ایک مرتبہ مرشد عام اپنے ساتھیوں کے ساتھ دوردراز دیہاتی علاقوں میں دعوتی دوروں پر گئے۔ایک قصبے میں پورا دن لوگوں کو دعوت دینے میں گزرا۔ بعدنماز مغرب مقامی مسجد میں حسب پروگرام امام البنانے سادہ الفاظ میں دیہاتی بھائیوں سے خطاب کیا اور انھیں اخوان میں شمولیت کی دعوت دی۔کئی لوگوں نے اخوان میں شمولیت کا فیصلہ کیا۔ پچھلی صفوں میں بیٹھے ایک شخص نے سوال پوچھا،آپ لوگ کس کے مہمان ہیں؟ حسن البنا نے جواب دیا:’’ہم اللہ کے مہمان ہیں‘‘۔اس شخص نے رات کے کھانے اور قیام کی دعوت دی، جوقبول کرلی گئی۔وہ علاقے کا ایک بڑا جاگیردار تھا جو محل نما مکان میں رہتا تھا۔

دستر خوان پر میزبان نے امام سے کہا کہ ان کی دعوت بہت اچھی ہے مگر افسوس وہ اس جماعت میں داخل نہیں ہوسکتا۔ استفسار پر اس نے بیان کیا کہ مجھ میں تمام کبائر پائے جاتے ہیں۔ امام حسن البنا نے حدیث پاک کی روشنی میں مختصر جواب دیا کہ :’’عیوب سے پاک صرف اللہ کی ذات ہے۔ہرانسان خطاکار ہے اور خطائوں سے توبہ اللہ کو بہت پسند ہے‘‘( ترمذی، مسند احمد)۔ مجلس برخواست ہوگئی اور لوگ سوگئے۔

رات کے پچھلے پہر امام حسن البنا، اللہ کے سامنے حاضر ہو کر رورو کر دعا کرنے لگے،ان کی ہچکی بندھی ہوئی تھی۔ان کے ساتھیوں کی آنکھ بھی کھل گئی اور وہ خاموشی سے اپنے بستروں سے یہ منظر دیکھتے رہے۔ حسن البنا کی زبان پر جو الفاظ تھے،وہ قرآنی اور مسنون دعائوں کا حسین مرقع تھے۔دردِ دل کی دولتِ بے بہا بھی ان میں شامل تھی:’’اے اللہ! میں تو دلوں پر دستک ہی دے سکتا ہوں، دلوں کو پھیر نہیں سکتا۔ بندوں کے دل تیری انگلیوں کے درمیان ہیں،تو جیسے چاہے ان کو پھیر دے۔ میں نے اپنے میزبان کے دل پر دستک دے دی ہے تو اسے تبدیل کرنے پر قادر ہے۔ اے اللہ! اس کے دل کو اپنے دین کی طرف پھیر دے‘‘۔

ادھرامام حسن البنابہ چشم تر یہ دعا مانگ رہے تھے‘ اُدھر وہ شخص دبے پائوں کمرے میں داخل ہوا اور جا ے نماز کے قریب آکرفرش پر بیٹھ گیا۔یہ دعا سے فارغ ہوئے تو اس نے بے تابی سے کہا:’’آپ ہاتھ بڑھائیے اور مجھے بیعت کیجیے۔بخدا میں رات بھر ایک لمحے کے لیے نہیںسوسکا۔ میں نے دل میں فیصلہ کرلیا ہے کہ اپنی زندگی کو بدل ڈالوں گا اور اس قافلے کا ساتھ دوں گا‘‘۔ ساتھیوں کو رات جس بات پر تعجب ہورہا تھا،اب اس کی حقیقت کھل گئی۔ امام حسن البناکی شہادت کے بعد ابتلاوآزمایش کا طویل دور اخوان نے بڑی عزیمت و استقامت سے بھگتا۔ ہزاروں لوگ ۱۸،۱۹سال تک جیلوں میں بدترین قسم کی تعذیب میں مبتلا رہے۔ زندگی کا نیا ورق الٹنے والا یہ ناز پروردہ شخص بھی انھی میں شامل تھا، مگر اس نے کبھی اخوان کی قیادت سے شکایت نہ کی کہ تم مجھے کہاں لے آئے ہو۔

سامانِ درس:

اس واقعے سے چند اہم امور کی طرف راہ نمائی ملتی ہے۔ دعوت دینے والوں کو،دعوت پہنچانے کے ساتھ ساتھ اس دردِدل ،ہمدردی اور خیرخواہی کا اہتمام بھی کرناچاہیے جو خود داعیِ اعظم صلی اللہ علیہ وسلم کا طرۂ امتیاز تھا اور جس کی جانب خود قرآن مجید نے اشارات فرمائے ہیں۔ امام حسن البنا اس معاملے میں اسوۂ رسول صلی اللہ علیہ و سلم کا مکمل اتباع کیاکرتے تھے۔ دوسری اہم بات یہ ہے کہ دعوت کے اصل مخاطب وہی لوگ ہیں جو راستہ بھول گئے ہیں۔ ان سے نفرت نہیں پیار کرکے آپ انھیں راہِ راست پہ لا سکتے ہیں۔ یہ طریقِ دعوت انقلابی ہے اور اس کے نتیجے میں دلوں میں انقلابِ حق پیدا ہوتا ہے۔ اس کے اندر یہ سبق بھی پنہاں ہے کہ داعیانِ حق کو اَن جانے اور اجنبی ماحول میں جاکر خلق خدا کو دعوت پہنچانی چاہیے۔محض اپنے جانے پہچانے ماحول اور حلقۂ یاراں تک محدود رہنا ‘کسی بڑے انقلاب کا پیش خیمہ ثابت نہیں ہوسکتا۔ دعوت کا میدان بہت وسیع ہے!

__________________
قال الشيخ محمد نجيب المطيعي - رحمه الله- في تصوير طبيعة طريق المجاهد :
"وإنما يجاهد المؤمن في الله جهاده، إن أخفق فإفادة أو أوذي فإرادة، أو نفي فريادة،
أو سجن فعبادة، أو عاش فقيادة، أو مات فشهادة، فله الحسنى وزيادة"