جواد رضا خان جامی

ادھورے خواب ہیں میرے ادھوری ذات میری ہے
شکن آلود بستر پر اکیلی رات میری ہے
بڑے اوصاف ہیں تیرے ہر اچھی بات تیری ہے
برا میرا تخیل ہے بری ہر بات میری ہے
کمر بستہ رہا دن بھر کڑکتی دھوپ کے نیچے
مہکتی شام میں تنہائی کی سوغات میری ہے
بڑا روشن زمانہ ہے چمکتے چاند کے باعث
اندھیرا ہے میرے گھر میں شمع نہ ہاتھ میری ہے
تیرے سنگ جھوم لیتی ہیں میری بے تاب امیدیں
جو دل پہ درد کی اتری ہے وہ بارات میری ہے
تیری برکھا کی بوندوں پر میرا حق ہی نہیں شاید
جو ان آنکھوں سے رستی ہے وہی برسات میری ہے
فقط یہ آس ہے جامی کوئی اتنا کہے مجھ سے
تیرا ہر درد میرا ہے تیری یہ ذات میری ہے