حدیث جمع کرنا اور اس کی درجہ بندی کرنا ایک فن ہے۔ ہر دوسرے فن کی طرح اس کے کچھ قواعد و ضوابط ہیں۔ جن میں ایک اہم قاعدہ ہےکہ جس طرح قرآن مجید کی آیات ایک دوسرے کی تفسیر کرتی ہیں اسی طرح ایک حدیث دوسری حدیث کی تشریح اور وضاحت کرتی ہے۔ امام ابن حجر نے فتح الباری کے مقدمے میں مختلف مقامات پر سو کے قریب ایسے قواعد بیان کیے ہیں جن سے دو بظاہر متعارض صحیح حدیثوں کے درست مفہوم تک رسائی ہو سکتی ہے۔ آجکل ایسے مفکرین عام ملتے ہیں جنہیں علم حدیث کی کوئی شدبد نہیں ہوتی لیکن یہی حضرات حدیث پر اعتراضات کرنے اور قرون اولیٰ سے لے کر دور حاضر تک تمام مفسرین، محدثین، فقہاء اور علماء کے کام کو ناکارہ قرار دینے میں اتنی تیزی دکھاتے ہیں گویا قرآن کا درست مفہوم صرف انہی پر نازل ہوا ہے۔ احادیث کے ذخیرے میں سے چھانٹ چھانٹ کر ایسی چیزیں سامنے لانا جن پر بے سروپا اعتراضات کر کے مسلمانوں کے ذہن سے سنت کی اہمیت کم کی جا سکے اس طبقے کا عام وطیرہ ہے۔یہ لوگ اپنے مذموم مقاصد اور یہود و صلیب سے دوستی کا حق ادا کرتے ہوئےصحیح احادیث پر مستشرقین کے سکھائے ہوئے اعتراضات دہرا کر مسلمانوں‌کے ذہن کو مسموم کرنا چاہتے ہیں حالانکہ اعتراضات کے مدلل جواب بارہا دیے جا چکے ہیں‌اورعلمی میدان میں ان کی کوئی حیثیت نہیں ہے۔ ان کا ایک کارگر ہتھیار یہ ہے کہ حدیث کی کسی معروف کتاب سے ایک حدیث پیش کر کے اس کا من چاہا مطلب بیان کیا،محدثین کی تحقیق کو پس پشت ڈالا، شارحین کے کام کو دریا برد کیا، فقہاء کے استنباط نذر آتش کیے، پھر آنکھوں میں آنسو لا کر فریاد رس ہوئے کہ مسلمانو! دیکھو تمہارے نبی سے کیا منسوب کیا جا رہا ہے، پس تم یہ حدیث کی کتابیں جلا دو، ان کی طرف التفات نہ کرو، قرآن کی آیات کا جو بھی مطلب تم کو سمجھ میں آ جائے بس وہی معتبر ہے، قرآن سمجھنے کے لیے محمد مصطفیٰ صلی اللہ علیہ و علی آلہ وسلم کی چھوڑی ہوئی کوئی چیز معتبر نہیں ہے وغیرہ وغیرہ۔اس صورتحال کی افسوسناکی بڑھ جاتی ہے جب ہم دیکھتے ہیں کہ معترضین قرآن فہمی کے دعویدار ہیں۔سچی بات ہے کہ اگر ان کی قرآن فہمی درست ہوتی تو حدیث پر بے سروپا اعتراض کرنے کی جرات انہیں کبھی نہ ہوتی، کیونکہ جو لغو اعتراضات وہ صحیح حدیث پر کرتے ہیں اسی جیسے سوالات الٹے دماغ کا کوئی شخص قرآن مجید پر بھی اٹھا سکتا ہے۔ یہ کوئی مفروضہ نہیں بلکہ فی الواقع ایسے اعتراض ہوئے ہیں۔مثال کے طور پر ایک ہندو مصنف نے "لیغفر لک اللہ ما تقدم من ذنبک و ما تاخر" سے یہ ثابت کرنے کی ناپاک کوشش کی کہ رسول اللہ صلی اللہ علیہ و علی آلہ وسلم کی حیات مبارکہ نعوذ باللہ گناہوں سے آلودہ تھی۔ایک اور شخص نے سورۃ یوسف کی آیت بیان کر کے کہتا ہے کہ قرآن مجید میں عورتوں کو چالباز کہا گیا ہے جو "مہذب معاشرے" میں قابل قبول نہیں اس لیے توہین نسواں پر مبنی اس آیت کو قرآن سے نکال باہر کیا جائے۔نام نہاد مفکرین قرآن ان اعتراضات کے جواب میں آیات قرآنی کی ایک فہرست تھما کر آپ کو بتائیں گے کہ نہیں نہیں، قرآن کی ایک آیت دوسری آیت کی تفسیر کرتی ہے، درست مفہوم پانے کے لیے آپ اس موضوع پر تمام آیات کو پیش نظر رکھیں، آیت کا سیاق و سباق دیکھیں وغیرہ، لیکن افسوس! حدیث رسول کی باری آئے تو انہیں کوئی کلیہ کوئی اصول یاد نہیں رہتا، بلکہ پراپیگنڈے کا ایک طوفان کھڑا کر دیا جاتا ہے۔ بہرحال اعتراض کرنے والوں کا منہ کبھی بند نہیں ہو سکا۔ ہمارا کام یہ ہے کہ جو چیز قرآن و حدیث میں آئی ہے اسے درست تشریح اور صحابہ کرام کے فہم کے مطابق سمجھنے کی کوشش کریں۔ سمجھ نہ آئے تو علماء سے اس کے بارے میں دریافت کیا جائے۔ کسی حدیث پر اعتراض کرنے سے قبل دیکھ لیا جائے کہ محدثین نے اس کے بارے میں کیا فیصلہ دیا ہے، وہ صحیح، حسن، ضعیف، موضوع وغیرہ میں کس درجے میں آتی ہے۔ شارحین حدیث اس کی کیا تشریح کرتے ہیں۔ کوئی اعتراض کرے تو اسے صحیح بات بتا دی جائے، پھر اس کی اپنی مرضی ہے کہ وہ قبول کرتا ہے یا اسے اپنی کج فکری کی نذر کر دیتا ہے۔