حضرت بابا فرید الدین مسعود گنج شکر


محمد اشرف قاضی پاکپتن



دنیا کے دیگر مذاہب کے برعکس اسلام نے ہمیشہ امن و امان، محبت، بھائی چارے اور باہمی میل جول کا درس دیا۔ صحرائے عرب کے قبائل کو امت مسلمہ میں شامل کرنے کے بعد اسلام محمد بن قاسم کے ہمراہ دیبل کے مقام پر برصغیر میں داخل ہو کر ملتان تک پہنچا۔ بت پرستوں کا سامنا جب محبت، بھائی چارے، امن و امان کو ترجیح دینے، بت شکنوں سے پڑا تو مٹی کے بڑے بڑے بت اپنی بساط پلٹ کر دھڑام سے گر گئے اور ان کی کایا ہی پلٹ گئی۔ رقص و سرور میں مگن، دیوی دیوتائوں کے پجاری، بیوائوں کو خاوندوں کی موت پر ان کے ساتھ زندہ جلانے والے، صدیوں تک باہمی جنگ و جدل میں مصروف اسلام کے لافانی پیغام کے دلدادہ ہو گئے۔ مسلم جرنیلوں نے جہاں علاقوں کو فتح کیا تو علماء کرام، صوفیائ، مشائخ اور درویشوں نے ان کے دلوں کو فتح کیا۔ خصوصاً برصغیر کے کفرستان کو پاک کرنے میں ان کا کردار اہم رہا ہے جنہوں نے امن و امان، محبت، بھائی چارے اور باہمی میل جول کے ساتھ ساتھ اپنی زندگیوں کو عملی نمونہ کے طور پر پیش کیا اور ظاہری نمود و نمائش کے برعکس سادہ زندگی گزاری جس سے متاثر ہو کر پورے کے پورے قبائل مسلمان ہو گئے۔ برصغیر میں علماء کرام، صوفیائ، مشائخ اور درویشوں نے اسلام پھیلانے کیلئے بے انتہا کوششیں کیں اور کامیاب ہوئے۔ انہوں نے اپنی پوری زندگیاں اسلام کیلئے وقف کر دیں۔

انہوں نے اپنی زبان کی مٹھاس، فلاسفی، سادگی سے یہاں کے باشندوں پر لامحدود اثرات ڈالے اور لوگوں کے دل جیت لئے۔ موسیقی کے دلدادہ، بت پرستوں کو مذہبی اشلوک، اقوال، اشعار، قوالی، نعت اور حمد کی صورت میں پیش کر کے اسلام کی طرف راغب کیا۔ بغل میں چھری منہ میں رام رام کا راگ الاپنے والے ایک دوسرے کیلئے جان و مال قربان کرنے کیلئے تیار ہو گئے۔ ایک ایسا معاشرتی انقلاب برپا ہوا جس کی مثال پوری دنیا کے دیگر مذاہب میں نہیں ملتی۔ حلال و حرام کے شعور سے نابلد، سود، سور کے گوشت و دیگر برائیوں سے دور ہوتے گئے۔ یہ صرف علماء کرام، صوفیا، مشائخ اور درویشوں کی طرف سے محبت، قربانی، امن، برابری اور تمام افراد کی عزت بغیر کسی ذات پات کے لافانی پیغام کا نتیجہ تھا۔ انہوں نے اپنے آپ کو مقامی ثقافت میں ڈھال کر اسلام پھیلایا۔ صوفیاء کرام نے عملی زندگی میں لوگوں میں ایک دوسرے کے ساتھ ہمدردی کے ساتھ پیش آنے کا پیغام دیا۔ صوفیاء کرام کی شاعری نے ان پر گہرے اثرات ڈالے۔ انہوں نے مقامی زبانوں کو خود سیکھا بلکہ مقامی لوگوں کو ان کی مقامی مادری زبانوں میں اسلامی تعلیمات کا درس دیا۔

