گاؤں میں اک بوڑھا رہتا تھا
میں ہوں نجومی وہ کہتا تھا
دیکھتا تھا وہ رات کو تارے
مارتا تھا وہ دن بھر نعرے
مستقبل کے حال بتاتا!
انہونی باتیں وہ سناتا
بیٹھا رہتا نظر جمائے
سب کو ایک ہی بات بتائے
میں خبریں افلاک کی لاؤں
سب کی قسمت ٹھیک بتا‎ؤں
مجھ کو جو بھی ہاتھ دکھائے
جو چاہے وہ مجھ سے پائے
اک دن ایسا اس پر آیا
رات کو اس نے دھوکا کھایا
راہ میں تھی اک گہری کھائی
اندھیرے میں نظر نہ آئی
بوڑھا اس میں غوطے کھائے
بھاگو کوئی مجھے بچائے
دے کوئی مجھے تسلی جھوٹی
ہائے ری میری قسمت پھوٹی
لوگ پکڑ کر باہر لائے
بابا بولے: "ہائے ہائے"
دیکھ کر اس کو لوگ یہ بولے
بابا اپنا چہرہ دھو لے
لوگوں کا تو حال بتائے
گڑھا یہ تجھ کو نظر نہ آئے
چھوڑ افلاک زمین پہ آجا
ساز بنا نہیں بجتا باجا
تیرے بس کی بات نہیں ہے
تیری یہ اوقات نہیں ہے
قسمت سب کو یہی بتائے
ڈھونڈنے والا سب کچھ پائے

عنایت اللہ رشیدی