حضرت ابوبکر عبداللہ بن عثمان رضی اللہ عنہ حضور ﷺ کے یار غار اور ہمدم ورفیق سفر ہیں ۔ آپکے والد ابو قحافہ عثمان رضی اللہ عنہ بھی اسلام کی دولت سے مالا مال ہیں ۔ حضرت ابوبکر رضی اللہ عنہ کا لقب صدیق اور عتیق ہے۔ آپکی سیرت کا مطالعہ کیا جائے تو معلوم ہوتاہے کہ زندگی کا ہر قدم اور حیات صدیق رضی اللہ عنہ کا ہر پہلو شاہراہ صدق ووفا پر چلنے والوں کےلئے پیغام ہدایت اور مینار ئہ نور ہے ۔ آپکا نام نامی اسم گرامی ” عبد اللہ “ اپنے دامن میں ” پیغام بندگی “ لئے ہوئے ہے ۔ اور آپکی کنیت بھی انسانیت کےلئے بہت بڑا پیغام ہے ۔ ” بکر“ کے معنی ” جلدی کرنا ، آگے بڑھنا ، سبقت لے جانا “ ہے اور ابو بکر کے معنی ہیںسبقت لےجا نےوا لا ۔ آپ بچپن سے ہی خیر کے کاموں میں دوسرے آگے بڑھنے اور سبقت لےجانے والے تھے ۔ ہر اچھے کام میں دوسروں سے آگے بڑھنے اور سبقت لے جانے والے تھے ہر اچھے کام میں دوسروں سے آگے نظر آتے ۔ اس لئے آپ ابو بکر کی کنیت سے مشہور ہوگئے تھے ۔جب حضور ﷺ نے نبوت کا اعلان کیا تو اسلام کی اس مجسم خیر میں ” پہل“ کرنےکا اعزاز بھی حضرت ابوبکررضی اللہ عنہ ہی کے حصہ میں آیا ۔ ہر خیر میں سبقت اور ہر نیکی کے کام کو آگے بڑھ کر سب سے پہلے اختیار کرنا یہی آپ کی کنیت کا پیغام ہے ۔
صِدّیق کے معنی ” انتہائی سچا“ سیرت صدیق ہمیں بتاتی ہے کہ حضرت ابوبکررضی اللہ عنہ کی زندگی اور صداقت وسچائی لازم وملزوم تھے جہاں ابوبکررضی اللہ عنہ وہاں سچائی اور جہاں سچائی وہاں ابوبکررضی اللہ عنہ ! اور سب سے بڑی سچائی یہ تھی کہ ہر قدم پر سچے نبی کی تصدیق کی جائے اور حضرت صدیق اکبررضی اللہ عنہ نے اپنی زندگی میں یہ کا رنامہ مثالی انداز سے سرانجام دیا ۔ معراج کا موقع بہت مشکل موقع تھا ۔ اس موقع پر بہت سے عقل کے پجاری حضور ﷺ کا ساتھ چھوڑ گئے تھے ۔ مگر جیسے ہی حضرت ابوبکررضی اللہ عنہ کے سامنے یہ بات آئی کہ سچے نبی کا کہنا ہے کہ میں رات کے مختصر حصہ میں آسمان سے اوپر کی سیر اور جنت وجہنم کا نظارہ کرکے آیا ہوں اور اپنے رب سے شرف بار یابی حاصل کیا ہے تو سب سے پہلے تصدیق کرنے والے ابوبکرؓ ہی تھے ۔ انہوں نے فرمایا : میں تو اپنے نبی کے فرمانے پر اس سے بھی بڑی بات پر ایمان لاتاہوں کہ جبریل امین دن میں کئی بار آسمانوں سے آکر آپ کی خدمت میں حاضری دیتے ہیں اگر آپ ﷺ بنفس نفیس آسمانوں پر تشریف لے گئے ہیں اور عالم بالا کا مشاہدہ کرکے آئے ہیں تو یہ بھی یقینابرحق او رسچی بات ہے ۔
حضرت جعفر صادق ؒ جب بھی حضرت ابوبکررضی اللہ عنہ کا تذکرہ کرتے تو صدیق کے لقب سے یاد کرتے ۔ ایک رافضی کہنے لگا کہ آپ بھی انہیں صدیق کہتے ہیں؟ فرمایا : میں ایسے شخص کو صدیق کیوں نہ کہوں جس نے ایسے موقع پر بھی صداقت کا دامن نہیں چھوڑا جب اس کی جان پر بن آئی تھی ۔ ہجرت کا موقع ہے اور آپ رضی اللہ عنہ حضور ﷺ کی معیت میں رات کے اندھیرے میں جارہے ہیں ۔ سر کی قیمت لگائی جاچکی ہے ۔ مشرکین آپ کی تلاش میں ہیں اس نازک صورتحال کا آپ کو پوری طرح احساس ہے ۔ اتنی میں کچھ ڈاکو آپکے قریب سے گزرتے ہیں اور پوچھتے ہیں : آپ کون ہیں ؟ فرمایا :” معی رجل یہدینی الی السبیل“ میرے ساتھ ایسا شخص ہے جو میری رہنمائی کرتاہے ۔
حضرت جعفر صادقؒ نے فرمایا : یہ موقع تھا غلط بیانی کرکے اپنی جان بچانے کا اور اپنے محبوب اور اللہ کے لاڈلے رسول کے تحفظ کا ! مگر اس نازک موقع پر بھی حق وصداقت کے اس علمبردار کی زبان پر غلط بیانی اور جھوٹ نہیں بلکہ سچائی اور صداقت ہی کے بول جاری ہوئے ایسے سچے انسان کو میں صدیق کیوں نہ کہوں؟
آپ کی پوری زندگی کھلی ہوئی کتاب کی طرح حضور ﷺ کے سامنے تھی۔ ایک مرتبہ صحابہ کے مجمع میں فرمایا : اگر کسی ایسے شخص کو دیکھنا چاہتے ہو جو اس سرزمین پر چل پھر رہا ہے اور اللہ تعالیٰ اسے جہنم سے آزاد ی کا پروانہ عطا کرچکے ہیں تو ابوبکر صدیق رضی اللہ عنہ کو دیکھ لو ! ھذاعتیق من النار ۔ یہ دوزخ سے آزاد ہے ۔
سیرت صدیق رضی اللہ عنہ کا یہی پیغام ہے کہ ہر خیر اور نیکی میں سبقت حاصل کرو ۔ اللہ کی بندگی اپنی زندگی کا نصب العین بنالو۔ صداقت وسچائی کا دامن کبھی بھی ہاتھ سے نہ چھوڑو تاکہ اللہ تعالیٰ دنیا ہی میں جہنم سے برأت کا پر وانہ عطا فرمادیں ۔

__________________