پندرہ سال کی تگ و دو کے بعد اقوام متحدہ کی منظوری سے آسٹریلیا نے اپنی سمندری تہہ کی حدود میں مزید ڈھائی ملین مربع کلومیٹر کا اضافہ کر لیا ہے۔
اس اضافے سے آسٹریلیا کی سمندری حدود میں جزیرے کی مغربی، جنوبی اور مشرقی جانب کے علاوہ قطب جنوبی کے میکوئری اور ہرڈ جزیرے جیسے علاقوں کی جانب دو سو ناٹیکل میل کا اضافہ ہوا ہے۔

اس اضافے سے آسٹریلیا کی حدود فرانس کے مجموعی رقبے سے پانچ گنا زیادہ ہ ہو گئی ہیں اور آسٹریلیا ان نئے علاقوں میں تیل اور معدنیات تلاش کرے گا۔ ان نئے علاقوں میں سے چند قطب جنوبی میں ہیں لیکن آسٹریلیا کے معدنی وسائل کے وزیرکا کہنا ہے کہ وہ قطب جنوبی میں کوئی مہم جوئی نہیں کریں گے۔

وزیر مارٹن فرگوسن نے کہا ’مجھے یہ بتاتے ہوئے خوشی ہو رہی ہے کہ دنیا کا سب سے بڑا جزیرے آسٹریلیا کے رقبے میں ایک بڑا اضافہ ہوا ہے‘۔ انہوں نے بتایا کہ آسٹریلیا کا نیا رقبہ نیوزی لینڈ سے دس گنا اور برطانیہ سے بیس گنا زیادہ ہے۔

ان کا کہنا تھا کہ اس وقت وہ نہیں بتا سکتے کہ اس نئے علاقے میں کتنے قدرتی وسائل موجود ہیں۔ ’سچ تو یہ ہے کہ یہاں پر دریافت کی کوشش نہیں کی گئی۔ ہمیں نہیں پتہ کہ یہاں کتنی مقدار میں قدرتی وسائل موجود ہیں‘۔

فرگوسن کا کنا تھا کہ آسٹریلیا کے لیے ضروری ہے کہ ان علاقوں میں دریافت کا کام شروع کیا جائے اس لیے کہ اسے تیل کی ضرورت ہے۔

آسٹریلیا نے اقوام متحدہ کے سمندری قوانین کے تحت ان علاقوں کو حاصل کیا ہے۔

__________________