اسلام آباد (مانیٹرنگ سیل) ایمرجنسی اٹھانے اور ترمیم شدہ آئین کی بحالی کیلئے مختلف تجاویز پر غور کیا جا رہا ہے، جیو کے مطابق اعلیٰ عدلیہ کے ججز کے احتساب کے لئے آئین کے آرٹیکل 209 میں ترمیم کی جا رہی ہے، جس کے تحت سپریم کورٹ کے ججوں کے ساتھ ساتھ لفظ چیف جسٹس آف پاکستان کو بھی شامل کر دیا جائے گا اور اِس کے تحت صدر کو اب یہ اختیار ہو گا کہ وہ کسی جج کے خلاف سپریم جوڈیشل کونسل کی مشاورت سے ریفرنس داخل کرنے کی صورت میں اس جج کو جبری رخصت پر بھیج سکیں گے۔ ہائی کورٹ کے ججز کی تقرری کے لئے عمر کی حد 45 سال سے کم کر کے 40 سال کرنے کی تجویز پر غور ہو رہا ہے۔ ذرائع کے مطابق ایوانِ صدر میں 15 دسمبر کو ایمرجنسی اٹھانے کے عبوری آئینی ترمیمی حکم نمبر 2 کے مسودے کو حتمی شکل دی جا رہی ہے۔ یہ حکم ایمرجنسی اٹھانے اور پی سی او کو منسوخ کرنے کا ترمیمی عبوری حکم 2007ء کہلائے گا جس کے تحت آئین کے آرٹیکل 41-3 میں بھی ترمیم کی جا رہی ہے، جس کے تحت صدارتی انتخاب مدت ختم ہونے سے پہلے بھی کروایا جا سکتا ہے اور صدارتی انتخابات کے لئے آرٹیکل 41-3 میں جو مدت پہلے طے تھی، اس کے الفاظ کو 17 اگست 1988ء سے ختم کرنے کی تجویز پر بھی غور کیا جا رہا ہے، اس طرح صدارتی امیدوار کی اہلیت سے متعلق آرٹیکل 44 کی ذیلی دفعہ 2 میں تبدیلی کی جا رہی ہے مزیدبراں اسلام آباد ہائیکورٹ کی تشکیل کی ترمیم بھی زیرغور ہے۔

__________________