آگ سے متاثرہ ہسپتال میں مریضوں اور عملے کو داخلے کی اجازت



لندن (جنگ نیوز)آگ سے متاثر ہونے والے رائل مارسڈن ہسپتال میں مریضوں اور عملے کو داخل ہونے کی اجازت مل گئی۔ تفصیلات کے مطابق بدھ کو لگنے والی آگ نے اوپر کی منزلوں اور چھت کو اپنی لپیٹ میں لے لیا تھا جس سے تقریباً آدھی چھت تباہ ہوگئی۔ ہسپتال کے ترجمان کا کہنا ہے کہ خوش قسمتی سے نقصانات اندازے سے کہیں کم رہے۔ وزیراعظم گورڈن براوٴن نے کہا کہ ہسپتال کو جلد از جلد پہلے والی پوزیشن پر لانے کے لیے حکومت ہر اقدام کرے گی۔ جائے حادثہ پر اب بھی آٹھ فائر انجن اور پچاس اہلکار موجود ہیں لیکن مریضوں کی رہنمائی کے لیے ہسپتال ہی میں انتظامی سینٹر کا قیام عمل میں لایا گیا ہے۔ لندن فائر بریگیڈ کے ترجمان نے کہا کہ آگ لگنے کی وجوہ کے بارے میں فی الوقت کچھ کہنا قبل از وقت ہوگا تاہم جلد ہی اس بارے میں پتا چلایا جائے گا۔ مارسڈن ہسپتال کو یورپ کے سب سے بڑے کینسر سینٹر ہونے کا اعزاز حاصل ہے۔