کراچی (جنگ نیوز)آج لاکھوں فرزندان توحید فریضہ حج کررہے ہیں۔ اسلام کے پانچویں رکن کے روح پرور موقع پر ”جیو “ کے مذہبی شعبہ امور نے خصوصی نشریات تیار کی ہیں جو بدھ 18 دسمبر کو حج کے رکن اعظم عرفہ سے قبل جیو ٹی وی سے نشر کی جائیں گی۔ ”حاضر ہیں تیرے دربار میں ہم“ کے عنوان سے اس خصوصی نشریات میں مختلف پروگرام پیش کیے جائیں گے جن میں ملک کے ممتاز علمائے کرام کی بصیرت افروز گفتگو سے سجا ہوا پروگرام ”عالم آن لائن“ بھی شامل ہے۔ ایسے افراد جو اس سال زیارت حرم سے محروم رہے، ان کے جذبات و احساسات کی ترجمانی ”جو حج پر نہ جاسکے“ میں کی جائے گی جبکہ مسلمانوں کیلئے دستور حیات ”خطبہ حجة الوداع سے اقتباس“ ممتاز براڈ کاسٹر شمشاد خان کی آواز میں نشر کیا جائے گا۔ ٹرانسمیشن کا سب سے اہم پروگرام ”نبی کریم صلی اللہ علیہ وآلہِ وسلم کا حج “ ہے جس میں ناظرین یہ جان سکیں گے کہ ختمی مرتبت احمد مجتبیٰ صلی اللہ علیہ وآلہِ وسلم نے حج کس طرح ادا فرمایا، کس تاریخ کو روانہ ہوئے، کب ذوالحلیفہ پہنچے، احرام کب اور کیسے باندھا اور منازل سفر کیسے طے فرمائیں؟۔ صبح 11 بجے سے دوپہر 2بجے تک جاری رہنے والی ان نشریات میں وقفے وقفے سے تلاوت قرآن مجید، حمد باری تعالیٰ، نعت رسول مقبولﷺ اور معلوماتی سلائیڈز بھی پیش کی جاتی رہیں گی۔ پاکستان میں کیبل پر جیو کی نشریات پر پابندی کی وجہ سے ناظرین یہ نشریات ڈش انٹینا کے ذریعے ملاحظہ کرسکیں گے۔پروگرام کے ایگزیکٹیو پروڈیوسر ڈاکٹر عامر لیاقت حسین ہیں۔ پروگرام شام 6 بج کر 5 منٹ پر دستاویزی فلم ”حاضر ہیں تیرے دربار میں ہم“ نشر کی جائے گی جبکہ ناظرین رات 8 بج کر 5منٹ پر پروگرام ”نبی کریم صلی اللہ علیہ وآلہِ وسلم کا حج “ دیکھ سکیں گے۔

__________________