عالمی مالیاتی فنڈ کے پاکستان میں مذاکرات کے لئے آئے ہوئے وفد نے پاکستان کو دی جانے والی چھٹی قسط کو اصلاحات شدہ جنرل سیلز ٹیکس ریفارم (جی ایس ٹی) کے مسودہ کی پارلیمنٹ میں منظوری کے لئے پیش کرنے سے مشروط کرتے ہوئے کہا ہے کہ 1ارب70کروڑ ڈالر کی چھٹی قسط کی ادائیگی پاکستان کو اسی صورت کی جائے گی جب تک اصلاحات شدہ (جی ایس ٹی) کا مسودہ پارلیمنٹ میں منظوری کے لئے پیش نہیں کیا جاتا' چھ روز سے جاری مذاکرات میں بجلی پر سبسڈی ختم کرنے۔ ٹیکس اصلاحات پر فوری عمل درآمد اور دیگر امور زیر بحث آئے جس کے ساتھ رواں سال حکومت نے 17فیصد بجلی کی قیمت میں اضافے کا آئی ایم ایف کو گرین سگنل دے دیا ہے جس کے باعث بجلی پرسبسڈی ختم کرتے ہوئے بجلی کے ٹیرف میں ہر ماہ دو فیصد اضافہ کیا جائے گا۔ وزیر خزانہ عبدالحفیظ شیخ نے کہا کہ جنرل سیلز ٹیکس کا مسودہ پارلیمنٹ کے اسی اجلاس میں پیش کیا جائے گا تاکہ آئی ایم ایف سے چھٹی قسط کا اجراء ممکن ہوسکے۔
آئی ایم ایف ورلڈ بنک اور دیگر عالمی مالیاتی اداروں نے غریب ممالک' باالخصوص اسلامی دنیا کو لوٹنے کیلئے ایک ایسا خطرناک جال بچھا رکھا ہے کہ جو اس جال میں ایک دفعہ الجھ جائے اس کا صحیح سلامت باہر نکلنا محض ایک خواب ہے۔
یہ ادارے بظاہر تو غریب ممالک کو امداد دیتے ہیں لیکن درحقیقت یہ امداد کے نام پر ان غریب ممالک کو اپنے دام میں پھنسا کر اپنے مفادات حاصل کرتے ہیں اور سود در سود جو رقم امداد کے طور پر دی جاتی ہے اس سے کئی گنا زیادہ وصول کرکے معیشت کا بھٹہ بھٹا دیا جاتا ہے ۔یہ ادارے ایسی شرائط عائد کرتے ہیں کہ اگر غریب ممالک کی حکومتیں یہ شرائط پوری نہیں کرتیں تو امداد نہیں دی جاتیں اور اگر شرائط قبول کرلیں تو ملکی معیشت کے ساتھ ساتھ غریب عوام پر مہنگائی کا بوجھ بڑھتا ہے۔ اکثر حکمران اپنے اقتدار کو بچانے کے لئے شرائط قبول کرلیتے ہیں اور اپنے عوام کے منہ سے روٹی کا نوالہ بھی چھین لیتے ہیں یہی کچھ ہمارے ساتھ ہو رہا ہے۔ ایک طرف امریکہ کی شروع کردہ (مفاداتی جنگ) دہشت گردی کے خلاف جنگ نے ہمارے امن و امان سے لے کر معیشت تک کو برباد کر رکھا ہے اور دوسری طرف آئی ایم ایف جیسے سودی ادارے کی شرائط پوری کرتے کرتے حکمرانوں نے غریب عوام کو زندہ درگور کر دیا ہے۔گزشتہ ڈھاٹی برسوں میں عوام کے ساتھ جو حشر کیا گیا ہے اس کی تاریخ میں کوئی مثال موجود نہیں' اب تو حالت یہ ہے کہ مہنگائی کے جن نے غریب طبقے کو نگلتے نگلتے رخ امیر لوگوں کی طرف بھی کر دیا ہے ۔اس صورتحال میں ہر طرف سے ہائے مہنگائی ہائے مہنگائی کی آوازیں سنائی دے رہی ہیں مگر ستم یہ کہ یہ سلسلہ کہیں بھی رک نہیں رہا ہے۔ یوں محسوس ہوتا ہے کہ ہماری حکومت اور آئی ایم ایف نے پکا ارادہ کرہی لیا ہے کہ پاکستان کے تمام غریبوں سے چھٹکارا پانا ہے۔ کاش کہ ہمارے حکمران آئی ایم ایف کی ان کڑی شرائط کو قبول کرکے عوام کو زندہ درگور کرنے کی بجائے اپنے انداز حکمرانی میں تبدیلی لاتے ہوئے ملکی وسائل کو بروئے کار لاتے تو ہمیں بھیک مانگنی نہ پڑتی اور ایک عوامی حکومت اس طرح غیر مقبول نہ ہوتی کہ ہر آدمی چیخ رہا ہے کہ عوامی حکومت نے عوام کا جینا دوبھر کر دیا ہے۔
