قرآن کریم کی تفسیر ایک انتہائی نازک اور مشکل کام ہے جس کے لیے صرف عربی زبان جان لینا کافی نہیں بلکہ تمام متعلقہ علوم میں مہارت ضروری ہے۔ مفسرقرآن کے لیے ضروری ہے کہ وہ عربی زبان کے نحو و صرف اور بلاغت و ادب کے علاوہ علم حدیث، اصول فقہ و تفسیر اور عقائد و کلام کا وسیع و عمیق علم رکھتا ہو کیونکہ جب تک ان علوم سے مناسبت نہ ہو انسان قرآن کریم کی تفسیر میں کسی صحیح نتیجے تک نہیں پہنچ سکتا۔
افسوس ہے کہ کچھ عرصے سے مسلمانوں میں یہ خطرناک وبا چل پڑی ہے کہ بہت سے لوگوں نے صرف عربی پڑھ لینے کو تفسیر قرآن کے لیے کافی سمجھ رکھا ہے، چنانچہ جو شخص بھی معمولی عربی زبان پڑھ لیتا ہے وہ قرآن کریم کی تفسیر میں رائے زنی شروع کر دیتا ہے بلکہ بعض اوقات ایسا بھی دیکھا گیا ہے کہ عربی زبان کی نہایت معمولی شدبد رکھنے والے لوگ، جنہیں عربی پر بھی مکمل عبور نہیں ہوتا، نہ صرف من مانے طریقے پر قرآن کی تفسیر شروع کر دیتے ہیں بلکہ پرانے مفسرین کی غلطیاں نکالنے کے درپے ہو جاتے ہیں، یہاں تک کہ بعض ستم ظریف تو صرف ترجمے کا مطالعیہ کر کے اپنے آپ کو قرآن کا عالم سمجھنے لگتے ہیں اور بڑے بڑے مفسرین پر تنقید کرنے سے نہیں چوکتے۔
خوب اچھی طرح سمجھ لینا چاہیے کہ یہ انتہائی خطرناک طرزعمل ہے جو دین کے معاملے میں نہایت مہک گمراہی کی طرف لے جاتا ہے۔ زندگی کے ہر شعبے اور علم و فن کے سیکھنے کا ایک خاص طریقہ اور اس کی مخصوص شرائط ہوتی ہیں نہیں پورا کیے بغیر اس علم و فن میں اس کی رائے معتبر نہیں سمجھی جاتی تو آخر قرآن و سنت ایسے لاوارث کیسے ہو سکتے ہیں کہ ان کی تشریح و تفسیر کے کے لیے کسی علم و فن کی ضرورت نہ ہو اور اس کے معاملے میں جو شخص چاہے رائے زنی شروع کر دے؟
بعض لوگ کہتے ہیں کہ قرآن کریم میں خود ارشاد فرمایا گیا ہے:
و لقد یسرنا القرآن للذکر (سورۃ القمر آیت 17)
"اور بلاشبہ ہم نے قرآن کریم کو نصیحت حاصل کرنے کے لیے آسان کر دیا ہے"
واقعہ یہ ہے کہ قرآن کریم کی آیات دو قسم کی ہیں۔ ایک تو وہ آیتیں ہیں جن میں عام نصیحت کی باتیں، سبق آموز واقعات اور عبرت و موعظت کے مضامین بیان کیے گئے ہیں، مظلا دنیا کی ناپائیداری، جنت و جہنم کے حالات، اللہ کا خوف اور فکر آخرت پیدا کرنے والی باتیں اور زندگی کے دوسرے سیدھے سادھے حقائق۔ اس قسم کی آیتیں بلاشبہ آسان ہیں اور جو شخص عربی سے واقف ہو وہ انہین سمجھ کر نصیحت حاصل کر سکتا ہے۔ مذکورہ بالا آیت میں اسی قسم کی تعلیمات کے بارے میں یہ کہا گیا ہے کہ ان کو ہم نے آسان کر دیا ہے۔ چنانچہ خود لفظ "للذکر" (نصیحت کے واسطے) اس پر دلالت کر رہا ہے۔
اس کے برخلاف دوسری قسم کی آیتیں وہ ہیں جو احکام و قوانین، عقائد اور علمی مضامین پر مشتمل ہیں۔ اس قسم کی آیتوں سے احکام و مسائل مستنبط کرنا ہر شخص کا کام نہیں ہے۔ یہی وجہ ہے کہ صحابہ کرام کی مادری زبان اگرچہ عربی تھی اور عربی سمجھنے کے لیے انہیں کہیں تعلیم حاصل کرنے کی ضرورت نہیں تھی لیکن وہ رسول اللہ صلی اللہ علیہ و علی آلہ وسلم سے قرآن کریم کی تعلیم حاصل کرنے میں طویل مدتیں صرف کرتے تھے۔ چنانچہ موطا امام مالک میں روایت ہے کہ عبداللہ بن عمر رضی اللہ عنہ نے صرف سورۃ البقرۃ یاد کرنے میں آٹھ سال صرف کیے۔ کیونکہ صحابہ کرام علم اور عمل ساتھ ساتھ سیکھتے تھے۔
غور کرنے کی بات ہے کہ یہ حضرات صحابہ جن کا مادری زبان عربی تھی، جو عربی کے شعرو ادب میں مہارت تامہ رکھتے تھے اور جن کو لمبے لمبے قصے معمولی توجہ سے ازبر ہو جایا کرتے تھے انہیں قرآن کریم کو یاد کرنے اور اس کے معانی سمجھنے کے لیے اتنی طویل مدت کی کیا ضرورت تھی۔ جب صحابہ کرام کو عربی زبان کی مہارت اور نزول وحی کا براہ راست مشاہدہ کرنے کے باوجود "عالم قرآن" بننے کے لیے رسول اللہ صلی اللہ علیہ و علی آلہ وسلم سے تعلیم حاصل کرنے کی ضرورت تھی تو سینکڑوں سال بعد عربی کی معمولی شد بد پیدا کر کے یا صرف ترجمے دیکھ کر مفسر قرآن بننے کا دعویٰ کتنی بڑی جسارت اور علم و دین کے ساتھ کیسا افسوس ناک مذاق ہے۔
(مفتی تقی عثمانی حفظہ اللہ کے مقدمہ ترجمہ قرآن سے ایک اقتباس بادنی تصرف)