آٹے کا مصنوعی بحران پیدا کرنے والوں کیخلاف کارروائی ہوگی، وزیر اعلیٰ



کراچی( اسٹاف رپورٹر) نگراں وزیر اعلیٰ سندھ جسٹس ( ر) عبدالقادر ہالیپوتہ نے کراچی میں 26 فلور ملز بند ہونے سمیت اندرون سندھ میں آٹے کے بحران کا سخت نوٹس لیتے ہوئے کہا ہے کہ آٹے کا مصنوعی بحران پیدا کرنے کی کوشش کی جارہی ہے ، ہم عوام کی مشکلات سے بخوبی واقف ہیں، ان کیحل کیلئے تمام اقدامات کئے جائیں گے، جبکہ ذخیرہ اندوزی کے ذریعے آٹے کی قلت پیدا کرنے والے عناصر کے خلاف سخت کارروائی کی جائے گی تاکہ عوام کو مناسب قیمت پر آٹے کی فراہمی کو جاری رکھا جاسکے۔ اس سلسلے میں انہوں نے آج پیر کو وزیراعلیٰ ہاؤس میں ایک اعلیٰ سطحی اجلاس طلب کیا ہے جس میں آٹے کے مصنوعی بحران کا جائزہ لیا جائے گا جبکہ اس میں ملوث عناصر کے خلاف سخت کارروائی کیلئے جامع حکمت عملی بھی وضع کی جائے گی ۔ دریں اثناء نگراں وزیراعلیٰ سندھ نے وزیراعظم پاکستان محمد میاں سومرو کو فون کے ذریعے سندھ کے گنے کے کاشتکاروں اور شوگر مل مالکان کے مابین پیدا ہونے والے تنازع اور آٹے کے مصنوعی بحران کے متعلق آگاہ کیا۔ نگراں وزیراعظم نے انہیں یقین دلایا کہ وہ جلد ہی اس سلسلے میں اہم اجلاس طلب کرکے کاشتکاروں اور مل مالکان کے درمیان اختلافات ختم کرائیں گے۔ ٹھٹھہ سے نمائندہ جنگ کے مطابق نگراں وزیر اعلیٰ سندھ نے سرکٹ ہاؤس مکلی میں ضلع ناظم ٹھٹھہ شفقت شاہ شیروزئی اور معززین سے بات چیت کرتے ہوئے کہا کہ نگراں حکومت کی ذمہ داری پرامن اور شفاف اور غیر جانبدارانہ انتخابات کیلئے ہر ممکن اقدامات کرنا ہے ، انہوں نے متعلقہ محکموں کو ہدایت کی کہ مختصر عرصے میں ایسا کام کیا جائے جو آنے والی حکومت پایہ تکمیل تک پہنچائے۔