جہادِ اکبر

اپنے نفس کو تنبیہ کرنا اور ڈانٹنا

نفس کا مجھےجواب دینا

کہا اس نے وہ تھا خزانہ چھپا
یہی آدم آئینہ اس کا ہوا

یہاں مظہر اپنا بنایا مجھے
محبت کا جامہ پہنایا مجھے

میں ایمان اس پر رکھوں ہوں مدام
ہے توحید سے اسکی دل شادکام

کہا میں کہ اے نفس بد زشت خو
ہے دشمن حقیقی میرے دل کا تو

بناتا ہے کیوں تو یہ باتیں دروغ
تیری بات ہر گز نہ رکھے فروغ

محبت کا ہو جس سے دل خادماں
کہاں ہے وہ تجھ میں مجھے دے نشاں

جو ایمان و الفت میں صادق ہے تو
تو پھر کیوں گناہوں پہ عاشق ہے تو

کرے ہے کب عاشق خلافِ حبیب
نہیں تجھ کو اس کی محبت نصیب

کہا اس نے ہے وہ رحیم و غفور
گناہ میرے سب بخش دے گا ضرور

کروں میں گناہ پھر توبہ کروں
وہیں پل میں مقبول ہوگاہ ہوں

کہا میں فریب اب مجھے دے ہے کیا
دغا کی ہو توبہ سے کیا فائدہ

گناہوں کی ہو دل میں الفت بھری
فریب حق کو دیتا ہے تو اے شقی

تو اس جہل اور مکر ہی سے نکل
طریق شریعت پہ چل اے دغل

کہا تنگ مت کر تو اتنا مجھے
میں ناچار ہوں حق کی تقدیر سے

کہا حق نے مجھ کو ظلاماً جہول
نصیحت سے تیری ہو اب کیا حصول

کہا میں وہ ہے حجتِ بے فروغ
مرے سامنے لاتا ہے اے دروغ

ظلوماً جہول حق نے تجھ کو کہا
کہ ہے عیب اور نقص تجھ میں چھپا

کیا تجھ کو آگاہ اس واسطے
کہ تا تو گناہوں سے بچتا رہے

مت اس پر تو اتنا اب اصرار کر
نہ مغرور ہو کام کا کار کر

کسی کو اگر کہئے جاہل ہے تو
تو وہ جہل سے بھاگے بے گفتگو

نہ تجھ سا کہے یہ کہ جاہل ہوں میں
پڑھوں کس طرح علم کاہل ہوں میں