ہیٹرک

لاہور(نمائندہ جسارت)امیر جماعت اسلامی پاکستان سید منور حسن نے کہاہے کہ آصف زرداری نے اپنی بات سے مکر جانے کی ہیٹرک مکمل کر لی ‘ ماہ رمضان میں پرویز مشرف کو محفوظ راستہ دینے کے معاہدہ کا اعلان ایوان صدر میں صحافیوں کے سامنے کیاتھا‘ اس سے قبل وہ معاہدہ بھور بن اور معاہدہ اسلام آباد سے مکر چکے ہیں‘ صدارتی ترجمان اس سچ کی تردید کر کے زرداری کے بیان کو جھوٹا ثابت کرنے کی ناکام کوشش کر رہے ہیں ‘ آصف زرداری نے ایک معاہدے کے تحت پرویز مشرف کو محفوظ راستہ دیا اور اپنے لیے ایوان صدر میں جگہ بنائی‘ پرویز مشرف کو پورے پروٹوکول کے ساتھ ایوان صدر سے رخصت کیا ۔ ان خیالات کااظہار انہوں نے جامع مسجد منصورہ میں تیسویں سالانہ دورہ ¿ تفسیر قرآن کریم کی اختتامی تقریب سے خطاب کرتے ہوئے کیا ۔ اس 40 روزہ دورہ تفسیر قرآن میں ملک بھر سے سیکڑوں مرد و خواتین نے شرکت کی ۔ سید منور حسن نے کہاکہ پیپلز پارٹی کی حکومت نے عوام کو ریلیف دینے کے بجائے انہیں مہنگائی کے غار میں دھکیل دیاہے‘ آٹے کے حصول کے لیے لوگ لمبی لائنوں میں لگے ہوئے ہیں‘ کئی آٹا لینے کے بجائے موت کے منہ میں چلے گئے ہیں ‘ پوری دنیا میں پاکستان کا مذاق بناہواہے‘ روٹی کپڑا مکان دینے کے دعوے پر بر سراقتدار آنے والوں کے لیے یہ ڈوب مرنے کا مقام ہے ‘حکمران اپنے مفادات سمیٹنے میں لگے ہوئے ہیں ‘قومی وقار اور عزت امریکا کے ہاتھ ڈالروں کے بدلے گروی رکھ دی گئی ہے ‘ حکمرانوں کو عوام اور غریب آدمی کے مسائل سے کوئی دلچسپی نہیں ‘حکمرانوں نے امریکا کے بعد اب بھارت کے آگے جھکنا شروع کر دیا ہے‘ اسلام آباد میں بھارتی سفارتخانے کو زمین الاٹ کرنے سے پاکستان میں بھارتی مداخلت مزید بڑھے گی‘ بھارتی سفارتخانے کی توسیع سے ”را “کے ایجنٹوں کی آمد بڑھ جائے گی ۔ سید منور حسن نے کہاکہ حکومت نے آئین کی خلاف ورزی پر صوفی محمد کو تو گرفتار کیاہواہے لیکن پرویز مشرف کو جس نے دو مرتبہ آئین توڑا ،پروفیسر بنا کر لندن اور امریکا روانہ کر دیاہے ‘ملک کے 71 فیصد عوام پرویز مشرف کا احتساب چاہتے ہیں لیکن این آر او کے تحت بیرون ملک کرپشن کے مقدمات معاف کرانے والے حکمران مشرف کے ٹرائل کے بجائے اس کی ملک دشمن پالیسیوں کو طول دے رہے ہیں ۔ انہوں نے کہاکہ امریکا کے کئی تھنک ٹینکس خود کہہ رہے ہیں کہ امریکا کو افغانستان میں شکست کاسامناہے‘ امریکا اس ناکامی کی خفت مٹانے کے لیے یہ جنگ پاکستان منتقل کرنا چاہتاہے جس کے لیے سفارتخانے کی توسیع اور میرینز کو پاکستان میں تعینات کیاجارہاہے‘امریکا سفارتخانے کی آڑ میں امریکی چھاﺅنی بنارہاہے اور دوسرا گوانتاناموبے بھی تعمیر کر رہاہے‘ پاکستان ”سی آئی اے “، ”موساد “اور” را “کا گڑھ بن جائے گا ۔ انہوں نے کہاکہ افسوسناک بات یہ ہے کہ نہ حکومت کو ملک کی سلامتی و خود مختاری کا احساس ہے اور نہ آئندہ بننے والی حکومت کے امیدوار مسلم لیگ ن اس بارے میں فکر مند نظر آتی ہے‘ حکومت میں شامل جماعتوں نے بھی حالات سے سمجھوتا کر رکھاہے ۔



روزنامہ جسارت 17/9/2009