آصف زرداری کیخلاف مقدمہ چلایا جائے،پاکستان کا سوئس عدالت پر دباؤ
جنیوا(جنگ نیوز) سوئس عدالت میں حکومت پاکستان کے وکیلوں نے درخواست دی ہے کہ پاکستان میں مقدمات واپس لئے جانے کے باوجود جنیوا میں آصف زرداری کیخلاف منی لانڈرنگ کیس کی کارروائی جاری رکھی جائے۔ دس سال سے جنیوا کے حکام منی لانڈرنگ کیس کی تحقیقات کر رہے ہیں، جنیواکی تین رکنی عدالت نے 90 منٹ کی سماعت کے بعد کہا کہ جلد ہی اس بات کا فیصلہ کر لیا جائے گا کہ کیس عدالت کو بھیجنا ہے یا مزید تحقیقات کے لیے مجسٹریٹ کو واپس جانا چاہئے۔ سوئس وکیلوں کے مطابق کچھ ہفتوں تک فیصلہ متوقع ہے پاکستان کے لیے سینئر وکیل جیکس پائتھون نے بتایا کہ منی لانڈرنگ کیس کے حقائق کی دستاویزات پیش کی جا چکی ہیں جبکہ کچھ الزامات جولائی 2009 تک ختم ہو جائیں گے لہٰذا کیس پر فوری عمل کی ضرورت ہے قانونی ماہرین کے مطابق بدعنوانی کے الزامات واپس لینے کے بعد سوئس قوانین کے تحت الزمات ثابت کرنا مشکل ہو گا تاہم سزا کی صورت میں پانچ سال قید ہو سکتی ہے۔ جنیوا میں زرداری کے وکیل سویریو لیمبو نے کہا کہ پاکستانی صدر کی معافی برطانیہ اور سوئٹرزلینڈ کے تمام زیرالتواء مقدمات پر لاگو ہوتی ہے دس سال سے منی لانڈرنگ کیس کے خلاف کوئی فیصلہ نہیں ہو پایا جوثابت کرتا ہے کہ یہ سب سیاسی کھیل ہے لہٰذا مقدمہ ختم کر دیا جائے ۔ بینظیر بھٹو کیخلاف مقدمات ان کی شہادت کے ساتھ ہی ختم ہو گئے تاہم چیف پراسیکیوٹر ڈینیل زپیلی نے کہا کہ آصف زرداری کے کیس میں کوئی بھی فیصلہ لینے سے قبل سپریم کورٹ پاکستان کا موقف جاننا بہت ضروری ہے کہ مقدمہ ختم کیا جائے گا یا نہیں۔

__________________