سلام،

ایک طویل مدت تک شیر میسورٹیپو سلطان کی حربی قوتوں اورصلاحیتوں کے اعتراف سے منہ چرانے والے ہندوستانی ماہرین کو اب یہ تسلیم کرنا پڑ رہا ہے کہ جدید اسلحہ جاتی راکٹ تکنیک اور میزائل منصوبہ کی بنیاد ٹیپو سلطان نے ہی رکھی تھی

براہموس ایرواسپیس کے چیف منیجنگ ڈائریکٹر شیودھانو پلئی نےشیرمیسور ٹیپو سلطان کے سرمائی محل دریا دولت کا دورہ کرتے ہوئے آخر کار اس حقیقت کا بادل نا خواستہ اعتراف کیا کہ موجودہ میزائل اور راکٹ تکنیک در اصل ٹیپو سلطان کی حربی تکنیک پر ہی منتج ہے

براہموس ایرواسپیس کے چیف منیجنگ ڈائرکٹرنے اعتراف کیا کہ سری رنگاپٹنم کی 1792 کی جنگ میں انگریزوں سے لوہا لینے والے شیرمیسورٹیپو سلطان دنیا میں راکٹ تکنیک کے موجداول تھے

براہموسای¹واسپیس کے چیف شیودھانو پلئی نے شیرمیسور ٹیپو سلطان کے سرمائی محل دریا دولت میں نامہ نگاروں سے بات چیت کرتے ہوئے کہا کہ ٹیپو سلطان اور ان کے ساتھیوں نے 250 ملی میٹر کا جو راکٹ تیار کیا تھا وہ دنیا کا پہلا راکٹ تھا

مسٹر پلئی نے کہا کہ اس راکٹ میں دو کلوگرام گن پاوڈر بھرا جاتا تھا اور اسے تلوار کی دھار کے ذریعہ گائیڈ کیا جاتا تھا اور اس سے ڈیڑھ تا دو کلومیٹر تک نشانہ بنایا جاسکتا تھا

انہوں نے کہا کہ یہ راکٹ تکنیک کی ابتدا تھی اور اس شعبے میں ٹیپو سلطان اور ان کے ساتھیوں کی خدمات کو نظر انداز نہیں کیا جاسکتا ہے

مسٹر پلئی نے کہا کہ ’یہ سوچ کر حیرت ہوتی ہے کہ اس طرح کے راکٹ تیار کرنے کا خیال ان کے ذہن میں کیسے آیا۔ ہماری راکٹ اور میزائل تکنیک بنیادی طور پر اسی اصول پر مبنی ہے‘۔

ہندوستان میں اگنی، پرتھوی، ناگ ، ترشول اور آکاش جیسی میزائلوں کی تیاری میں اہم رول ادا کرنے والے مسٹر پلئی کو صدر اے پی جے عبدالکلام نے دنیا میں راکٹ سازی کے اس پہلے ’کارخانے‘ کا دورہ کرنے کی ہدایت دی تھی۔

مسٹر پلئی کرناٹک میں میسور میں واقع بھارت ہیوی ارتھ موورس لمیٹیڈ (بھیل) سمیت کئی دفاعی یونٹوں کے دورے پرتھے انہوں نے کہا کہ ’ہندوستان میں ٹیپو سلطان کے راکٹوں کے باقیات دستیاب نہیں ہیں

البتہ لندن میں واقع وولوچ آرٹلری میوزیم میں ان راکٹوں کے کچھ باقیات محفوظ ہیں اور میں صدر محترم کو بتاوں گا کہ اس زمانے کے لوگوں میں کسی چیز کو جاننے کی کس قدر جستجو تھی

مسٹر پلئی نے کہا کہ راکٹ میں اسٹیل کے خانے ہیں اور وہ گن پاوڈر سے چلتا ہے

انہوں نے کہا کہ ‘یہاں تک کہ دور جدید میں استعمال ہونے والے راکٹ بھی اسی طرح کے دکھائی دیتے ہیں’۔ٹپو اور اس کے معاونین نے ایک لانچر بھی تیار کیا تھا جس سے ایک ساتھ تین راکٹ داغے جاسکتے تھے‘

مسٹر پلئی نے کہا کہ اگرچہ ان کا نشانہ پوری طرح صحیح نہیں تھا لیکن اس کی مار کرنے کی صلاحیت کافی موثر تھی

ان راکٹوں نے ایک برطانوی گھڑسوار دستے کو کافی نقصان پہونچایا تھا

دفاعی تحقیق اور ترقی تنظیم (ڈی آر ڈی او ) کے چیف کنٹرولر مسٹر پلئی نے کہا کہ جس طرح ہمارے پاس بری ، بحری اور فضائی افواج ہیں ویسے ہی ٹیپو کے پاس ایک بڑی ’راکٹ فورس‘ تھی جس میں 27 بریگیڈ اور افسران سمیت 6000 فوجی شامل تھے

انہوں نے کہا کہ برطانوی فوج نے راکٹ حملوں کے بعد کچھ راکٹوں کے باقیات یکجا کرلئے تھے

مسٹر پلئی نے کہا کہ تاریخ نے جنگی ہتھیاروں کی ترقی کے کئی مواقع فراہم کرائے ہیں اور عالمی جنگ کے دوران ہتھیاروں کی کافی ترقی ہوئی ہے لیکن ٹیپو کا رول نہایت اہم ہے

انہوں نے کہا کہ ڈی آر ڈی او ٹیپو سلطان جیسے ہندوستانیوں کی ترقی کردہ تکنیک کو مقبول بنانے کی کوشش کرے گا

انہوں نے کہا کہ راکٹ تکنیک میں ٹیپو کی تکنیک کا تجزیہ کرنے کے لئے آئندہ تین ماہ میں ایک رپورٹ تیار کی جائے گی۔