے اپنے بیان میں کہا کہ پاکستان کے موجودہ نظام کے تحت بلوچستان کو وہ حکومتی توجہ ملنے کا امکان نہیں جس کا وہ حقدار ہے۔ تاہم انہوں نے بلوچستان کو پاکستان کا اندرونی معاملہ قرار دیتے ہوئے کہا کہ ایسا کچھ نہیں ہے جو پاکستان کے موجودہ ملکی ڈھانچے کا حصہ رہتے ہوئے حل نہ کیا جا سکے۔

کرسٹین فیئر کا کہنا تھا کہ پاکستان پر تمام ذرائع استعمال کرتے ہوئے زور دیا جانا چاہیے کہ اس اہم صوبے میں حالات معمول پر لائے اور عشروں سے جاری بدانتظامی اور سرکاری حمایت یافتہ تشدد کا سلسلہ ختم کرے۔

دفاعی امور کے ماہر رالف پیٹرز نے زور دیا کہ امریکہ کو پاکستان سے پوچھنا چاہیے کہ بلوچوں کو آزادی کا حق کیوں نہیں دیا جا سکتا۔

علی دایان حسن نے اپنے بیان میں کہا ہیومن رائٹس واچ بلوچستان کی آزادی کے معاملے پر کوئی موقف اختیار نہیں کرنا چاہتی اور سجھتی ہے کہ بلوچستان پاکستان کا حصہ ہے اور اسے پاکستانی حکومت سے توقع ہے کہ وہ حقوقِ انسانی کے تحفظ کے لیے اقدامات کرے گی۔ان کے مطابق بلوچستان میں رہنے والے وہ افراد جو پنجابی اور اردو بولتے ہیں، بلوچ قوم پرست مزاحمت کاروں کے حملوں کے خوف کا شکار ہیں۔

انہوں نے امریکہ سے مطالبہ کیا کہ وہ حکومت پاکستان پر دباؤ ڈالے کہ بلوچستان میں اغواء کے واقعات، ماورائے عدالت قتل اور غیر قانونی گرفتاریوں کو روکنے کے لیے اقدامات کیے جائیں اور ان جرائم میں ملوث افراد کے خلاف بغیر کسی تحفظات کے مکمل تحقیقات اور کارروائی کی جائے۔

ان کا یہ بھی کہنا تھا کہ امریکہ جبری گمشدگیوں اور دیگر خلاف ورزیوں میں ملوث اداروں سے جن میں فوج، آئی ایس آئی، آئی بی، ایف سی اور پولیس شامل ہیں،براہِ راست رابطہ کر کے ان اقدامات کے خاتمے کا مطالبہ کرے اور یہ واضح کر دیا جائے کہ اغواء کے واقعات نہ رکنے کی صورت میں ان ایجنسیوں کو پابندیوں یا تعلقات کے خاتمے کا سامنا کرنا پڑ سکتا ہے۔

دریں اثناء امورِ خارجہ کی کمیٹی میں بلوچستان کی سماعت پر صحافیوں سے بات کرتے ہوئے، امریکی محکمۂ خارجہ کی ترجمان وِکٹوریہ نیولینڈ نے کہا کہ اِن کمیٹیوں کی رائے، امریکی حکومت کی پالیسی کی ترجمانی نہیں کرتی۔

ان کے بقول امریکہ بلوچستان کی خودمختاری کا حامی نہیں اور وہاں کے مسائل، پاکستان کے اندر ہی پرامن سیاسی عمل کے ذریعے حل ہونے چاہیئیں۔

ترجمان نے کہا کہ ’کانگریس بہت سے خارجی امور پر سماعت کا اہتمام کرتی رہتی ہے اور ایسی سماعتوں سے یہ ثابت نہیں ہوتا کہ امریکی حکومت کسی ایک موقف کی حامی ہے یا اس کی توثیق کرتی ہے‘۔

انہوں نے کہا کہ امریکی محکمۂ خارجہ نہ تو اس سماعت میں شریک ہے اور نہ ہی اس کا حصہ ہے۔

اس سوال پر کہ کیا یہ سمجھا جائے کہ امریکہ بلوچستان کی آزادی کے مطالبے کا حامی نہیں، وکٹوریہ نولینڈ نے کہا کہ ’اس معاملے پر ہمارا موقف تبدیل نہیں ہوا ہے اور آپ جانتے ہیں کہ بلوچستان کے بارے میں ہمارا موقف کیا ہے‘۔

انہوں نے کہا کہ امریکی حکومت بلوچستان کی تمام جماعتوں پر زور دیتی ہے کہ وہ (پاکستان میں رہتے ہوئے) اپنے اختلافات کا پرامن اور قابلِ قبول سیاسی طریقے سے حل نکالیں۔

مکمل

زارا

مسائل "سیاسی" طریقے سے حل تو نہیں ہو سکتے البتہ بڑھائےضرورجا سکتے ہیں جب تک باتوں سے نکل کر عملی کام نہ کیا جائے۔

__________________

محمد عاصم

ایک رپورٹ کے مطابق 2015 تک پاکستان کو پانچ حصوں میں تقسیم کرنے کا منصوبہ امریکہ، بھارت اور اسرائیل نے بنایا ہوا ہے اور پاکستان کے موجودہ حکمران بھی ان کافروں کا ساتھ دے رہے ہیں، پاکستان کو اقتصادی طور پر ختم کرنے کے لیئے مسلسل سات سال سے لوڈشیڈنگ کی جا رہی ہے اور بیرونی قرضوں کا بوجھ بڑھایا گیا ہے ایک رپورٹ کے مطابق ساٹھ سالوں میں پاکستان ساٹھ ارب ڈالر کا مقروض کیا گیا مگر موجودہ ظالم، لٹیرے، قاتل اور پاکستان، عوام اور اسلام کے دشمن حکمرانوں نے چار سال میں پچاس ارب ڈالر قرضہ لیا ہے آپ لوگ اس بات سے ہی اندازہ لگائیں کہ یہ پاکستان کو توڑنے میں کتنی جلدی کر رہے ہیں؟ ہمارے حکمران پکے کفار کے ایجنٹ ہیں یہ نہ ہی پاکستان کے لیئے مخلص ہیں اور نہ ہی عوام کے لیئے رہا اسلام کا معاملہ تو اس بارے بتانے کی ضرورت محسوس نہیں کرتا ان ظالموں کی اسلام دشمنی سب سے واضح ہیں۔
پہلے بلوچستان میں چھپ کر کاروائیاں کروانے والا امریکہ اب کھل کر سامنے آ رہا ہے اور آزاد بلوچستان کی بنیاد فراہم کی جارہی ہے۔ مگر افسوس ہمارا وزیر دفاع کہہ رہا ہے کہ ہمیں اس مسئلے پر کوئی تشویش نہیں ہے
اللہ ہی ہمیں اپنی پناہ میں رکھے ہر کافر اور منافق کے شر سے بچا کر آمین

__________________
http://muslim-islamicpoint.blogspot.com