شروع اللہ کے نام سے، جو بڑا مہربان نہایت رحم والا ہے
” کیا تم سمجھتے ہو کہ تم یونہی جنت میں چلے جاؤگے ؟ حالانکہ تم پر ابھی تک وہ حالات تو آئے ہی نہیں جو تم سے پہلے لوگوں پر آئے تھے ان پر تنگی اور مشقت آئی اور وہ ہلاکر رکھ دئے گئے یہاں تک کہ رسول اور انکے ساتھی پکار اٹھے کہ اللہ کی مدد کب آئےگی ۔ یاد رکھو ! اللہ کی مدد بہت قریب ہے !
(سورہ بقرہ آیت نمبر 412)

دوسری جگہ ارشاد گرامی ہے :

الٓم ٓ ۔ کیایہ لوگ یہ سمجھتے ہیں کہ انہیں ایمان کا دعویٰ کرنے پر یونہی چھوڑ دیا جائےگا اور انہیں کسی قسم کی آزمائش میں مبتلا نہیں کیا جائےگا؟ اور تحقیق ہم نے اس سے پہلے لوگوں کو آزمائش میں ڈالاتاکہ اللہ تعالی یہ دکھا دیں کہ ایمان کے دعوے میں کون سچا ہے اور کون جھوٹا!!
( سورہ عنکبوت آیت نمبر 1،2،3)

وہ آزمائش یہی ہوتی تھی کہ ایمان والے یہ کہتے تھے کہ مؤمن کا میاب ہیں اور کافر ناکام ہیں ۔ اللہ تعالی اپنے بندوں کی مدد کرتے ہیں اور کافروں کو ہلاک اور تباہ وبرباد کرتے ہیں مگر مشاہدہ اس کے بر عکس ہوتا تھا ۔ مؤمن تکالیف وعذاب میں مبتلا ہوتے اور کافر عیش وعشرت اور مزے کی زندگی گزارتے نظرآتے ۔ مکہ مکرمہ میں بعض کمزور مسلمانوں کو ستایا جاتا اور ان سے کہا جاتا کہ اپنے اللہ کو مدد کےلئے پکارو ! تمھارا اللہ تمھاری مددکیوں نہیں کرتا؟ اس صورتحال میں خلاف مشاہدہ ، وحی اور انبیاءعلیھم السلام کی خبر کی بنیاد پر ایمان لاکر ثابت قدم رہنے والے ہی صحیح ایمان والے قرار پائے ۔مدینہ منورہ کی ہجرت کے بعد بھی آزمائشوں کاسلسلہ جاری رہا ۔

حق وباطل کے سب سے پہلے معرکہ بدر میں بھی بعض لوگوں کےلئے آزمائش وامتحان کا سامان موجود تھا ۔ غیر مسلح ایمان والے اپنے سے تین گنا بڑے لشکر کے مدمقابل جب صف آرا ہوئے تو بعض منافقین اور قلبی مریضوں نے کہنا شروع کیا کہ یہ لوگ دین کے دھوکہ میں ہیں ۔ جنت کے ثواب کے شوق میں اپنی جان کے دشمن ہورہے ہیں ۔

بشکریہ: سہ ماہی مجلہ ندائے حرمین کراچی