جواد رضا خان جامی

کہیں خواہشوں اور تمنا کے مرگھٹ
کہیں چاروں جانب بہاروں کے جھرمٹ
کہیں دوڑتی بھاگتی زندگی ہے
کہیں ماتموں سے بھری ہر خوشی ہے
کہیں زندگی کا ہر اک پل قیامت
اور ہر اک قیامت ہے تیری شرارت
اگر تم جو ہوتے میرے ساتھ ہمدم
تو لگتے ہمیں بھی حسیں سارے موسم
کہیں نفرتوں کی تپش ہر طرف ہے
کہیں چاہتوں کی زمیں پر برف ہے
کہیں زندگی ہے تو سنگ ہیں مصائب
اور اتنی مصیبت کہ دنگ ہیں مصائب
کہیں آسماں پر دھواں ہی دھواں ہے
کہیں لاش اٹھائے ہوئے ہر مکاں ہے
اگر یہ مصائب کہیں ہوتے کچھ کم
تو لگتے ہمیں بھی حسیں سارے موسم
کبھی روشنی بھی اندھیرے لٹائے
کبھی اوس بھی آگ سی اک لگائے
کبھی پھول سے بھی نہیں ملتی خوشبو
کبھی پھیل جاتا ہے سناٹا ہرسو
کبھی تو بہاروں میں لگتی خزاں ہے
کوئی تو بتائے یہ کیسا سماں ہے
جو ہم پہ نظارے یہ ہوتے نہ برہم
تو لگتے ہمیں بھی حسیں سارے موسم
جو چہرے پہ چندا کی بندیا سجائے
کہیں سے نکل آتے تم بن بلائے
محبت کی ہر ایک ادا مسکراتی
میرے دل کے آنگن میں تو جھلملاتی
بدن کا ہر ایک جز خوشی سے مچلتا
کہ ارماں ہر اک میرے دل کا نکلتا
ہم اتنی مسرت سے ہو جاتے بیدم
تو لگتے ہمیں بھی حسیں سارے موسم
میسر ہمیں بھی تو ہو بادشاہی
کہ کب تک چلے گا یہ حکم مناہی
ختم اب کرو ہجر کی ساعتوں کو
اذن ہو ہماری طرف راحتوں کو
ہو اعلان کہ آج سے غم نہ آئیں
دکھی جو ہوئے ہیں وہ اب مسکرائیں
جو طرز تغافل کا ہوتا نہ عالم
تو لگتے ہمیں بھی حسیں سارے موسم
کہیں سے محبت کی تعبیر لاؤ
اے جان تمنا میرے پاس آؤ
کہ کٹتی نہیں ہے شب غم کی ساعت
اے صبح وصل اک ذرا سی عنایت
میری حسرتوں پر برس جاؤاک دن
مریض محبت کو بہلاؤ اک دن
محبت کی برکھا برستی چھماچھم
تو لگتے ہمیں بھی حسیں سارے موسم
ہر اک سمت ماتم کناں حسرتیں ہیں
ہے بوڑھی محبت جواں حسرتیں ہیں
ہر اک سمت اداسی ہر اک سمت آہیں
کہ اشکوں نے گھیری ہیں جامی نگاہیں
خدا جانے کب ختم ہونگے اندھیرے
کسی روز پورے ہوں ارمان میرے
جو ہوتا خوشی سے کسی روز سنگم
تو لگتے ہمیں بھی حسیں سارے موسم