کراچی (اسٹاف رپورٹر) ناظم کراچی سید مصطفی کمال نے شہریوں سے کہا ہے کہ عیدالاضحی کے دوران قربانی کے جانوروں کی آلائشوں کی شکایات۔1339 پر درج کرائیں، وہ اس نظام کے تحت پورے شہر کی خود نگرانی کریں گے جبکہ ڈی سی او، ایم ڈی واٹربورڈ، ای ڈی او میونسپل سروسز اور ٹاوٴن ناظمین اپنے اپنے ٹاوٴن کی شکایات کا فوری نوٹس لیتے ہوئے کارروائی کریں گے، ان خیالات کا اظہار اُنہوں نے منگل کو اپنے دفتر میں ٹاوٴن ناظمین، ٹی ایم اوز، ای ڈی اوز اور واٹر بورڈ و دیگر شہری اداروں کے ایک مشترکہ اجلاس سے خطاب کرتے ہوئے کیا، اجلاس میں عیدالاضحی کے موقع پر قربانی کے جانوروں کی آلائشوں کو ٹھکانے لگانے اور صفائی ستھرائی کی صورت حال کو بہتر بنانے کے لیے کیے جانے والے انتظامات کا جائزہ لیا گیا، ، ناظم کراچی سید مصطفی کمال نے جائزہ اجلاس سے خطاب کرتے ہوئے ٹاوٴن ناظمین سے کہا کہ تمام یونین ناظمین 18/ ٹاوٴن ناظمین اور سٹی حکومت ایک ٹیم ورک کے تحت کام کریں، اُنہوں نے کہا کہ سٹی حکومت نے (1339)سٹیزن کمپلین اینڈ انفارمیشن سسٹم شہریوں کے لیے قائم کیا ہے، شہری آلائشوں کے حوالے سے اپنی شکایات اس پر درج کرائیں جو فوری طور پر اعلیٰ حکام تک پہنچ جائیں گی جس پر فوری کارروائی کی جائے گی، اُنہوں نے ٹاوٴن ناظمین سے کہا کہ 1339/ کے نظام پر درج شکایات پر فوری ٹیم روانہ کریں اور شکایات کے ازالے کے لیے فوری اقدامات کریں۔