لاڑکانہ . . . پیپلز پارٹی کی شہیدچیر پرسن بے نظیر بھٹو کی وصیت جاری کر دی گئی ہے جس میں کہا گیا ہے کہ ان کے بعد ان کے شوہر صف علی زرداری اس وقت تک پارٹی کی عبوری قیادت سنبھالیں گے جب تک پارٹی کارکن یہ فیصلہ نہیں کر لیتے کہ کون ان کی قیادت کر سکتا ہے ۔بے نظیر بھٹو نے اپنی وصیت پاکستان روانہ ہونے سے دو دن قبل 16 اکتوبر کو تحریر کی تھی ۔وصیت میں انہوں نے پیپلز پارٹی کے کارکنوں کو خراج تحسین پیش کرتے ہوئے لکھا ہے کہ پیپلز پارٹی قیادت کرنا خود ان کے لیے ایک اعزاز ہے ۔انہوں نے لکھا کہ قائد عوام ذولفقار علی بھٹو کے مشن جمہوری پاکستان کی تکمیل کے لیے پارٹی کارکنوں نے پوری دیانتداری ،خلوص اور تنظیم سے کام کیا ہے ۔بے نطیر بھٹو نے لکھا ہے کہ ان کے بعد ان کے شوہر آصف علی زرداری عبوری مدت کے لیے پیپلز پارٹی کی قیادت سنبھالیں جب تک خود وہ اور پارٹی کارکن اپنا رہنما منتخب نہیں کرتے ۔انہوں نے اس بارے میں مزید لکھا ہے کہ آصف علی زرداری بہادر آدمی ہیں ،وہ ظلم کے باوجود جھکے نہیں اور انہوں نے ساڑھے گیارہ سال جیل میں گزارے ہیں ۔بے نظیر بھٹو نے لکھا ہے کہ آصف علی زرداری سیاسی ذہن رکھتے ہیں اور پیپلز پارٹی کو متحد رکھ سکتے ہیں ۔بے نظیر بھٹو نے لکھا ہے کہ وہ امید کرتی ہیں کہ پارٹی کارکن پی پی پی کے منشور کو پورا کرنے میں کامیاب ہوں گے ۔انہوں نے لکھا ہے کہ کارکن ملک سے غربت کے خاتمے اور ملکی ترقی کے لیے کام کریں جیسا کہ ماضی میں کیا ہے ۔

__________________