Moderated Message:

مربوط اور علمی گفتگو یقینی بنانے کے لیے انتظامیہ کی جانب سے اس تھریڈ ‌میں اب صرف جناب نوشاد احمد اور جناب عادل سہیل کو گفتگو کرنے کی اجازت ہے۔ باقی محترام اراکین شکریے کے بٹن کے ذریعے اپنے ثاثرات کا اظہار کر سکتے ہیں۔ غیر متعلقہ مراسلات منتقل کر دیے جائیں گے۔

بعض لوگ سمجھتے ہیں کہ کتب احادیث میں جو کچھ محدثین نے جمع کر دیا ہے وہ سب کچھ درست ہے اور اس میں کسی قسم کی غلطی کا امکان نہیں ہے اور اگر کوئی ان لوگوں کی توجہ ان محدثین کی کتابوں اور ان کی بیان کردہ احادیث میں پائے جانے والے اشکالات کی طرف دلاتا ہے تو پہلے تو یہ لوگ اپنا خود ساختہ تحقیق کا طریقہ پیش کرتے ہیں اور سوال کرنے والے کو کہتے ہیں کہ اس کا طریقہ تحقیق درست نہیں ہے اور اس کی عقل محدود ہے اس لیئے وہ ان احادیث کو نہیں سمجھ سکتا اور کوئی صاحب علم ہی صرف ان احادیث کو سمجھ سکتا ہے اور سمجھا سکتا ہے کیوں کہ یہ منصب صرف انھیں کا ہے اور جو لوگ احادیث پر اعتراض کرتے ہیں ان کو فورا منکر حدیث کے زمرے میں ڈال کر فتوے کی توپ سے ان کا منہ بند کرنے کی کوشش کرتے ہیں۔
ان لوگوں کا سب سے بڑا نظریہ یہ ہے کہ کتب احادیث اور خصوصا بخاری صاحب نے اپنی کتاب حدیث میں جو کچھ لکھ دیا ہے وہ حرف آخر ہے اور اس میں کسی قسم کی غلطی کا امکان نہیں پایا جا سکتا۔یہ مضمون اسی غلط فہمی کو دور کرنے کی ایک کوشش ہے اس میں ہم یہ دکھائیں گے کہ صاحب بخاری متقی ،پرہیز گار،عالم ،وغیرہ ہونے کے باوجود ایک انسان تھے اور ان سے غلطیوں کا ہونا ناممکن نہیں ہے ۔اور یہی غلطیاں انہوں نے اپنی کتاب حدیث لکھتے ہوئے کیں ہیں ذیل میں ہم چند غلطیوں کی نشاندہی کرتے ہیں۔
اس کا مقصد بخاری کی اہمیت کو گھٹانا نہیں صرف یہ دکھانا ہے کہ بخاری ایک انسان تھے ان سے غلطیوں کا ہونا ممکن ہے ۔اور جو لوگ انھیں معصوم عن الخطا سمجھتے ہیں ان کی توجہ اس طرف دلانا ہے کہ بخاری کو ایک انسان ہی سمجھیں خدا نہ سمھیں اور ان کی کتاب کو ایک انسان کی لکھی کتاب ہی سمجھیں نہ کہ خدا کی لکھی ہوئی حرف آخر کتاب۔
۱۔صحیح بخاری میں ایسے راویوں کی تعداد کافی زیادہ ہے جو جہمی،قدری یا رافضی عقائد کے حامل تھے اس کے ساتھ ساتھ ایسے راویوں کی تعداد بھی قابل ذکر ہے جو منکر الحدیث ،واہی،اور وہمی تھے ان تمام راویوں کی تفصیل حافظ ابن حجر عسقلانی نے ہدی الساری مقدمہ فتح الباری میں مہیا کی ہے ۔اس کے علاوہ بخاری صاحب نے جن راویوں پر خود جرح کی ہے اور انھیں مختلف العقائد بتایا ہے انھیں راویوں کی احادیث ان کی کتاب میں موجود ہیں۔

