سیپ

السلام علیکم ورحمتہ اللہ و برکاتہ

نیل گائے یا نیل گاؤ وسطی و شمالی بھارت اور مشرقی و جنوبی پاکستان پاکستان میں بکثرت پایا جانے والا ایک چرند ہے اور اسے برصغیر کے جنگلوں میں پائے جانے والے سب سے بڑے چرندوں میں سے ایک ہونے کا اعزاز حاصل ہے۔ اس کے علاوہ امریکی ریاست البامہ اور ٹیکساس میں بھی ان کی کامیاب افزائش کی گئی ہے۔

یہ جانور چار سے پانچ فٹ اونچائی اور چھ سے ساڑھے چھ فٹ لمبائی کا حامل ہوتا ہے۔جبکہ اس کی پونچھ کی لمبائی چالیس سے پینتالیس سینٹی میٹر ہوتی ہے۔عمومی طور پر 120 سے 240 کلوگرام وزن کی حامل ہوتی ہے۔پیدائش کے وقت اس کے بچھڑے کا وزن تقریبا 13 سے 16 کلوگرام تک ہوتا ہے جس کی پیدائش 8 ماہ کے حمل کے وقفے سے عمل میں آتی ہے۔جو اٹھارہ ماہ کی عمر میں جوانی کی دہلیز پر قدم رکھتا ہے اور اوسطا 21 سال کی عمر حاصل کرتا ہے۔

مادہ نیل گائے ہلکا بھورا رنگ لیئے ہوتی ہے جبکہ نر کا رنگ نیلا سرمئی ہوتا ہے جس کی بناء پر شاید ان کا نام نیل گائے پڑا ، نر نیل گائے کو نیلا بیل بھی کہا جاتا ہے۔ جبکہ مغل بادشاہ اورنگزیب کے دور میں نیل گائے کو نیل گوہر بھی کہا جاتا تھا۔ان کی تھوتھنی پر سفید رنگ کے دھبے ہوتے ہیں، پاؤں کے گرد سفید کڑے بنے ہوتے ہیں اور جسم کے آخری حصہ پر بھی بعض اوقات سفید رنگ پایا جاتا ہے۔

نیل گائے شمالی ہندوستان میں ہمالیہ کے میدانوں، جنوبی ہندوستان کی ریاست کرناٹک، اور ہندوستانی نیشنل پارک گیر ، پاکستان کے مشرقی علاقوں اور راجستانی سرحد کے ساتھ کے علاقے ، ریاست آسام کے مغربی علاقے ، مغربی بنگال ، نیپال میں بکثرت پائی جاتی ہے، تاریخی دستاویز کے مطابق نیل گائے ہندوستان کے جنوبی علاقوں میں بھی پائی جاتی تھی۔

نیل گائے عموما دن کو سوتے ہیں اور رات کے اندھیرے میں باہر نکلتے ہیں، جنگلوں اور گھاس کے میدانوں میں رہنا پسند کرتے ہیں ان کی خوراک گھاس پھونس اور درختوں کے پتوں اور پھلوں پھولوں پر مشتمل ہوتی ہے۔

مادہ اور اس کے بچے تقریبا 15 کے جھنڈ کی شکل میں اکٹھے چلتے ہیں جبکہ بڑے نر اکثر اکیلے نظر آتے ہیں، یہی وجہ ہے کہ نر اکثر اپنے اکیلے پن کی وجہ سے جلد شکاریوں کے ہتھے چڑھ جاتے ہیں۔سردیوں میں ان کے جھنڈ کی تعداد 30 سے 100 جانور فی جھنڈ تک پہنچ جاتی ہے۔یہ جھنڈ گھنے جنگلوں سے بچتے ہیں اور عام طور پر میدانوں میں رہنے کو ترجیح دیتے ہیں۔اس کے علاوہ چھوٹی چٹانوں والے علاقوں اور جھاڑی دار جنگلوں میں رہائش اختیار کرتے ہیں، انہیں عام طور پر کالے ہرن کے ساتھ ساتھ دیکھا گیا ہے یعنی دونوں کی پسندیدہ جگہیں ایک جیسی ہی ہیں۔

جنگلوں میں ان کے سب سے بڑے دشمن شیر اور ٹائیگر ہیں، چیتا اور تیندوا بڑے جانوروں کو شکار نہیں کرتا ہے لیکن اکثر بچھڑوں پر ہاتھ صاف کرجاتے ہیں۔ان کے علاوہ ان کا سب سے بڑا دشمن انسان ہے جو اس کے بے حد لذیذ گوشت اور قیمتی کھال کے حصول کے لئے اس کا بے دریغ شکار کرتا چلا آ رہا ہے اور یہ سلسلہ آج بھی بدستور جاری ہے جس کی وجہ سے اس کی نسل کو خطرات لاحق ہو چکے ہیں۔

نیل گائے پانی کے ذخیروں کے قریب قریب رہنا پسند کرتے ہیں اور بغیر کچھ کھائے پیئے کئی دنوں تک گزارہ کر سکتے ہیں۔ ان کی دلچسپ عادات میں سے ایک یہ ہے کہ یہ عموما رفع حاجت کے لئے روزانہ ایک ہی جگہ پر آتے ہیں۔

ایک اندازے کے مطابق ہندوستان میں نیل گائے کی تعداد ایک لاکھ ہے اور امریکی ریاست البامہ اور ٹیکساس میں ان کی تعداد 15000 تک ہے۔ہندوستان و پاکستان میں اس کا بے دریغی سے شکار ہوتا ہے اور اس کی تعداد میں مسلسل کمی ہو رہی ہے۔ تحفظِ ماحولیات کی انٹرنیشنل تنظیم نے اس کی نسل کو معدومی کے خطرہ کے نچلے درجے پر رکھا ہے۔

Attached Thumbnails

 

عدنان دانی

بہت عمدہ معلومات ہے ، شکریہ

راجہ اکرام

السلام علیکم
’’اردو نامہ فومز‘‘ پر یہ تحریر پڑھی، کافی معلوماتی ہے،
ہاں کافی ساری خوبصورت تصاویر بھی لگی ہوئی ہیں، سوچا آپ کے ساتھ شیئر کر دوں

__________________
محتاج اصلاح و دعا

عروج

بہترین معلومات کا اضافہ ھؤا نیل گائے کے بارے میں۔