اسلام آباد(جنگ نیوز) پیپلز پارٹی کی چیئرپرسن بینظیر بھٹو نے کہا ہے کہ صدر پرویز نے ہمارے بہت سے مطالبات مان لئے ہیں، الیکشن میں احتجاج کے طور پر حصہ ضرور لیں گے تاہم بائیکاٹ کا آپشن بھی کھلا ہے، آئین کے ساتھ ہی معزول جج بھی بحال ہو جائیں گے، صدر کے بعض قریبی لوگ انہیں دھاندلی کے نئے منصوبے پیش کر رہے ہیں، وہ جمعرات کو دربار عالیہ گولڑہ شریف میں حاضری کے بعد اخبار نویسوں سے بات چیت کر رہی تھیں۔ اس موقع پر ناہید خان، راجہ پرویز اشرف، چوہدری یٰسین، فرحت الله بابر، شیری رحمن، زمرد خان اور دیگر پارٹی رہنما بھی موجود تھے۔ بینظیر بھٹو نے کہا کہ صدر پرویز مشرف نے وردی اتارنے، الیکشن شیڈول کا اعلان کرنے اور ایمرجنسی کے خاتمے کی تاریخ دینے سمیت ہمارے بیشتر مطالبات مان لئے ہیں، اسلئے پیپلز پارٹی احتجاجاً انتخابات میں حصہ لے گی تاہم ہم ابھی تک مزید مطالبات لا رہے ہیں، چارٹر آف ڈیمانڈ کی تیاری کے بعد مزید مطالبات بھی پیش کریں گے اور ہمیں توقع ہے کہ ہمارے بیشتر مطالبات پر ضرور عملدرآمد کیا جائے گا۔ انہوں نے کہا کہ صدر پرویز مشرف کے قریب لوگ دھاندلی کا منصوبہ بنا رہے ہیں لیکن پیپلز پارٹی عوامی طاقت اور بھرپور عوامی حمایت سے سیاسی مخالفین کے منفی مقاصد پورے نہیں ہونے دے گی۔ انہوں نے کہا کہ ہمارے مخالفین سیاسی وسائل استعمال کر رہے ہیں، ڈی پی اوز کو ہدف دیا گیا ہے کہ اگر وہ اپنے عہدوں پر قائم رہنا چاہتے ہیں تو یہ اہداف پورے کریں۔ انہوں نے کہا کہ دھاندلی کے منصوبوں کے سلسلہ میں وجود نہ رکھنے والے پولنگ بوتھ اور کسی انتظام اور قاعدے کے بغیر پولنگ بوتھ قائم کرنے کے انتظامات کئے جا رہے ہیں جن کے ذریعے ہمارے مخالفین کو جعلی ووٹوں کے ذریعے کامیاب کرانے کی کوشش کی جائے گی۔ انہوں نے کہا کہ ہر حلقے میں 20، 20 ہزار اضافی بیلٹ پیپرز کی فراہمی بھی انتخابات میں دھاندلی کی حکومتی پالیسیوں کا حصہ ہے۔ انہوں نے کہا کہ انتخابات شفاف بنانے کیلئے انتظامات کئے جائیں۔ انتخابی عمل شفاف نہ بنایا گیا تو ہم نے بائیکاٹ کا آپشن ابھی تک کھلا رکھا ہوا ہے۔ انہوں نے کہا کہ تمام سیاسی جماعتوں سے مشاورت کا عمل جاری ہے اور حتمی فیصلے مشاورت سے کئے جائیں گے۔

__________________