پہلی مثال:۔باب الاستنجابا لماء کے تحت امام بخاری نے ایک روایت اس سند کے ساتھ نقل کی ہے ( حدثنا ابو سعید ھشام بن عبد الملک قال حدثنا شعبتہ عن ابی معاذ و اسمہ عطا بن ابی میمونہ قال سمعت انس بن مالک یقول کان النبی صلی اللہ علیہ وسلم)اس حدیث کی سند میں ایک راوی ہے عطا بن ابی میمونہ اس کے بارے میں امام بخاری فرماتے ہیں (عطا بن ابی میمونہ ابو معاذ مولی انس ،وقال یزید بن ھارون مولی عمران بن حصین وکان یری القدر) ( حوالہ :۔ کتاب الضعفاء الصغیر صفحہ ۲۷۱۔امام بخاری)یعنی عطا بن ابی میمونہ کے بارے میں کہتے ہیں کہ یہ قدری تھا یعنی قدری عقائد کا حامل تھا اور پھر اس سے اپنی کتاب میں حدیث بھی نقل کر دیتے ہیں۔

دوسری مثال:۔کتاب المغازی میں ایک حدیث یو ں ذکر کرتے ہیں ( حدثنی عباس و الوحید قال حدثنا عبد الواحد عن ایوب بن عائز قال حدثنا قیس بن مسلم قال سمعت طارق بن شہاب یقول حدثنی ابو موسی الا شعری قال بعثتی رسول اللہ )اس حدیث میں ایک راوی ہے ایوب بن عائز اس کو بھی صاحب بخاری نے کتاب الضعفاء میں درج کیا ہے فرماتے ہیں ( ایوب بن عائز الطای کان یری الارجاء۔یعنی یہ شخص مرجیہ عقائد کا حامل تھا)حوالہ ( کتاب الضعفاء الصغیر صفحہ ۲۵۳)۔حافظ ذہبی ایوب بن عائز کے ترجمہ میں لکھتے ہیں ( وکان من المرجئتہ قالالبخاری واود ہ فی الضعفاء لا رجاۂ والعجب من البخاری یغمزہ و قد احتج بہ۔یعنی امام بخاری نے ایوب بن عائز کو مرجۂ قرار دے کر اس کا ضعفاء میں شمار کیا ہے اور حیرت ہے کہ اس کو ضعیف قرار دے کر پھر اس سے استدلال کرتے ہیں ۔حوالہ:۔ کتاب الضعفاء الصغیر صفحہ ۲۵۲)

تیسری مثال :۔اسماعیل بن ابان کوفی ایک راوی ہے اس کے بارے میں امام بخاری کہتے ہیں کہ (اسماعیل بن ابان عن ھشام بن عروتہ متروک الحدیث کنیتہ ابو اسحاق کوفی۔اسماعیل بن ابان کوفی جو ھشام بن عروتہ سے روایت کرتا ہے متروک الحدیث ہے۔
مگر اسی اسماعیل بن ابان کوفی کے متعلق حافظ ابن حجر عسقلانی فرماتے ہیں کہ ( اسماعیل بن ابان الوراق الکوفی فی احد شیوخ البخاری۔اسماعیل بن ابان امام بخاری کے استادوں میں ایک استاد ہیں۔حوالہ:۔ حافظ ابن حجر عسقلانی متوفی ۸۵۲ھد الساری جلد صفحہ ۱۵۱)
اب آپ بتلائیے کہ امام بخاری جسے متروک الحدیث کہ رہے ہیں ابن حجر عسقلانی کے مطابق وہ ان کے استادوں میں سے ہیں۔گویا امام بخاری کے استادوں میں جن سے انھوں نے احادیث روایت کیں ہیں متروک الحدیث راوی بھی تھے ۔
یہ چند مثالیں ہیں جو ثابت کرتی ہیں کہ امام بخاری ایک انسان ہی تھے اور انھوں نے بھی غلطیاں کیں ہیں وہ کوئی معاذ اللہ خدا نہیں تھے اور نہ ہی ان کی کتاب کوئی خدا کی کتاب ہے جس میں غلطیاں نہ ہوں۔

