لندن ( جنگ نیوز) فیڈریشن آف انٹرنیشنل کرکٹرز ایسوسی ایشن(فیکا) نے کہا ہے کہ ناقص کارکردگی اور بھارتی کرکٹ بورڈ کی جانب سے فیصلے نہ ماننے کے واقعات کے سبب انٹرنیشنل کرکٹ کونسل کو کھلاڑیوں کی جانب سے بغاوت کا سامنا کرنا پڑسکتا ہے جبکہ تنظیم کے چیف ایگزیکٹیو ٹم مے نے خبردار کیا ہے کہ پیسوں کی عدم ادائیگی اور دیگر مسائل حل نہ ہونے کی وجہ سے سینٹرل کنٹریکٹ پانے والے کھلاڑی اپنے معاہدے چھوڑ کر انڈین پریمےئر لیگ کارخ کرسکتے ہیں ۔فیکا کے قانونی مشیر ای ین اسمتھ کا کہنا ہے کہ آئی سی سی کو بے شمار مسائل کا سامنا ہے لیکن وہ انہیں حل کرنے سے قاصر ہے، انہوں نے اس بات کا عندیہ بھی دیا کہ آئندہ ماہ ٹیکساس میں ہونے والی ورلڈ کانگرس آئی سی سی حکام کیخلاف تحریک عدم اعتماد ثابت ہوسکتی ہے۔ انہوں نے کہا کہ ویسٹ انڈیز اور بھارت میں ہونے والی لیگز نے کھلاڑیوں کو اپنی قدر ومنزلت سے آگاہ کردیا ہے، ان کا خیال ہے کہ وہ خود ہی کرکٹ کے انتظامی امور کی دیکھ بھال کرنے کے پوری طرح اہل ہیں، لہٰذا آئی سی سی کی جانب کیوں دیکھا جائے۔

__________________