آصف زرداری کو سخت سیکیورٹی فراہم کیجائے،رحمن ملک کا سیکریٹر ی داخلہ کو خط
اسلام آباد (نمائندہ جنگ ) ایف آئی اے کے سابق ڈائریکٹرجنرل اور پاکستان پیپلزپارٹی کی سینٹرل ایگزیکٹوکمیٹی کے رکن رحمٰن ملک نے پاکستان پیپلزپارٹی کے شریک چیئرمین آصف علی زرداری کوبعض انتہا پسندوں کی جانب سے ملنے والی ہردھمکی پرسیکریٹری داخلہ سیدکمال شاہ کو تحریری طورپرسخت سیکیورٹی فراہم کرنے کیلئے آگاہ کردیا ہے۔سیکریٹری داخلہ کو لکھے گئے خط میں کہا گیا ہے کہ سیکریٹری داخلہ کے علم میں ہے کہ آصف علی زرداری کو دھمکی دی گئی ہے لہٰذا ان کی زندگی کوخطرات سے بچانے کیلئے انہیں فول پروف سیکیورٹی فراہم کی جائے اورانہیں جیمرز فراہم کئے جائیں۔رحمٰن ملک نے مزید کہا کہ چاروں صوبوں کے آئی جی پولیس کو ہدایت کی جائے کہ آصف علی زرداری کے ان کے صوبہ یا اسلام آباد میں دورے کے موقع پرکم ازکم چار پولیس وین اور بھاری پولیس فراہم کی جائے تاکہ ان کی گاڑی کو ہر طرف سے تحفظ فراہم کرسکیں۔ انہوں نے کہا کہ نوڈیرو میں آصف علی زرداری کے قیام کے موقع پر کم از کم پچاس پولیس اہلکار اور چار موبائل پولیس وین فوری طور پر فراہم کی جائیں۔ انہوں نے یہ بھی کہا کہ آصف علی زرداری کے سیاسی انتخابی جلسوں کے خطاب کے موقع پر ان کیلئے اسٹیج پر بلٹ پروف اسکرین لگائی جائے جبکہ ہرصوبہ سے ایک سینئر پولیس افسرکوایمرجنسی یا معمول کی سیکیورٹی ضروریات کے سلسلہ میں پیپلزپارٹی کے شریک چیئرمین آصف علی زرداری کے ساتھ تعینات کیا جائے۔ رحمٰن ملک نے اس بارے میں چاروں صوبوں کے آئی جی پولیس، ہوم سیکریٹریزاور اسلام آباد کے چیف کمشنر اورآئی جی پولیس کو بھی کاپی ارسال کردی ہیں۔

__________________