آئندہ وزیر اعظم کافیصلہ پارٹی کرے گی،کسی کو ڈاکٹر قدیر سے تفتیش نہیں کرنے دینگے،شوکت عزیز

وزیراعظم شوکت عزیز نے کہا ہے کہ ملک میں سیاسی ماحول بہتر بنایا جارہا ہے، 60 سال میں پہلی بار کوئی حکومت اپنی مدت پوری کررہی ہے، ملکی خزانہ بھر دیا ہے، اس کا غلط استعمال کرنے نہیں دیا جائے گا، ڈاکٹر قدیر خان نے ملک کو ایٹمی قوت بنانے میں اہم کردار ادا کیا ہے، کسی کو ان سے تفتیش نہیں کرنے دیں گے، آئندہ وزیراعظم کا فیصلہ پارٹی کرے گی، محنت کش اور مزدور ملک کی جان اور شان ہیں ان کی فلاح وبہبود کیلئے تمام ضروری اقدامات کئے جائیں گے۔ وہ جمعہ کو یہاں ریلوے کیرج فیکٹری میں نئی ٹرین ” بھمبور ایکسپریس “ کے افتتاح کے موقع پر خطاب اور بعد ازاں صحافیوں سے گفتگو کرتے ہوئے کیا،اس موقع پر انہوں نے ریلوے فیکٹری کے ملازمین کیلئے 5ہزار روپے الاؤنس کا اعلان بھی کیا۔ وزیراعظم نے کہا کہ ریلوے میں گزشتہ کچھ عرصے کے دوران ایک انقلاب آیا ہے، نئی ٹرینیں چلی ہیں اور ای ٹیکٹنگ کانظام شروع کیا گیا ہے، دو رویہ ٹریک کا افتتاح ہوا ہے۔ انہوں نے کہا کہ 8 سال پہلے جب صدر مشرف برسراقتدار آئے تھے تو پاکستان کو ایک ناکام ریاست قرار دیا جارہا تھا۔ اس وقت خزانہ خالی تھا لیکن ہم نے اپنی بہتر پالیسیوں اور حکمت عملی کی وجہ سے ملکی خزانے کو بھر دیا ہے اور اس وقت تک تمام ڈیمانڈز پوری کی جارہی ہیں۔ انہوں نے کہا کہ ڈاکٹر قدیر خان نے پاکستان کو ایٹمی قوت بنانے میں اہم کردار ادا کیا، ان کی حفاظت کی جائے گی اور کسی کو بھی ان سے تفتیش یا ان تک رسائی کی اجازت نہیں دی جائے گی۔انہوں نے کہا کہ ہمارے ایٹمی اثاثے اپنے دفاع کیلئے ہیں، پاکستان کی عزت اور بقا کی حفاظت ہم پر فرض ہے جس کے لئے کسی قربانی سے دریغ نہیں کیا جائے گا۔ انہوں نے کہا کہ ہماری کوشش ہے کہ ملک میں بہترسیاسی ماحول پیدا کیاجائے، عوام کو سوچ سمجھ کر ووٹ ڈالنا چاہئے اور وہ ایسے لوگوں کا انتخاب کریں جو ذاتی مفادات کی بجائے قومی مفادات کے لئے کام کررہے ہوں اس سے ملک مزید ترقی کرے گا۔ بعد ازاں ایک سوال کے جواب میں وزیراعظم نے کہا کہ آئندہ وزیراعظم کون ہوگا اس بات کا فیصلہ پاکستان مسلم لیگ ہی کرے گی۔ اس موقع پر وزیراعظم نے ریلوے کیرج فیکٹری کے ملازمین کو پانچ پانچ ہزار روپے کا خصوصی الاؤنس دینے کا بھی کیا۔قبل ازیں وفاقی وزیرریلوے شیخ رشید احمد نے خطاب کرتے ہوئے کہا کہ بھمبورایکسپریس کا راولپنڈی سے کراچی تک کا کرایہ555 روپے اور برتھ کے ساتھ 580 روپے ہوگا۔ انہوں نے کہا کہ موجودہ حکومت کی پالیسیوں کی وجہ سے ریلوے نے ریکارڈ ترقی کی ہے اور جب سے میں نے ریلوے کا قلمدان سنبھالا ہے آج 24 ویں ٹرین کا افتتاح ہورہا ہے اس کے علاوہ 10 فریٹ ٹرینیں بھی چلائی جارہی ہیں۔ انہوں نے کہا کہ آئندہ کوئی مسافر ٹرینوں کی چھت پر بیٹھ کر سفر نہیں کرے گا اگر ایسا ہوا تواسٹیشن ماسٹر کے خلاف کارروائی ہوگی، ہم نے ریلوے ملازمین کی تنخواہیں اورا سکیل بڑھا دیئے ہیں۔60 سال میں یہاں پر سیاست ہی ہوتی رہی ہے، ہم نے پہلی بار کام کیا ہے۔

بشکریہ
جنگ

__________________