منکرین قرآن وحدیث کی جانب کی طرف سے احادیث صحیحہ کو رد کرنے کے لیے کے عموما یہ پراپیگنڈہ کیا جاتا ہے کہ بعض صحیح احادیث قرآن کے خلاف ہیں , جن میں سے انکے زعم کے مطابق کچھ متفق علیہ احادیث جو صحت کے اعلى ترین معیار پر ہیں وہ بھی قرآن کے خلاف ہیں ۔
حالانکہ ایسا قطعا نہیں , کبھی بھی کوئی صحیح حدیث قرآن کے خلاف نہیں ہوتی کیونکہ حدیث بھی وحی الہی اور کتاب اللہ ہی ہے , جسطرح قرآن وحی الہی اور کتاب اللہ ہے , اور وحی الہی میں تضاد وتناقض قطعا نہیں ہوتا ہے ۔
ہاں یہ ضرور ہے کہ کچھ لوگوں کی کوتاہ فہمی کی بناء پر ظاہرا انہیں دو احادیث یا احادیث و آیات یا دو آیات کے مابین تناقض و تضاد معلوم ہو ۔ یعنی وہ تناقض اور تضاد بات کو نہ سمجھنے کی وجہ سے عقل وفہم میں پیدا ہوتا ہے حقیقتا ان دو آیات یا احادیث یا آیت وحدیث صحیح کے مابین تضاد نہیں ہوتا ۔
مثلا اللہ رب العالمین کا فرمان ہے :
إِنَّكَ لَا تَهْدِي مَنْ أَحْبَبْتَ وَلَكِنَّ اللَّهَ يَهْدِي مَن يَشَاءُ وَهُوَ أَعْلَمُ بِالْمُهْتَدِينَ [القصص : 56]
آپ جسے چاہیں اسے ہدایت نہیں دے سکتے , اور لیکن اللہ تعالى جسے چاہتا ہے ہدایت دیتا ہے اور وہ ہدایت یافتگان کو بخوبی جانتا ہے ۔
اور دوسری جگہ اللہ کا یہ فرمان بھی ہے :
وَإِنَّكَ لَتَهْدِي إِلَى صِرَاطٍ مُّسْتَقِيمٍ [الشورى : 52]
اور آپ یقینا صراط مستقیم کی طرف ہدایت دیتے ہیں ۔
ان دونوں آیات کو پڑھنے سے بادی النظر میں تعارض و تناقض اور تضاد معلوم ہوتا ہے کہ ایک آیت میں نبی کریم صلى اللہ علیہ وسلم کو کہا جا رہا ہے کہ آپ ہدایت نہیں دے سکتے اور دوسرے آیت میں کہا جارہا ہے کہ آپ ہدایت دیتے ہیں !
لیکن حقیقتا ان میں تضاد یا تعارض یا تناقض نہیں , ایک آیات ایکدوسرے کے مخالف نہیں !
اب سوال یہ پیدا ہوتا ہے کہ یہ آیات ایکدوسرے کے خلاف کیوں نہیں ہیں , اس کا جواب ہم إن شاء اللہ ضرور دیں گے , لیکن پہلے یہ بات سمجھ لیں کہ جو لوگ احادیث اور قرآن کے مابین تعارض و تناقض و تضاد کی بات کرتے ہیں اور کہتے ہیں کہ یہ احادیث صحیحہ قرآن کے خلاف ہیں یا مخالف قرآن ہیں , در حقیقت ان احادیث کا معاملہ بھی قرآن کے ساتھ اسی طرح کا ہوتا ہے جسطرح کا ان دو آیات کا ہے ۔ یعنی حقیقی مفہوم ومعنى کو نہ سمجھنے کی وجہ سے جسطرح یہ دو آیات آپس میں ٹکراتی ہوئی نظر آتی ہیں اسی طرح ان آیات یا احادیث یا دونوں ہی کے حقیقی مفہوم ومعنى کو نہ سمجھنے کی وجہ سے وہ آیات واحادیث آپس میں ٹکراتی معلوم ہوتی ہیں ۔ لیکن جب ان آیات یا احادیث پر گہری نظر ڈالی جائے اور قرآن کا بغور مطالعہ کر لیا جائے تو ان احادیث کا قرآن کے ساتھ تعارض خود ہی ختم ہو جاتا ہے ۔

__________________