نقشِ پا انکے ہیں جنت کے نشاں


پیر سید علی عباس شاہ


گر میسر نشود بوسہ زنی پا یت را ہر کجا پائی نہی بوسہ زنم جایت را

گو مجھے آپ کی قدمبوسی کی سعادت میسر نہیں،مگر جہاں جہاں آپ کے نقشِ پا دیکھتا ہوں،چوم لیتا ہوں۔
قرآنِ مجید ،فرقانِ حمید کی آیت مبارکہ ہے،
وَاتَِّخذُوامِن مّقامِ ابراہِیمَ مُصَلّٰی ط البقرہ ،
۱۲۵اور تم مقام ِابراہیم کو جائے نماز بنا لو۔

ہر سال حج بیت اللہ کی سعادت حاصل کرنے والے کروڑوں خوش نصیب اور ان کے علاوہ عمرہ ادا کرنے والے سعادت مند مقام ابراہیم سے بخوبی واقف ہیں۔مقام ابراہیم کیا ہے؟۔

ابوالانبیاء،سیدنا ابراہیم خلیل اللہ کے قدم مبارک کا نشانِ عظمت ،جس پر کھڑے ہو کر آپ نے کعبۃُاللہ کی تعمیر فرمائی اور پھراس کا طواف فرمایا۔اس نقش قدم کو مقام ابراہیم کہا گیا ہے اور اس خوش نصیب پتھر کوجو خلیل اللہ کے قدموںتلے موم ہو گیا، شعائراللہ قرار دے کر عبادتِ الٰہی کا واضح حکم دیا ہے۔آپ کی زوجہ معظمہ،ام ا سمٰعیل ذبیح اللہ ،سیدتنا حاجرہ سلام اللہ علیہا کے قدم مبارک چومنے والے مقدس پتھروں کے پہاڑ اِنَّ الصّفا وَالمَروَۃَ مِن شَعَائِرِاللّٰہ کے تمغوں سے مزین ہیں۔

سیدنا ابراہیم خلیل اللہ کے لختِ جگر سیدنا اسمٰعیل ذبیح اللہ کے انتیسویں پوتے ،فخرِموجودات،باعثِ تخلیقِ کائنات،احمدمجتبٰی،سیدنا محمدمصطفٰی کے دستِ اقدس پر پتھر کلمۂ طیبہ کا ورد کرتے تھے اور آپ کے قدموں تلے موم ہو جایا کرتے ، جن پر آپ کے قدم مبارک کے نشانِ اقدس ثبت ہو جایا کرتے تھے۔

سیدنا محمد مصطفٰی کے نقشِ پا ،ہو بہو نقشِ پائے ابراہیم خلیل اللہ تھے۔اس دور کے لوگ کہا کرتے تھے،
اِنّا لم نَرَقدَماًاشبَہُ بالقدَمِ النبیِّ فِی المقامِ منہُ
ہم نے ان سے ذیادہ، مقام ابراہیم میںحضرت ابراہیم کے نقش قدم سے مشابہ قدم نہیں دیکھے۔

نقشِ پائے مصطفٰی اور نقشِ پائے ابراہیم خلیل اللہ مشابہ ہیں۔نقشِپائے ابراہیم ،دامنِکعبہ میں محفوظ ہوئے اور نقش پائے مصطفی کو سینۂ ابو اےّوب انصاری ،میزبانِ رسالت نے محفوظ کیا۔

51ہجری میں ایک سنگ پارہ پرنقش،حضور کے قدم مبارک کے نشانات ،سینہ سے لگائے،میزبانِ رسول،بارگاہِ رسالتمآب میں ابدی حاضری کے لئے پیش ہوئے۔آپ کو فصیلِقسطنطنیہ کے سائے میں نہایت احترام سے سپردِ لحد کیا گیا۔1453ء میں سلطان محمد فاتح نے قسطنطنیہ میں اسلام کا پرچم نصب کیا۔اسی رات خواب میں اشارۂ غیبی پرقبر ابو اےّوب کی تلاش کا حکم دیا۔سلاطینِعثمانیہ کے پیر طریقت،آقا سید شمس الدین کے ارشا د کے مطابق ایک ٹیلے کی کھدائی ہوئی تو عظیم المرتبت صحابی و میزبانِ رسول،کا جسدِ اطہر کئی سو سال گزرنے کے بعد بھی ترو تازہ اور عشقِ مصطفٰی کریم کی خوشبو سے مہک رہا تھا۔بحیرۂ باسفورس کا پانی آپ کا طواف کر رہا تھا۔