۲۔سند بیان کرنے کے معاملے میں غلطی:۔
امام بخاری کبھی کبھی سند بیان کرنے کے معاملے میں بھی غلطی کر جاتے ہیں۔چنانچہ ( اذا قیمت الصلواۃ فلا صلوۃ الا المکتوبہ کے تحت ایک حدیث اس سند کے ساتھ روایت کی ہے۔حدثنا عبد العزیز بن عبداللہ قال حدثنا ابراہیم بن سعد عن ابیہ عن حفص بن عاصم عن عبداللہ بن مالک بن بجنیہ قال ۔الخ(صحیح البخاری جلد ۱)
اس سند کے بیان میں امام بخاری سے دو غلطیاں واقع ہوئی ہیں ایک تو یہ کہ بجنیہ کو مالک کی والدہ قرار دیا ہے جبکہ بجنیہ مالک کی والدہ کے بجائے عبداللہ کی والدہ ہیں ۔دوسری غلطی یہ کہ اسی حدیث میں آگے چل کر فرماتے ہیں (سمعت رجلا من الا زد یقال لہ مالک بن بجنیہ ان رسول اللہ رائی رجلا الحدیث۔اس حدیث کو انہوں نے مالک سے روایت کیا ہے )۔حالانکہ یہ حدیث مالک کے بیٹے عبداللہ بن مالک سے مروی ہے ۔مالک تو مشرف بہ اسلام بھی نہیں ہوئے تھے ۔مسلم ،نسائی اور ابن ماجہ نے بھی اس سند کو بیان کیا ہے لیکن انھوں نے یہ غلطیاں نہیں کیں ہیں۔اس سلسلے میں حافظ ابن حجر عسقلانی لکھتے ہیں کہ (الوھم فیہ موضعین احد ھما ان بجنیہ والدۃ عبداللہ لا مالک وثا نیہا ان الصحبۃ و الروایۃ لعبداللہ لا لمالک۔اس روایت میں دو جگہ وہم ہے اول یہ کہ بجنیہ عبداللہ کی والدہ ہیں نہ کہ مالک کی ثانی یہ کہ صحابی اور راوی عبداللہ ہیں نہ کہ مالک۔(حوالہ:۔ فتح الباری صفحہ ۲۹)
اب دیکھیئے کہ امام بخاری آخر انسان ہی تھے اور کہیں کہیں سند بیان کرنے میں بھی ایسی فاش غلطی کر جاتے تھے اب اس پر ان کی کتاب کو کوئی غلطیوں سے پاک سمجھے تو اس کے بارے میں کیا کہا جاسکتا ہے ۔

