21ستمبر 2010

نیویارک(مانیٹرنگ ڈیسک)آج دنیا بھر میں بھولنے کی بیماری ’الزائمر ‘سے آگاہی کا عالمی دن منایا جا رہا ہے۔بھولنے کی بیماری الزائمر ڈیمینشیا ءکی سب سے بڑی قسم ہے۔ طبی ماہرین کے مطابق الزائمر میں مبتلا مریضوں کے دماغ کے خلیے ختم ہونا شروع ہو جاتے ہیں اور دوبارہ نئے خلیے نہ بننے کی وجہ سے یاداشت کے ساتھ ساتھ سوچنے کی صلاحیتیں اور دیگر معمولات متاثر ہوتے ہیں۔ 65 سال سے زائد عمر کے مرد اور خواتین اس بیماری کا زیادہ شکار ہوتے ہیں جبکہ یہ بیماری موروثی بھی ہو سکتی ہے۔اس وقت دنیا میں تین کروڑ 40 لاکھ جبکہ پاکستان میں دس لاکھ افراد اس بیماری میں مبتلا ہیں۔الزائمر کے مریض عام طور پر انجانے خوف، بوکھلاہٹ اور بد گمانی کا شکار رہتے ہیں۔ ابھی تک الزائمر کا مکمل علاج دریافت نہیں ہو سکا البتہ ایسی ادویات ضرور موجود ہیں جوالزائمر کے اثرات کو کم کر دیتی ہیں۔طبی ماہرین کا کہنا ہے کہ الزائمر لاعلاج مرض ہے تاہم ایسے افراد پر توجہ دینے سے ان کی طرز زندگی میں قدرے بہتری لائی جا سکتی ہے۔ اس بیماری سے آگاہی بھی بہت ضروری ہے تاکہ بروقت تشخیص کے بعد مریض پر اس کے مطابق توجہ دی جا سکے۔

__________________
جاویداسد