اکبر نے بے چین طبیعت اور متجسس دماغ پایا تھا ، ادھر اقبال مندی اور مسلسل کامیابیوں اور فتوحات نے اس کو اپنے بارہ میں کسی قدر خوش فہمی اور فریب میں مبتلا کر دیا تھا، وہ سمجھنے لگا تھا کہ جس طرح وہ سیاسی گتھیوں کو سلجھاتا اور ملکی مسائل کو حل کرتا ہے، اسی طرح وہ مذہب و عقائد کی پرخار وادیوں میں بھی کامیاب ترکتازیاں کر سکتا ہے۔
دوسری طرف بعض شاطر ارکانِ دربار نے کچھ تو اپنی ذہنی تفوق ظاہر کرنے کے لیے اور کچھ بادشاہ کی تفریح طبع اور رونق مجلس کے لیے بجائے مرغوں اور بٹیروں کی پالیوں اور سانڈوں اور ہاتھیوں کی لڑائی کے (جو مشرقی سلاطین و امراء کی قدیم تفریح تھی) مختلف مذاہب اور فرقوں کے علماء کے دنگل قائم کیے، اور اس کو تحقیق مذہب اور علمی مباحثہ کا نام دیا، یہ بالکل بدیہی حقیقت ہے اور مذاہب و افکار کی تاریخ میں اس کا سینکڑوں بار تجربہ ہو چکا ہے کہ اگر ان مناظروں، علماء اور مذاہب کے وکلاء کی "بیت بازیوں" کا سننے والا گہراور وسیع علم اور دقیقہ رس دماغ نہیں رکھتا اور اس سے بھی بڑھ کر توفیق الٰہی اس کا ساتھ نہیں دیتی ، تو اس کا تشکک و ارتیاب، سوفسطائیت اور لا ادیت کی وادی میں بھٹکنا یا الحاد و زندقہ کی عمیق خندق میں گر جانا بالکل قدرتی امر ہے۔ ۔ ۔ ۔ اسی دور میں کالپی کا رہنے والا ایک حاضر جواب، علم مجلسی میں کمال رکھنے والا اور بذلہ سنج اور لطیفہ گو ہندو برہم داس نامی دربار میں داخل ہوا اور بہت جلد بادشاہ کے مزاج میں دخیل اور دربار میں کرسی نشین ہو گیا اور مصاحب خاص کا اعزاز پا کر راجہ بیریز کے نام سے مشرف و متفخر ہوا، اس نے ہوا کا رخ دیکھ کر مذہبی معاملات میں بیباکانہ اور استہزائی رویہ اختیار کیا اور چونکہ یہی سکہ رائج الوقت تھا اس لیے ہر طرف سے داد پائی، بادشاہ کے مزاج کو دین کے معاملہ میں غیر سنجیدہ بنانے میں اس کو بھی بڑا دخل ہے۔
(تاریخ دعوت و عزیمت جلد چہارم ابولحسن علی ندوی )