لاہور ۔۔۔۔۔۔ پاکستان ریلویز نے 27دسمبر کو منسوخ ہونے والی ٹرین سروس کو گزشتہ روز کوئٹہ کے لئے بحال کر دیا۔ کوئٹہ سے پشاور کے لئے کوئٹہ ایکسپریس اور موسم سرما ایکسپریس کوئٹہ سے روانہ ہوئیں جبکہ پشاور سے کوئٹہ کے لئے بھی کوئٹہ ایکسپریس روانہ ہوئی ۔اس کے علاوہ گزشتہ روز ٹنڈو آدم تک ریلوے ٹریک کی بحالی کے بعد روہڑی تک شٹل سروس بھی شروع کر دی گئی ہے۔ ٹنڈو آدم سے کراچی تک ٹریک وغیرہ کی بحالی کے لئے تیزی سے کام جاری ہے جس کی نگرانی شعبہ کے اعلیٰ افسران کر رہے ہیں۔ امید ظاہر کی جا رہی ہے کہ آج کسی وقت کراچی کے لئے ٹرین سروس بحال کر دی جائے گی۔ کراچی سے اپ ٹریک کی بحالی کے بعد گزشتہ روز ایک آئل سپیشل ٹرین کراچی سے بالائی حصہ کو روانہ کی گئی جس کے آگے پائلٹ انجن بھی تھے۔