کھیل کی خبریں

پاکستان کرکٹ اکیڈمی کی ٹیم نے کینیا کو تیسرے ون ڈے میچ میں شکست دے کر سیریز میں وائٹ واش کر دیا

نیروبی(پاک نیٹ)پاکستان کرکٹ اکیڈمی کی ٹیم نے کینیا کو تیسرے ون ڈے میچ میں ایک سو دو رنز سے شکست دے کر سیریز میں وائٹ واش کر دیا ۔نیروبی جیم خانہ میں کھیلے جانے والے میچ کا ٹاس مہمان ٹیم نے جیت کر پہلے بیٹنگ کر نے کا فیصلہ کیا ۔پاکستان کرکٹ اکیڈمی ٹیم نے راحیل مجید کی شاندار بیٹنگ کی بدولت مقررہ پچاس اوورز میں آٹھ وکٹوں کے نقصان پر دو سو پچاس رنز بنائے ۔راحیل مجید نے چودہ چوکوں اور ایک چھکے کی مدد سے ایک سو بارہ رنز کی اننگز کھیلی ۔خرم منظور نے انسٹھ رنز اسکور کئے ۔لیمیک اونینگو نے چار کھلاڑیوں کو آئوٹ کیا ۔جواب میں کینیا کی ٹیم سینتیس ویں اوور میں ایک سو اڑتالیس رنز بنا کر آئوٹ ہو گئی ۔جیمی کماندے انتالیس رنز بنا کر نمایاں رہے ۔یاسر شاہ نے تین اور راحیل مجید نے دو وکٹیں حاصل کی
٭٭٭٭٭٭٭٭٭٭٭

ہیمبرگ ماسٹرز ہاکی ٹورنامنٹ ‘ تربیتی کیمپ ختم ‘ ٹیم کل روانہ ہوگی

کراچی(پاک نیٹ )ہیمبرگ ماسٹرز ہاکی ٹورنامنٹ کے لئے قومی ٹیم کا تربیتی کیمپ کراچی میں ختم ہوگیا۔ ہاکی کلب آف پاکستان اسٹیڈیم میں تربیتی کیمپ کے آخری روز کھلاڑیوں نے صبح کے سیشن میں فزیکل ایکسرسائز اور شام کو پریکٹس سیشن میں حصہ لیا۔قومی ٹیم کے چیف کوچ جہانگیر بٹ نے نجی ٹی وی سے گفتگو کرتے ہوئے کہا کہ کیمپ میں پنالٹی کارنر سمیت ہر شعبے پر خاص توجہ دی گئی ہے، کھلاڑیوں نے بھرپور محنت کی ہے، ان سے جرمنی میں بہتر کارکردگی کی توقع ہے ۔انہوں نے کہا کہ ٹورنامنٹ کسی چیلنج سے کم نہیں جہاں عالمی چیمپئن جرمنی سمیت مضبوط ٹیموں سے مقابلہ ہونا ہے۔قومی ہاکی ٹیم کے کپتان شکیل عباسی کا کہنا تھا کہ وہ بیجنگ اولمپکس کی ناکامی کو بھلا کر ایک نئے جوش وجذبے کے ساتھ ایونٹ میں حصہ لینے جارہے ہیں۔ انہوں نے امید ظاہر کی کہ بہترین کامبینیشن کے ساتھ وہ مخالف ٹیموں کو شکست دینے کی پوری کوشش کریں گے۔ اٹھارہ کھلاڑیوں اور پانچ آفیشلز سمیت قومی ٹیم چار ملکی ٹورنانٹ میں شرکت کے لئے منگل کی صبح کراچی سے ہیمبرگ روانہ ہوگی۔سنگل لیگ کی بنیاد پر ہونے والے سہ روزہ ٹورنامنٹ میں پاکستانی ٹیم تین اکتوبر کو بیلجیئم‘ چار اکتوبر کو ملائیشیا اور پانچ اکتوبر کو میزبان جرمنی سے مقابلہ کرے گی۔بیجنگ اولمپکس میں ناکامی کے بعد نوجوان کھلاڑیوں پر مشتمل قومی ٹیم اپنے پہلے امتحان میں کیا نتائج دیتی ہے ،اس بات کا فیصلہ کھلاڑیوں کی کارکردگی سے مشروط ہے۔
٭٭٭٭٭٭٭٭٭٭٭

ٹوئنٹی 20 ٹورنامنٹ ‘اسکواڈ کا اعلان چھ اکتوبر کو ہو گا

لاہور(پاک نیٹ )ٹورنٹو میں کھیلے جانے والے چار ملکی ٹوئنٹی ٹوئنٹی کرکٹ ٹورنامنٹ کے لئے پندرہ رکنی پاکستانی اسکواڈ کا اعلان چھ اکتوبر کو کیا جائے گا۔یہ بات قومی سلیکشن کمیٹی کے ممبر سلیم جعفر نے نجی ٹی وی کو بتائی۔ ان کا کہنا تھا کہ سلیکشن کمیٹی چار اکتوبر سے شروع ہونے والے قومی ٹوئنٹی ٹوئنٹی ٹورنامنٹ میں تمام کھلاڑیوں کی پرفارمنس اور فٹنس کا جائزہ لیا جائے گا اورچھ اکتوبر کو حتمی اسکواڈ کا اعلان ہو گا۔ انہوں نے بتایا کہ فاسٹ باﺅلر شعیب اختر ٹورنامنٹ کھیل رہے ہیں، اس لئے انہیں بھی ٹورنٹو ٹورنامنٹ کے لئے حتمی ٹیم میں شامل کیا جاسکتا ہے۔ سلیم جعفر نے بتایا کہ ٹورنامنٹ کیلئے بہترین اور متوازن ٹیم کا انتخاب کیا جائے گا۔
٭٭٭٭٭٭٭٭٭