۳:۔متن حدیث بیان کرنے میں غلطی:۔
امام بخاری کبھی کبھی متن حدیث بیان کرنے میں بھی غلطی کر جاتے ہیں اس کی مثال دیکھیے ۔
۱۔کتاب الزکوۃ میں امام بخاری ایک حدیث لائے ہیں۔
عن عائشہ ان بعض ازواج النبی قلن للنبی اینا اسرع بک لحوقا قال اطو لکن یدا فا خذ وا قصبۃ یذر عو نہا فکا نت سودۃ اطولھن یدا فعلمنا بعد انما کانت طول یدھاالصدقۃ وکانت اسرعنا لحوقابہ صلی اللہ علیہ وسلم وکانت تحب الصدقۃ۔ترجمہ:۔حضر ت عائشہ سے مروی ہے کہ رسول اللہ کی بعض ازواج نے آپ سے عرض کیا کہ حضور آپ کی ازواج میں سے کون سب سے پہلے آپ کے ساتھ واصل ہوگی ۔فرمایا جس کے ہاتھ لمبے ہوں گے ۔یہ سن کر سب اپنے اپنے ہاتھ ناپنے لگیں اور ان میں سب سے لمبے ہاتھ سودہ کے تھے ۔اور بعد میں ہمیں معلوم ہوا کہ لمبے ہاتھوں کی لمبائی سے صدقہ مراد ہے اور سودہ کا سب سے پہلے انتقال ہوا اور وہ صدقہ سے محبت رکھتی تھیں۔(صحیح بخاری جلد ۱)
اس حدیث میں کانت اسرعنا لحوقا بہ کی ضمیر سودہ کی طرف راجح ہے ۔جس کا تقاضہ یہی ہے کہ رسول اللہ کے بعد سب سے پہلے سودہ کا وصال ہوا ہوگا۔ لیکن یہ بات تمام اصحاب سیر اور ارباب تاریخ کی شہادت سے بلکل باطل ہے کیوں کہ آپ کے بعد سب سے پہلے زینب بنت جحش کا ۲۰ھجری میں وصال ہوا اور حضرت سودہ کا وصال تو اس کے بہت بعد ۵۴ ھجری میں ہوا ہے۔( حوالہ علامہ بد ر الدین عینی ۔متوفی ۸۵۵ھجری عمدۃ القاری جلد ۸ صفحہ ۲۸۲)
دیکھئے اس حدیث کے متن کے بیان میں امام بخاری ایک انسان ہونے کے ناتے چوک گئے اور حضرت زینب کا نام ذکر کرنا بھول گئے ۔ان تک اگر یہ روایت حضرت زینب کے نام کے بغیر بھی پہنچی تھی تو ان کا کام تھا تحقیق کرتے اور صحیح روایت اپنی کتاب میں ذکر کرتے۔
۲۔باب احداد المراۃ علی غیر زوجہا ء کے تحت امام بخاری ایک حدیث روایت کرتے ہیں
عن زینب بنت ابی سلمۃقالت لما جاء نصی ابی سفیان من الشام دعت ام حبیبہ بصفرۃفی یوم الثالث فمسحت عارضیہا وذرا عیہا الحدیث( صحیح بخاری جلد ۱) ترجمہ :۔ زینب بنت سلمہ کا بیان ہے کہ جب شام سے حضرت ابو سفیان کی موت کی خبر آئی تو حضرت ام حبیبہ نے تین دن کے بعد سوگ ختم کردیا۔

اس حدیث میں امام بخاری نے ابو سفیان کی موت کی اطلاع شام سے آنا بیان کی ہے حالا نکہ یہ بات تاریخی طور پر غلط ہے کیوں کہ با اتفاق مورخین ابو سفیان کا انتقال مدینہ منورہ میں ہوا تھا ۔اسی لیئے حافظ ابن حجر عسقلانی نے لکھا ہے( وفی قول من الشام نظر لان ابا سفیان مات با لمدینہ بلا خلاف بین اھل العلم با الا خبار والجمہور علی انہ مات اثنتین وثلاثین وقیل سنتہ ثلاث ولد فی شیی من طرق ھذا الحدیث تقبیدہ بذا لک الا فی روایۃسفیان بن عینیہ ھذہ واظنہا وھما۔ترجمہ:۔اس روایت میں شام کے لفظ پر اعتراض ہے کیونکہ مورخین میں سے کسی کا اس بات پر اختلاف نہیں ہے کہ ابو سفیان کا انتقال مدینہ میں ۳۲ھ یا ۳۳ھ میں ہوا تھا۔اور اس روایت میں شام کی قید میں نے سفیان بن عینیہ کی روایت کے سوا اور کہیں نہیں دیکھی اور میرا گمان ہے کہ یہ راوی کا وہم ہے۔ ( حوالہ:۔ حافظ ابن حجر عسقلانی ۔فتح الباری ج۳ صفحہ ۳۸۸)