حضور کا ’’ نقشِپا‘‘سینے پہ سجائے ،یہ عاشقِ رسول فردوسِ بریں سے لطف اندوز ہو رہے تھے۔قبرِ اطہر کی تزئینِ نو کی گئی اور شاندار روضۂ اطہر تعمیر ہوا۔ آپ کے جسد مبارک کا بوسہ لینے والے آب مقدس کو کنواں کھود کر زائرین کے لئے محفوظ کر لیا گیا۔جامعہ اےّوب سلطان کی بنیاد رکھی گئی اور عظیم الشان مرکز علم و عبادت قائم کیا گیا۔

سینۂ ابو ایوب سے حضور کے ’’ نقشِ پا‘‘ کا ایک حصہ،روضۂ اےّوب سلطان کی زینت بنا اور دوسرا ’’توپ کاپی میوزیم‘‘کے تبرکات میں برکات و انوارات کے نزول کا باعث ہے۔ان نقوشِ مقدسہ کے عکس مبارک عُشّاقِ رسول اللہ کے سر کا تاج ہیں۔
دل عقیدت کے سجدوں کو بیتاب ہے یا نبی ،آپ کا، نقش ِپا چاہئے

200ہجری میں عباسی خلیفہ ،مامون الرشید کی دعوت پر سرکارِ دو جہاں کے آٹھویں سجّادہ نشین،امام الرؤف،شمس الشموس،انیس النفوس،تاجدارِ طوس،سیدناو مولاناو مرشدنا،حضرت امام علی ابن موسیٰ الرضا علیہ التحیۃُوالثناء،مدینہ منورہ سے سرزمینِ مروْ،طوس تشریف لائے۔دورانِ سفر آپ نے نیشا پور قیام فرمایا۔یہیں آپ نے معروف حدیث مبارکہ، ’’سلسلۃالذہب‘‘ ارشاد فرمائی جسے ہزاروں محدثین نے رقم کیا۔

نیشا پور،فارس کا بنجر ترین خطہ شمار کیا جاتا تھا۔قیام امام کے ایام میں کچھ حضرات نے ’’ فرزندِرسول ‘‘سے رسول اللہ کی یاد تازہ کرنے کی درخواست کی۔ثامن الائمہ نے اپنا عصا مبارک ، فارس کی بنجر ترین زمین پر مارا۔وارثِ اسمٰعیل کے عصا نے ’’ چاہِ زمزم ‘‘کی یاد تازہ کر دی۔
نقشِ پائے ابراہیم اور نقشِ پائے مصطفی کریم کے بعد اس مقام پر نقشِ پائے رضاالرّحیم ثبت ہو گئے۔آپ کے قدموں تلے پتھرموم ہو گیا اور جائے عصا سے پانی جاری ہوا،جو ’’چشمۂ رضا ‘‘ کے نام سے معروف ہے اور جس کے فیوض و برکات سے بنجر ترین بے آب وگیاہ خطہ،زرخیز ترین زرعی پیداواری علاقہ ہے۔

مقامِ ابراہیم اور مقامِ مصطفی کے بعد یہ مقام الرّضا،اہل ایمان کا مصلّٰی ہے اور سالانہ لاکھوں زائرین امام علی ابن موسیٰ الرضاکے نقشِ پا پر قدمبوسی کرنے کی سعادت حاصل کرتے ہیں۔

ان مقدس سنگ پاروں کے بارے میںسیدنا باقر العلوم کا فرمان ہے، ’’اگر ایک پتھر بھی ہم سے محبت کرے گا تو وہ ہمارے ساتھ محشور ہو گا‘‘۔

جن کے قدموں تلے پتھر موم ہو گئے،ان کی محبت میں انسانوں کے دل کیوں موم نہیں ہوتے ؟۔

naqsh e pa 1.bmp (211.6 KB, 11 views)

__________________