"اس سے بڑھ کر کون گمراہ ہو گا جو اللہ کو چھوڑ کر ایسوں کو پکار رہا ہے جو قیامت تک بھی اس کی بات کا جواب نہ دے سکیں گے بلکہ وہ اس کی پکار ہی سے بے خبر ہیں" ( ترجمہ سورۃ الاحقاف آیت ۵)
یعنی مشرک پرلے درجے کے بے وقوف ہیں کہ اللہ تعالیٰ جیسے قدرت و علم والے کو چھوڑ کر دوسروں کو پکارتے ہیں جو نہ تو ان کی پکار کو سنتے ہیں اور نہ کسی بات کی ان میں قدرت و سکت ہے۔ اگر یہ قیامت تک بھی پکارتے رہیں تو وہ کچھ بھی نہیں کر سکتے ۔ تھوڑا غور کرنے سے معلوم ہو گا کہ مشرکین کی گمراہی کتنی زیادہ ہے ۔ انہوں نے اللہ کے در کو چھوڑ دیا تو ذلیل ہو کر مخلوق کے سامنے سجدہ ریز ہونے پر مجبور ہوئے۔
و من یھن اللہ فما لہ من مکرم (الحج)
"اور جسے اللہ (شرک میں مبتلا کر کے) ذلیل کر دے اسے عزت دینے والا کوئی نہیں"
زمین و آسمان اور ساری کائنات کے رب کو جو خالق ہے، مالک ہے، رزاق ہے، سب کی سنتا ہے، سب کا حاجت روا ہے، اسے چھوڑ کر انہوں نے بتوں کو، حقیر مخلوق کو اپنا کارساز بنا لیا جس پر اللہ کا نے ان سے ہمیشہ ہمیشہ جہنم کا وعدہ کیا، سو کیا ہی برا ٹھکانہ ہے اللہ کی عظمت اور اللہ کی قدرت سے انکار کرنے والوں کا۔
یہ اللہ ہی کی شان ہے کہ وہ پکارنے والاکی پکار کا جواب دیتا ہے اور مصیبت زدہ کی مصیبت دور کرتا ہے، اس نے اپنے در پر آنے والوں کو کبھی نہیں دھتکارا۔ جب اس کا بندہ اس کے سامنے ہاتھ اٹھاتا ہے تو وہ انہیں خالی لوٹاتے میں حیا محسوس کرتا ہے۔ صبح اپنا ہاتھ پھیلاتا ہے تا کہ رات کو گنہگار توبہ کر لے اور رات کو ہاتھ پھیلاتا ہے تا کہ دن کو گناہ کرنے والا اس کی طرف لوٹ آئے۔ میرا رب ذو الجلال و الاکرام، عظمتوں اور رفعتوں کا مالک، جو ہر رات فرماتا ہے کہ "ہے کوئی مانگنے والا کہ میں اسے عطا کروں، ہے کوئی مغفرت طلب کرنے والا کہ میں اسے معاف کر دوں؟"۔ میرا الٰہ ، میرا آقا، میرا مولا، میرا سید، میرا رازق جس کے بارے میں زکریا علیہ السلام جیسے نبی نے شدت جذبات سے فرمایا تھا "اے میرے رب! تجھ سے مانگ کر میں کبھی محروم نہیں رہا"۔ کائنات کا مالک، تین اندھیروں کے اندر تمہاری ماؤں کے پیٹ میں تمہاری صورت گری کرنے والا اکیلا واحد و قہار، جب تیرے بنائے ہوئے سارے شریک تجھ سے اوجھل تھے، تب اس نے بن مانگے تجھے ساری ہی نعمتیں دیں، دیکھنے کو آنکھیں دیں جو چھن جائیں تو تیری دنیا اندھیر ہو جائے، سننے کو کان، چلنے کو پاؤں، پکڑنے کو ہاتھ، بولنے کو زبان، سوچنے سمجھنے کو دل و دماغ اور نہ جانے کون کون سی صلاحتیں اور پیچیدہ نظام تیرے جسم میں تخلیق کر کے تجھے اس دنیا میں لے آیا۔ تو بولنا نہیں سکتا تھا ماں کے دل میں تیری محبت ڈال دی کہ مشقت برداشت کر کے تیرا خیال رکھے، تو نہ جانتے تھا کہ دودھ کیسے پیتے ہیں اس نے تیری فطرت میں اس کا طریقہ ودیعت کر دیا، تو بڑا ہوا تو قسم قسم کی غذا تیری پرورش اور لذت کام و دہن کے لیے مہیا کر دی، تو اکیلا تھا پھر اس نے تیرے لیے جوڑا مہیا کیا، تجھے اولاد چاہیے تھے اس نے تجھے اولاد دی ۔ آج ان ساری نعمتوں سے فائدہ اٹھانے کے بعد تو کہتا ہے کہ "اللہ میری نہیں سنتا"۔ ارے ظالم، اس نے تیری اس وقت سنی تھی جب تو ماں کے پیٹ میں خوردبینی کیڑا تھا، دنیا کی کوئی طاقت تجھے بچانے والی نہیں تھی، جن معبودوں پر تو آ ج بھروسہ کیے بیٹھا ہے وہ تیرے وجود سے بھی بے خبر تھے۔ واقعی سچ فرمایا میرے سچے رب نے:
ان الشرک لظلم عظیم (لقمان)
"بے شک شرک بہت بڑا ظلم ہے"