السلام علیکم
امید ہے مزاج بخیر ہوں گے۔
ملٹی لیول مارکیٹنگ یا ایم ایل ایم کا نام تو سب نے سنا ہو گا اور کئی لوگ اس بارے میں تفصیلی آگاہی رکھتے ہوں گے۔
آج ایک دوست نے اس حوالے سے ایک کمپنی جوائن کرنے کی درخواست کی ۔ میں نے جب ایک دوسرے دوست کے ساتھ مشورہ کیا تو پتہ چلا کہ علماء عرب و عجم اس کے عدم جواز کے قائل ہیں اور اس کے شرعی اصولوں کے خلاف ہونے کے فتاویٰ آ چکے ہیں۔
نیٹ پر تلاش کی تو 2 واضح فتوے نظر سے گزرے جو کہ درج میں نقل کر رہا ہوں۔

سوال
میں ایک کاروبار کرنا چاہتاہوں۔کاروبار یہ ہے میں دینی بیان کی آڈیو سی ڈی جس میں معتبر علماء کے بیان ہوں گے کو سو روپیہ کی قیمت میں ایک شخص کو بیچوں گا اور اس سے کہوں گا کہ آپ اس سی ڈی کو صرف دو لوگوں کو فروخت کردو اس کے بدلے میں اس شخص کو میں بیس روپیہ دوں گا۔ دو لوگوں کے جن کو اس شخص نے سی ڈی بیچی ہے اس طرح جب وہ دو لوگ چار لوگوں کو سی ڈی بیچیں گے تو میں اس کے بدلے میں پہلے شخص کو پھر بیس روپیہ دوں گا، یعنی ایک شخص کے پانچ روپیہ چار کے بیس روپیہ ،پھر وہ چار لوگ آٹھ کو سی ڈی بیچیں گے تو پہلے شخص کو بیس روپیہ دوں گا اس طرح سلسلہ چلتا رہے گا ،اور اس سلسلہ میں سب کو منافع ملتا رہے گا جتنے لوگ اس سے جڑتے جائیں گے۔ اس میں مجھ کو ایک سی ڈی پر پچیس روپیہ کا منافع ہوگا۔ یہ ایک ملٹی لیول مارکیٹنگ کاروبار کا تصور ہے، کیا کاروبار کرنا جائز ہے؟ اس میں دین کا بھی فائدہ ہوگا لوگ اگر دین کی بات سن کر عمل کریں گے تو جتنے لوگ جڑیں گے سب کو فائدہ ہوگا۔ ایسا کوئی کاروبار کرسکتے ہیں یا نہیں؟

جواب:
مذکورہ بالا طریقہ پر سی ڈی کو فروخت کرنا اور اس کے بدلے میں مزید پیسے دینا شرعاً درست نہیں۔ یہ ملٹی لیول مارکیٹنگ کاروبار کا تصور ہماری اسلامی شریعت میں جائز نہیں ہے۔

واللہ تعالیٰ اعلم
دارالافتاء، دارالعلوم دیوبند

سوال
قرآن و سنت کی روشنی میں نیٹ ورک مارکیٹنگ یا ملٹی لیول مارکیٹنگ کے بارے میں رہنمائی فرمائیں ۔
جواب
-ملٹی لیول مارکیٹنگ یا نیٹ ورک مارکیٹنگ کے متعلق پورے غور و خوض اور طویل بحث وتمحیص کے بعد یہ فیصلہ ہواہے کہ شرعاً یہ طریقہ تجارت درست نہیں ہے ۔ اس میں قمار ہے ۔یعنی جوامیں پائی جانے والی خرابی ہے ۔ اس طرح اس میں خداع ہے یعنی ایک قسم کا دھوکہ!اس میں ایسا کمیشن وصول کرنا بھی پایا جاتاہے جس میں براہ راست انسان کی محنت کا کوئی دخل نہیں ہوتاہے ۔اس نیٹ ورک بزنس کے ناجائز ہونے کا فیصلہ علمائے عرب ، علمائے پاکستان اور علمائے ہندنے بھی کیاہے۔
یہ سسٹم دنیا میں مختلف ناموں سے جاری ہے ۔ چنانچہ یہاں ایم وے (AM.Way) ،آرسی ایم (R.C.M.)اور فری انڈیاکونسپٹ(F.I.C.)کے نام سے چلتے ہیں ۔
اس میں بے شمار لوگوں کی رقمیں ڈوب گئیں جب وہ بڑے کمیشن کی لالچ میں خود اس نیٹ ورک میں پھنسے اور دوسروں کو بھی اس میں پھنسایا او رآگے جب سلسلہ نہیں چلا تو ہاتھ ملتے رہ گئے ۔
ان کمپنیوں کی اگر صرف چیزیں خریدی جائیں تو وہ ناجائز نہیں ۔ا سلئے اشیاءحرام نہیں بلکہ طریقہ غلط ہے۔



اس حوالے سے کیا دوسری رائے بھی پائی جاتی ہے؟ کچھ علماء نے اس فتوے کے مخالفت بھی کی ہے یا یہی متفقہ یا اکثریت کی رائے ہے؟
وہ کون سی جزئیات ہیں جو اس کاروبار میں شریعت کے اصولوں کے منافی ہیں؟

__________________
محتاج اصلاح و دعا