جنیوا ۔۔۔۔۔۔۔۔حکومت پاکستان پیپلز پارٹی کے شریک چیئرمین آصف علی زرداری کیخلاف 6 کروڑ سوئس فرانک (5 کروڑ 40 لاکھ امریکی ڈالر) کی کرپشن کے کیس کی پیروی کرے گی۔ یہ بات سوئزر لینڈ میں پاکستان کے وکیل جیکوس پائتھن نے بات چیت کرتے ہوئے کہی۔ انہوں نے کہا کہ جنوری کے اواخر میں طویل مدت سے جاری منی لانڈرنگ کیس کی سماعت متوقع ہے یہ کیس 1997ء میں پاکستان کی سابق وزیراعظم بینظیر بھٹو اور ان کے شوہر آصف علی زرداری کے خلاف قائم کیا گیا تھا جس میں اس حکمران جوڑے پر غیر قانونی طریقوں سے سوئزر لینڈ میں 5 کروڑ 40 لاکھ ڈالر چھپانے کا الزام عائد کیا گیا تھا۔ حکومت پاکستان کے وکیل نے مزید کہا کہ ہم اس مقدمہ میں آصف علی زرداری کے خلاف بطور دیوانی فریق قانونی چارہ جوئی جاری رکھیں گے۔ ہماری اطلاعات کے مطابق سوئس حکومت مذکورہ 6 کروڑ سوئس فرانک منجمد کر چکی ہے۔ انہوں نے مزید کہا کہ بنک دستاویز میں بینظیر بھٹو کا نام استعمال نہیں ہوا جب کہ آصف منجمد اکاؤنٹس کی زیادہ تر دستاویزات میں آصف علی زرداری کا نام بطور بینیفشری مالک سامنے آ رہا ہے۔ اب وقت آ گیا ہے کہ ان تکنیکی باتوں پر توجہ مبذول کی جائے تاکہ لوٹی ہوئی دولت پاکستان واپس لائی جا سکے۔ دوسری جانب بینظیر بھٹو کے سابق سوئس وکیل ایلس ریمونڈ نے کہا کہ بینظیر پر سوئس الزامات ان کی موت کے ساتھ ہی ختم ہو گئے ہیں۔ بینظیر بھٹو نے ہمیشہ اس بات پر زور دیا تھا کہ بنک اکاؤنٹس ان کے نہیں ہیں اور نہ ہی انہیں مذکورہ اکاؤنٹس تک رسائی حاصل ہے۔ جنیوا میں آصف علی زرداری کے موجودہ وکیل صفائی نے کہا ہے کہ ان کے کلائنٹ آصف علی زرداری نے منی لانڈرنگ کے الزامات کی تردید کی ہے۔ ہم نے کیس کی مزید تحقیقات اور دوسری شہادتوں کو طلب کرنے کی درخواست کی تھی جبکہ میرے کلائنٹ کا موقف اس کیس میں کبھی نہیں سنا گیا۔ جب ان سے پوچھا گیا کہ کیا آصف علی زرداری اپنے متعلق وضاحت دینے کے لیے جنیوا آئیں گے تو ان کے وکیل لیمیو نے کہا کہ 8 سال جیل میں رہنے اور ہارٹ سرجری کرانے کے بعد ان کی طبیعت ناساز ہے۔ صدر مشرف کی جانب سے ایمنسٹی بل پر دستخط کے بعد میرے موکل کے خلاف کرپشن کے الزامات ختم ہو چکے ہیں جبکہ پاکستان میں ان کے خلاف کوئی جرم ثابت نہیں ہوا لہٰذا سوئزر لینڈ میں اس مقدمے کو جاری رکھنا خاصل مشکل کام ہے۔