اب ملک شخصی ڈکٹیشن پر نہیں چلے گا،جسٹس افتخار




حیدرآباد (بیورو رپورٹ) سپریم کورٹ آف پاکستان کے معزول چیف جسٹس ‘ جسٹس افتخار محمد چوہدری نے کہا ہے کہ اب مزید مصلحتوں اور سمجھوتوں کے متحمل نہیں ہو سکتے، کسی ایک شخص کے قانون کے تحت اب ملک نہیں چلے گا، شخصی قانون یا ڈکٹیشن تسلیم نہیں کی جائیگی، اب ملک صرف آئین کے تحت چلے گا،تحریک کا مقصد آئندہ نسلوں کیلئے مشکلات کا خاتمہ ہے، سندھ سے شروع ہونے والی تحریک اپنے اہداف تک ضرور پہنچے گی،‘ وہ جمعہ کو حیدرآباد ڈسٹرکٹ بار اور ہائی کورٹ بار ایسوسی ایشن کے عہدیداران‘ اراکین وکلا سے ٹیلیفونک خطاب کررہے تھے۔ اس موقع پر جسٹس غلام ربانی اور کراچی بار ایسوسی ایشن کے صدر محمود الحسن بھی موجود تھے۔ جسٹس افتخار محمد چوہدری نے حیدرآباد سے اپنے خصوصی تعلق کا اظہار کرتے ہوئے کہا کہ حیدرآباد میرا اپنا شہر ہے یہاں میں نے تعلیم و تربیت حاصل کی ہے اور آج بھی میرے اساتذہ علم کے دیئے جلا رہے ہیں۔ انہوں نے کہا کہ کوئی وکیل یہ نہ سمجھے کہ میں ان سے دور ہوں‘ میں آپ کے درمیان موجود ہوں۔ انہوں نے کہا کہ 14 ماہ سے جاری تحریک آئین اور قانون کی حکمرانی کے لئے ہے۔ انہوں نے کہا کہ اس 14 ماہ کی تحریک کے دوران وکلا اور سول سوسائٹی کے افراد نے جیلیں کاٹیں‘ خون بہا‘ وکلا کے ساتھ ساتھ سول سوسائٹی کا خون بھی اس تحریک میں شامل ہے۔ 14ماہ سے جاری اس تحریک نے وکلا میں ایک اعتماد اور اتحاد پیدا کیا ہے۔ انہوں نے حیدرآباد کے وکلا کو سلام پیش کرتے ہوئے کہا کہ 10 مارچ سے حیدرآباد کے وکلا نے ازخود اپنی تحریک کا آغاز کیا اس لئے حیدرآباد کے وکلا اس تحریک کا ہراول دستہ ہیں جنہوں نے انتہائی جرات کے ساتھ اپنی تحریک کو جاری رکھا ہوا ہے اور انشاء اللہ ہم اپنے اس اتحاد سے اپنے مقاصد حاصل کرلیں گے۔ انہوں نے کہا کہ اس تحریک کا مقصد صرف یہ ہے کہ یہ اس ملک میں آئین و قانون کی حکمرانی ہو اور اس ملک کو صرف آئین کے تحت چلایا جائے‘ کسی ایک شخص کے قانون کے تحت اب ملک نہیں چلے گا۔

__________________