دیکھیئے اس روایت میں راوی سے تحقیق کیئے بغیر روایت کردی کہ ابو سفیان کی موت کی اطلاع شام سے آئی جبکہ ان کا انتقال مدینہ میں ہوا تھا ۔مگر امام بخاری کو یہ معروف و مشہور بات پتہ تک نہ تھی کیوں کہ اگر انھیں پتہ ہوتا کہ ابو سفیان کی موت مدینہ میں ہوئی ہے تو وہ کبھی بھی یہ روایت درج نہ کرتے ۔اور اس سے یہ بھی معلوم ہوتا ہے کہ امام بخاری نے اس قسم کی روایات درج کرنے سے پہلے ذرا بھی تحقیق نہیں کی ورنہ اس قسم کی غلط البیان روایات وہ درج نہ کرتے ۔یہ انسانی کمزوری ہے جس کا شکار ہماری آپ کی طرح امام بخاری بھی تھے ۔وہ معصوم نہیں تھے اور نہ ہی ان کی کتاب اتنی معصوم ہے کہ اس میں درج ہر روایت کو درست ہی سمجھا جائے اور اس میں غلطی کا امکان تک دھونڈنا غلط ہو۔

۳۔باب مناقب عثمان میں امام بخاری نے ایک حدیث روایت کی ہے جس میں ذکر ہے کہ
ثم دعا علیاہ فامرہ ان یجلد فجلد ہ ثمانین ( جلد ۱ )امام بخاری نے اس روایت میں اسی ( ۸۰ ) کوڑے مارنے کا ذکر کیا ہے ۔لیکن یہ بات صحیح نہیں ہے کہ حضرت علی نے ۸۰ کوڑے مارے تھے ۔حافظ ابن حجر عسقلانی فرماتے ہیں کہ ( فی روایۃ معمر فجلد الولید اربعین جلدۃ وھذہ الروایۃ اصح من روایۃ یونس والوھم فیہ من الراوی۔ترجمہ:۔ معمر کی روایت میں ہے کہ ولید کو چالیس کوڑے مارے گئے اور صحیح تر روایت یہی ہے ۔اور اس روایت (یعنی ۸۰ کوڑے والی) میں راوی کو وہم لاحق ہوا ہے۔ ( حوالہ:۔ فتح الباری جلد ۸ صفحہ ۵۷)

یہاں بھی امام بخاری نے تحقیق کیئے بغیر روایت ذکر کردی اور ذرا بھی تحقیق نہیں کی کہ ۸۰ کوڑے مارے گئے تھے یا ۴۰۔یہ بھی ان کی آپ کی اور ہماری طرح بشری کمزوری تھی کہ ان سے اتنی بڑی چوک ہوئی کہ بغیر تحقیق کے روایت نقل کردی۔اب کیا امام بخاری اور ان کی کتاب کو غلطیوں سے مکمل پاک مانا جاسکتا ہے؟

۴۔مسائل کے استنباط میں غلطی:۔
امام بخاری نے اپنی کتاب میں نہ صرف یہ کہ احادیث نقل کی ہیں بلکہ ان سے مسائل بھی اخذکیئے ہیں اور ان سے اس میں بھی غلطیاں واقع ہوئی ہیں۔اس کی مثال دیکھئے۔
۱۔اذا شرب الکلب فی الا نا ء کے تحت امام بخاری نے متعدد احادیث ذکر کی ہیں ان میں سے ایک حدیث ہے۔
عن النبی ان رجلا رای کلبا یاکل الثری من العطش فاخذ الرجل خفہ فجعل یغرف لہ بہ حتی ارواہ فشکر اللہ لہ فا دخلہ اللہ الجنتہ۔ترجمہ:۔حضور نے بیان فرمایا کہ ایک شخص نے دیکھا کہ ایک باؤلا کتا کیچڑ چاٹ رہا ہے۔اس نے اپنے موزے میں پانی بھر کر اس کو چلو سے پلایا ۔(صحیح بخاری جلد ۱ )
اس حدیث سے امام بخاری یہ مسئلہ نکالتے ہیں کہ کتے کا جھوٹا پاک ہے اس بارے میں حافظ ابن حجر عسقلانی لکھتے ہیں کہ ( استدل بہ المصنف علی طہارۃ سؤر الکلب ۔ترجمہ:۔ مصنف نے اس حدیث سے کتے کے جھوٹے کی طہارت پر استدلال کیا ہے۔( حوالہ :۔حافظ ابن حجرعسقلانی ۔فتح الباری ج ۱ صفحہ ۲۸۹)