حکومتی اقدامات اور آئی ایم ایف کی شرائط قبول کرکے محض ڈنگ ٹپائو پالیسی نے مہنگائی' بے روزگاری ' احساس محرومی اور غربت بڑھانے کے ساتھ ساتھ عوام میں غم و غصہ کی جو لہر پیدا کی ہے اگر اس پر توجہ نہیں دی گئی تو دانشور اور ماہرین معاشیات اب کھل کر اس طرف اشارہ کر رہے ہیں کہ ملک خونی انقلاب کی طرف بڑھ رہا ہے' سوال یہ ہے کہ کیا ہمارے حکمرانوں کو بھی ان حالات کا ادارک ہے کہ ان کی پالیسیوں سے ملک کے عوام کی کیا حالت ہوئی ہے اور اس کے نتائج کس قدر بھیانک ہوسکتے ہیں ۔ شاید ہمارے حکمرانوں کو سب ٹھیک نظر آرہا ہے یہی وجہ ہے کہ عوام چیخ رہے ہیں' عالمی ادارے واویلا کر رہے ہیں کہ پاکستان کی معیشت اگر درست نہیں ہوئی تو حالات خراب ہوسکتے ہیں لیکن حیرت ہے کہ حکومتی حلقوں میں چین کی بانسری بجائی جارہی ہے۔ ستم یہ کہ حکومتی اخراجات کا بھی سارا بوجھ عوام پر لاد دیا گیا ہے۔ حکمرانوں کے اللے تللے پہلے سے بھی بڑھ چکے ہیں۔ وزراء کی تعداد روز بروز بڑھ رہی ہے۔ چند ایک کے سوا کئی وزراء مال بنائو مہم میں مصروف عمل ہیں۔ کرپشن اور بدعنوانی کی خبریں اب عام ہوچکی ہیں۔ ٹرانسپرنسی انٹرنیشنل کی رپورٹ پر غور کرتے ہوئے کرپشن کی روک تھام کے لئے اقدامات کرنے کی بجائے اس کے خلاف قرار دادیں پاس ہو رہی ہیں۔ حکومت نے اپنی تمام مالی پریشانیوں کا ایک ہی حل ڈھونڈ نکالا ہے کہ بجلی کی قیمتیں بڑھا دو کبھی پٹرولیم مصنوعات اور گیس کی قیمتوں میں اضافہ کرو اور اب جی ایس ٹی ٹیکس کے ذریعے آئی ایف ایم کی شرائط پوری کرکے عوام کو زندہ درگور کرکے رقم حاصل کرو اور اپنے پانچ سال پورے کرو' سوال یہ ہے کہ یہ سلسلہ کب تک یونہی چلتا رہے گا اور کب تک عوام برداشت کرتے رہیں گے اور جس دن عوام کے صبر کا پیمانہ لبریز ہوگا اس کے بعد کیا ہوگا اس حوالے سے کسی نے سوچا ہے ؟
یقیناً حالات اس نہج تک پہنچے ہیں کہ اگر حکومت نے عوام کو مہنگائی کے بوجھ تلے دبانے کا سلسلہ ترک نہ کیا اور طرز حکمرانی تبدیل نہیں کیا تو حالات وہ رخ اختیار کرسکتے ہیں کہ سنبھالنا کسی کے بس میں نہیں ہوگا۔
ضرورت اس امر کی ہے کہ نہ صرف حکومتی اکابرین بلکہ تمام سیاسی جماعتوں کے قائدین سرجوڑ کر یہ فیصلہ کریں کہ ان بحرانوں سے ہم نے کس طرح نکلنا ہے یقیناً صرف حکومت اکیلے ان مسائل پر قابو نہیں پاسکتی اس لئے تمام سیاسی جماعتیں بھی اپنا کردار ادا کرتے ہوئے ایک طرف حکومت پہ دبائو بڑھائیں کہ وہ انقلابی تبدیلیاں لائے اور دوسری طرف معاشی بحران سے نکلنے کے لئے حکومت کا بھرپور ساتھ دیا جائے۔ سیاسی جماعتوں سے ہم کہنا چاہتے ہیں کہ خدا را اپنی اپنی باریوں اور حکومت کو گرانے کی کوششیں کرنے کی بجائے اس غریب عوام کا بھی سوچیں جو آپ کو اقتدار کے ایوانوں تک پہنچاتے ہیں۔

__________________
جاویداسد