وقت تو گزر ہی جاتا ہے
کہتے ہیں ہر کا م کا ایک وقت ہوتا ہے ، اس وقت سے فائدہ نہ اٹھایا جائے تو کف افسوس ملنے کے سوا کچھ ہاتھ نہیں آتا۔ مگر امت مسلمہ کے نوجوان ، اپنی جوانیوں کی اہمیت سے نا بلد ، بے مقصد کاموں میں الجھے ہوۓ ہیں۔ حالانکہ عمر کے اس حصے کی اہمیت کے پیش نظر ہی خالق کائنات نے اس کی بابت علیحدہ پوچھ گچھ کرنی ہے۔
ذرا اندازہ کیجئے اس وقت کیا حالت ہو گی جب آپ دربار الہی میں ’’ و عن شبابہ فیم ابلاہ ‘‘ کا جواب دے رہے ہوں گے۔
کیا بتائیں گے اس علیم و حکیم کو کہ ’’ جوانی کن کاموں میں گزری ؟ ‘‘
رب کی عطا کردہ ان جونیوں میں ہم جو کچھ کرتے ہیں ، کیا اس قابل ہے کہ کل قیامت والے دن اس کا اقرار کیا جا سکے ....؟
کیا آپ کا یہ جواب کہ ’’ میں تو بہت مصروف رہا اور اسلام کے لئے میرے پاس بالکل وقت نہیں تھا ‘‘ آپ کی نجات کا ذریعہ بن سکے گا ؟ حالانکہ اللہ رب العزت ہر انسان کو موقع فراہم کرتے ہیں کہ وہ اپنی مصروفیت کے ساتھ ساتھ اسلام کو سیکھے ، عقائد کی اصلاح کرے اور دین کی سربلندی کے لئے کوشاں رہنے کی تیاری کرے۔
یہ بجا ہے کہ عام دنوں میں ہم بہت سی مصر وفیات میں گھرے رہتے ہیں لیکن سوال تو یہ ہے کہ کیا تعطیلات گرما میں بھی میرے پاس اس دین کے لئے کوئی وقت نہیں، جسے میرے رب نے میرے لئے تجویز کیا ہے....!! کیا ان چھٹیوں کا مصرف اتنا ہی ہے کہ میں سونے کے ریکارڈ قائم کرتا رہوں، رشتہ داروں کے ہاں سیر سپاٹے کے لئے نکل جا وٗں یا فضول قسم کے رسائل و جرائد پڑھنے میں وقت گزاروں!! حالانکہ میرے رب نے ان فارغ لمحات کا پورا شیڈول میری رہنمائی کے لئے نازل کر رکھا ہے
فرمایا : ’’پس جب تو فارغ ہو جا تو ( عبادات میں ) محنت کر اور اپنے اللہ ہی کی طرف راغب رہ۔ ‘‘( سورہ الا نشراح)
اسی طرح ان فارغ لمحات کی بابت صادق بر حق ﷺ نے ارشاد فرمایا:
’’ دو نعمتیں ایسی ہیں جن کی بابت لوگوں کی اکثریت خسارے کا شکار ہے ، ایک صحت اور دوسری فراغت۔‘‘ (بخاری )
اب فیصلہ آپ کے ہاتھ میں ہے کہ آپ اس حدیث کے مصداق خود کو خسارے والوں میں شمار کروانا چاہیں گے یا اللہ رب العزت کی طرف راغب ہو کر دین کی سر بلندی کے لئے سر کردان رہیں گے۔ راستے دونوں آپ کے سامنے واضح ہیں ۔
ایک راستہ بے مقصدیت کی طرف جاتا ہے جبکہ دوسرا اس مقصد کی طرف جو اللہ نے بتلایا ہے ۔ یقیناً عقلمند وہی ہے جو رب العزت کے بتائے ہوۓ راستے کو اختیار کرے اور اپنے اس قیمتی وقت کو با مقصد بنائے ۔
کیونکہ وقت تو بہرحال گزر ہی جاتا ہے .....!!!!