اسی باب میں ایک اور حدیث ذکر کی ہے
کانت الکلاب تبول و تقبل و تدبر فی المسجد فی زمان رسول اللہ فلم یکونو یرشون من ذالک۔ترجمہ:۔ عہد رسالت میں کتے مسجد میں آجایا کرتے تھے اور وہ بسا اوقات مسجد میں پیشاب بھی کردیا کرتے تھے ۔اور صحابہ اس پر پانی نہیں ڈالتے تھے( صحیح بخاری جلد ۱ )
حافظ ابن حجر نے اس ضمن میں لکھا ہے کہ یہ ابتدائی دور کی بات ہے جب مسجد میں دروازے نہ تھے ۔اور بعد میں مسجد کی تطہیر و تکریم کا حکم وارد ہوا اور مسجد میں دروازے لگائے گئے۔تاہم زمین پر اگر پیشاب گر جائے اور وہ دھوپ سے خشک ہو جائے تو زمین پاک ہو جاتی ہے اور ان کے نہ دھونے سے یہی ثابت ہوتا ہے زمین خشک ہونے سے بھی پاک ہوجاتی ہے اور اس کے لیئے دھونا ضروری نہیں ہے اور یہی احناف کا مذہب ہے ۔لیکن امام بخاری نے اس حدیث سے کون سا مسئلہ نکالا حافظ بد ر الدین عینی لکھتے ہیں۔

احتج بہ البخاری علی طہارۃ بول الکلب۔ترجمہ:۔اس حدیث سے امام بخاری نے کتے کے پیشاب کی طہارت پر استدلال کیا ہے۔( حوالہ:۔ حافظ بدر الدین عینی متوفی ۸۵۵ھ عمدۃ القاری ج ۳ صفحہ ۴۴)
یعنی امام بخاری کے نزدیک کتے کا پیشاب اس حدیث کی رو سے پاک ہے ۔یہ طریقہ تھا امام بخاری کے حدیث سے مسائل اخذ کرنے کا۔

اس مختصر سے مضمون میں ہم نے یہ دکھانے کی کوشش کی ہے کہ اگر کوئی یہ سمجھتا ہے کہ امام بخاری اور ان کی کتاب با لکل خطاؤں سے پاک ہے اور بس انھوں نے اپنے کتاب میں جو کچھ لکھ دیا ہے وہ سب کچھ درست ہے اور اس میں غلطی ڈھونڈنا منکر حدیث بن جانا ہے اور دائرہ اسلام سے خارج ہو جانا ہے ۔ایسی سوچ رکھنے والا احمق ہے کیوں کہ علماء حدیث نے بخاری اور ان کی کتاب کا باریک بینی سے جائزہ لے کر دکھا دیا ہے کہ ان کے فہم طریقہ تحقیق اور احادیث جمع کرنے بیان کرنے اور ان سے استنباط مسائل کرنے میں انھوں نے با لکل ویسی ہی غلطیاں کیں ہیں جیسے ہر انسان بشری کمزوریوں کے تحت کر سکتا ہے اور ان علماء کو اتنی تنقید کے باوجود کوئی منکر حدیث کہنے کی جرات بھی نہیں کر سکتا تو اگر آج کوئی دلائل کے ساتھ کسی حدیث پر تنقید کرے تو کسی کو یہ حق نہیں پہنچتاکہ اسے منکر حدیث کہے اور بخاری کو اور ان کی کتاب کو خطاؤں سے پاک جانے۔خطاؤں سے پاک صرف اللہ کی کتاب ہے باقی ہر انسان غلطی کر سکتا ہے اور امام بخاری بھی ایک انسان ہی تھے۔

والسلام