لیفٹیننٹ جنرل پاشا کا یہ دورہ انٹیلی جنس کے معاملات سے متعلق ہے
پاکستان کے جوائنٹ چیفس آف سٹاف جنرل خالد شمیم وائیں اور امریکی سینٹرل کمانڈ کے سربراہ جنرل جیمز میٹِس کے درمیان منگل کو اسلام آباد میں ملاقات کے بعد پاکستانی خفیہ ادارے آئی ایس آئی کے سربراہ لیفٹیننٹ جنرل احمد شجاع پاشا بدھ کو امریکہ روانہ ہوگئے ہیں۔
اس ایک روزہ دورے کے دوران توقع ہے کہ پاکستان کے اعلیٰ ترین انٹیلی جنس ادارے آئی ایس آئی کے سربراہ امریکہ میں فوجی اور انٹیلی جنس حکام سے ملاقاتیں کریں گے جس میں دہشتگردی کے خلاف جنگ میں تعاون اور آٹھ سو ملین ڈالر کی امریکی فوجی امداد کی معطلی پر بات ہونے کے امکانات ہیں۔

تاہم ان کے اس دورے کے بارے میں سرکاری طور سے کسی ایجنڈے کا اعلان نہیں کیا گیا ہے۔ ان کے اس دورے کو امریکہ کی جانب سے پاکستان کی فوجی امداد کی معطلی کے اعلان کے بعد پاک امریکہ عسکری تعلقات کے تناظر میں بہت اہمیت دی جا رہی ہے۔

ایبٹ آباد میں القاعدہ کے سربراہ اسامہ بن لادن کی امریکی فوجی کمانڈوز کی کارروائی میں ہلاکت کے بعد پاکستانی خفیہ ایجنسی کے سربراہ کا یہ امریکہ کا پہلا دورہ ہے۔

پاکستانی فوج کے تعلقات عامہ کے شعبے آئی ایس پی آر کے اعلان کے مطابق، امریکی سنیٹرل کمانڈ کے جنرل میٹِس اور جنرل وائن کے درمیان منگل کو باہمی امور پر تبادلۂ خیال ہوا۔

انتہائی مختصر عبارت کے حامل اس پریس ریلیز میں اس بات کا ذکر نہیں کیا گیا کہ آیا دہشت گردی کے خلاف جنگ میں دونوں ممالک کے درمیان کشیدگی کو کم کرنے یا امریکی فوجی امداد کی معطلی پر دونوں فوجی رہنماؤں کے درمیان بات چیت ہوئی یا نہیں۔

اگر امریکہ رقم دینے سے انکار کرتا ہے تو پھر پاکستان سرحدوں سے فوج واپس بلالے گی۔ہم اتنے لمبے عرصے تک پہاڑی علاقوں میں اپنی فوجیں رکھنے کے متحمل نہیں ہوسکتے۔

احمد مختار

واضح رہے کہ امریکہ نے دو روز قبل ہی پاکستان کی فوجی امداد میں کمی کرنے کا اعلان کیا تھا اور اب اس نے اس امداد کو پاکستان کے قبائلی علاقوں میں القاعدہ، طالبان اور ان کے ہمدردوں کے خلاف کارروائی سے مشروط کر دیا ہے۔

امریکی امداد کی معطلی کے اعلان پر پاکستانی فوج اور حکومت کی جانب سے دو مختلف ردعمل سامنے آئے ہیں۔

پاکستانی فوج نے دہشتگردی کے خلاف جنگ کو اپنے وسائل سے جاری رکھنے کا اعلان کیا ہےاور کہا ہے کہ امریکی امداد رک جانے سے فوج کی دہشت گردی کے خلاف جنگ لڑنے کی صلاحیت میں کمی واقع نہیں ہو گی۔

منگل کو راولپنڈی میں پاکستانی بری فوج کے سربراہ جنرل اشفاق پرویز کیانی کی صدارت میں ہونے والے کور کمانڈروں کے اجلاس میں اس عزم کا اظہار کیا گیا کہ اپنے وسائل سے ہی دہشتگردی کے عفریت سے نمٹا جائے گا۔

تاہم پاکستان کے وزیرِ دفاع نے امریکہ کو متنبہ کیا ہے کہ اگر امریکہ نے جنگ پر اٹھنے والے اخراجات ادا نہ کیے تو پاکستان مغربی سرحد سے اپنی فوج واپس بلا لے گا۔

منگل کو ہی پاکستان کے نجی ٹی وی چینل ایکسپریس ٹونٹی فور سیون کو دیے گئے ایک انٹرویو میں انہوں نے کہا تھا کہ اگر پاکستان کی مشکلات بڑھتی ہیں تو ہم اپنی تمام فوجیں واپس بلا لیں گے۔’ہم ایسے نہیں بیٹھیں گے۔ اگر ہمارے لیے مشکلات بڑھتی ہیں تو ہم اپنی تمام فوجیں واپس بلالیں گے۔‘

پاکستان وزیر دفاع نے کہا کہ امریکہ سےجو رقم پاکستان کو ملنی ہے وہ شدت پسندی کےخلاف لڑائی جاری رکھنے کے لیے نہیں بلکہ پاکستان کے اخراجات کی ادائیگی ہے۔

انہوں نے کہا کہ اگر امریکہ رقم دینے سے انکار کرتا ہے تو پھر پاکستان سرحدوں سے فوج واپس بلالے گی۔’ہم اتنے لمبے عرصے تک پہاڑی علاقوں میں اپنی فوجیں رکھنے کے متحمل نہیں ہوسکتے۔‘

خبر

__________________
بیاض کمبوہ پڑھنے کے لیے ایڈریس بار میں ٹائپ کریں،
biazekamboh.co.cc