ان بزرگان دین میں سلسلہ چشتیہ کے معروف صوفی و روحانی بزرگ اور پنجابی ادب کے باوا آدم حضرت بابا فرید الدین مسعود گنج شکر سرفہرست ہیں جنہیں بابا فرید کے نام سے بھی جانا جاتا ہے۔ بابا فرید الدین 1188 سن عیسوی (584 ہجری) کو ملتان کے علاقہ کھیت وال (نزدیک ٹاٹے پور) راواں میں پیدا ہوئے۔ آپ کا اسم گرامی مسعود اور القابات فرید الدین اور گنج شکر ہیں۔ آپ کے والد جمال الدین سلمان پرشیا سے ہجرت کر کے کھیت وال (راواں) ٹاٹے پور ضلع ملتان جو کہ ملتان سے 25 کلو میٹر کے فاصلے پر ہے تشریف لائے یہاں ان کو جاگیر الاٹ ہوئی۔ آپ کا سلسلہ خلیفہ دوئم حضرت عمر سے ملتا ہے آپ کی والدہ مولانا وجاہت دین خنجندی کی بیٹی بی بی قرسم خاتون تھیں۔

ابتدائی تعلیم آپ نے اپنے والد سے حاصل کی۔ بابا فرید الدین کی مادری زبان پنجابی اور سرائیکی تھی۔ ابتدائی تعلیم کے بعد آپ نے ملتان کے مولوی منہاج الدین ترمذی سے عربی، فارسی، قرآن، سنت، تفسیر، اصول، معانی، فلسفہ، منطق، ریاضی اور ہیت کی تعلیم حاصل کی۔ دینی و دنیوی تعلیم کے حصول کیلئے بلخ، بخارا، بیت المقدس، مکہ مکرمہ، مدینہ منورہ، غزنی، بغداد، بدخشاں اور قندھار کا سفر طے کیا اور ظاہری و باطنی تعلیم مکمل کی اور وہاں کے علماء و مشائخ سے کسب فیض ہوئے ۔ جونہی درجہ کمال کو پہنچے تو حضرت خواجہ قطب الدین بختیار کاکی کی بیعت کی اور کئی سال ان کی محبت میں دہلی اور حصار میں رہے۔ مرشد نے آپ کو سند خلافت عطا کی۔ برصغیر پاک و ہند میں سلسلہ چشتیہ کی سعادت و رہنمائی کا کار عظیم حضرت بابا فرید الدین مسعود گنج شکر کے سپرد ہوا۔ آپ کی اسلام کی تبلیغ و دعوت پر قبائل کے قبائل نے اسلام قبول کیا۔ حضرت بابا فرید الدین مسعود گنج شکر کی شادی اس وقت کے سلطان غیاث الدین بلبن کی بیٹی ہزیرہ بانو سے ہوئی۔ اپنے مرشد حضرت خواجہ قطب الدین بختیار کاکی کے حکم پر پہلے ہانسی (بوریوالا) بعد ازاں اجودھن (پاکپتن) تشریف لائے اور رشد و ہدایت میں مصروف ہے۔ 5 محرم الحرام 679 ہجری 1280 سن عیسوی 92 سال کی عمر میں وفات پائی۔ ان کا مزار شہنشاہ محمد تغلق نے تعمیر کروایا جو آپ کے مرید تھے۔

حضرت بابا فرید الدین مسعود گنج شکر کی وفات کے 150-200 سال بعد سکھوں کے گورو بابا گورو نانک اور شاہ حسین پیدا ہوئے۔ سکھوں کے گورو بابا گورو نانک نے ان کی شاعری کو اپنی کتاب گرنتھ میں محفوظ کیا۔ ان کی شاعری میں فارسی، عربی، سنسکرت کے الفاظ ملتے ہیں۔ وہ پنجابی شاعری کے پہلے شاعر ہیں۔

حضرت بابا فرید الدین مسعود گنج شکر 13 ویں صدی کے عظیم صوفی بزرگ تھے جنہوں نے جاگیر ہونے کے باوجود اجودھن (پاکپتن) جو کہ اس وقت کفرستان تھا، قبرستان میں اگنے والی جھاڑی (کری) سے ڈیلے حاصل کر کے پانی میں ابال کر کھاتے لیکن کبھی کسی سے مستعار شے لے کر نہ کھائی۔ انہوں نے دیگر علماء کرام، صوفیاء کرام، مشائخ اور درویشوں کی طرح محبت، بھائی چارے، امن و امان اور باہمی میل جول کا درس دیا جس سے متاثر ہو کر لوگوں نے اسلام قبول کیا۔ ان کے خلفاء میں حضرت مولانا بدر الدین اسحاق ،خواجہ نظام الدین اولیائ، حضرت علی احمد کلیر صابری شامل ہیں ان کا 765 واں سالانہ عرس پانچ محرم الحرام سے پاک کپتن میں ہو رہا ہے۔

__________________