::: آؤ۔ ۔ ۔ ! ملک کے گلی کوچوں ، چوکوں چوراہوں سے ملک کو بچانے کی تحریک شروع کریں۔ افتخار محمد چوہدری کی اپیل :::

ملک میں جس کی لاٹھی اس کی بھینس کا اندھا قانون ہے

چوراہوں پر لاشے گر رہے ہیں ملک ہم سے قربانی مانگ رہاہے

پولیس تشدد ہمارے حوصلے اور جدوجہد کو دبا نہیں سکتا

آؤ ہم نے 1973ء کا آئین ، قانون و انصاف کی بالادستی کیلئے باہر نکلیں

پولیس ملک کو بچانے کے بجائے میڈیا کے نمائندوں ، وکلاء اورججز کو پکڑنے میں مصروف ہے

معزول چیف جسٹس کی ساتھی وکیل کے ذریعے قوم سے اپیل

اسلام آباد ۔معزول چیف جسٹس ، جسٹس افتخار محمد چوہدری نے قوم سے اپیل کی ہے کہ آؤ! ملک کے گلی کوچوں ، چوکوں چوراہوں سے ملک کو بچانے ،1973ء کے آئین کو اپنی اصل روح کے ساتھ بحال کرنے اور انصاف و قانون کی بالادستی کی تحریک کا آغاز کریں ۔ پولیس اور قانون نافذ کرنے والے اداروں کا تشدد ہمارے حوصلے اور جدوجہد کو دبا نہیں سکتا۔ ملک میں جس کی لاٹھی اس کی بھینس کا اندھا قانون ہے ، چوراہوں پر لاشے گر رہے ہیں ، ملک ہم سے قربانی مانگ رہاہے ۔ انہوں نے یہ اپیل قوم سے آج پیر کو اپنے ساتھی وکیل کے ذریعے ایک ای میل پیغام کے ذریعے کی ہے۔ اپنی اپیل میں معزول چیف جسٹس ، جسٹس افتخار محمد چوہدری نے وکلاء برادری ، سول سوسائٹی ، میڈیا اور سولہ کروڑ عوام سے اپیل کی ہے کہ اس وقت ملک ہم سے قربانی مانگ رہاہے ۔ یہ دھرتی بربریت ، تشدد اور بدامنی کی آماجگاہ چکی ہے ۔ آئے روز ملک میں دھماکے ہو رہے ہیں ، گلی کوچوں ، چوراہوں میں لاشے گر رہے ہیں ۔

ملک میں جس کی لاٹھی اس کی بھینس کا اندھا قانون ہے ، یہا ں کوئی قانون نہیں ، یہاں کوئی آئین نہیں ۔ ایسے میں یہ ملک ، یہ دھرتی ہم سے قربانی مانگ رہی ہے ۔ انہوں نے کہاکہ اس وقت اس ملک میں جدوجہد جاری رکھیں گے جب تک قانون و انصاف اور 1973ء کا آئین اپنی اصل روح کے ساتھ بحال نہیں ہو جاتا ۔ افتخار محمد چوہدری نے کہاکہ اس جدوجہد میں ہمیں پولیس تشدد کا نشانہ بنایا جاتاہے لیکن یہ تشددہمیں اپنی جدوجہد سے نہیں روک سکتا اور نہ ہی ہمارے حوصلے پست کر سکتا ہے انہوں نے کہاکہ پولیس کی طرف سے اس طرح پر امن احتجاجی مظاہرین پر تشد دکھلی بربریت ہے ۔ انہوں نے کہا کہ پر امن احتجاج پاکستان کے ہر شہری کا حق ہے اور انہیں آزادی اظہار رائے کا یہ حق 1973ء کے آئین نے دے رکھا ہے ۔ معزول چیف جسٹس نے ملک کی موجودہ صورتحال کی طرف اشارہ کرتے ہوئے کہاکہ حالیہ ایک ہفتے میں ہی کوئٹہ ، نوشہرہ اورکوہاٹ میں خود کش حملوں میں متعدد افراد اپنی جانیں کھو چکے ہیں لیکن افسوس اس بات کاہے کہ ملک کے حالات کو ٹھیک کرنے کے بجائے پولیس اور امن و امان برقرار رکھنے والے دیگر ادارے اسی انصاف و قانون کیلئے آواز اٹھانے والے خواتین ، مرد ، طلبہ ، وکلاء اور ذرائع ابلاغ کے نمائندوں کو گرفتار کرنے پر معمور ہیں ۔ یہاں چیف جسٹس اور ججوں اور وکلاء کو گرفتار کرنے کیلئے امن وامان برقرار رکھنے والے اداروں اور پولیس کے سینکڑوں اہلکارتو تعینات ہیں لیکن دوسری جانب ان کے قبضے سے ایسے لوگ فرار ہو رہے ہیں جو انتہائی مطلوب ہوتے ہیں لیکن ان کے پہرے کیلئے صرف دو یا تین سپاہی تعینات کئے جاتے ہیں چیف جسٹس نے کہاکہ یہ حکومت کا انتہائی افسوس ناک اقدام ہے جس سے اس کی کمزوری اور خوف واضح نظر آتا ہے انہوں نے سوال کیاکہ آج بھی ملک میں ایسی ہی صورتحال ہے جو پہلے تھی توکیا مارشل لاء اور نام نہاد ایمر جنسی ختم ہو گئی ہے؟