آئی پی ایل کی افتتاحی تقر یب بھی شاندار رہی ،رقص وموسیقی اور آتش بازی نے لوگوں کو دیوانہ کر دیا
کراچی (جنگ نیوز)انڈین پریمئر لیگ (آئی پی ایل)کا رنگا رنگ خوبصورت آغاز شائقین کرکٹ کے ساتھ ہر ایک کیلئے انتہائی پرکشش، یادگار اور شاندار رہا۔پہلے میچ کے آغاز سے قبل بنگلور کے چنا سوامی اسٹیڈیم میں منعقدہ رنگارنگ افتتاحی تقریب ایونٹ کا خاصہ تھی جس میں مختلف فنکاروں اورگلوکاروں نے شاندار پرفارمنس کا مظاہرہ کرکے شائقین کے دل موہ لئے۔ جیو سوپر نے میچ سے قبل افتتاحی تقریب کے حسین و رنگین لمحات ناظرین تک براہ راست پہنچائے۔ اس شاندار تقریب کے دوران اسٹیڈیم میں رقص و موسیقی، آتشبازی اور خوبصورت نغموں نے لوگوں کو اتنا دیوانہ کردیا کہ سارا وقت اسٹیڈیم خیر مقدمی نعروں اور تالیوں سے گونجتا رہا۔ افتتاحی تقریب منی اولمپکس کی تقریب سے کم نہیں تھی، تمام ٹیموں کے کپتان جب اپنی ٹیم کے جھنڈے کے ساتھ اسٹیج پر آئے تو بھرپور خیرمقدمی نعروں میں ان کا استقبال کیا گیا۔ ہر کپتان اپنے نام کے اعلان پر اسٹیج تک آتا تو تماشائیوں نے زبردست انداز میں اس کا استقبال کیا۔واضح رہے کہ پاکستان میں آئی پی ایل کے میچز دکھانے کا اختیار صرف جیو سوپر کے پاس ہے ۔

__________________