کراچی (اسٹاف رپورٹر،ایجنسیاں) کراچی میں بدامنی کیس کی سماعت کے دوران چیف جسٹس مسٹر جسٹس افتخار محمد چوہدری نے ایڈووکیٹ جنرل سندھ کو حکم دیا ہے کہ دو دن میں انسداد دہشت گردی اوربینکنگ کورٹ میں ججز کی تقرری کے احکامات جاری کئے جائیں،چیف جسٹس نے ریمارکس دیتے ہوئے کہاکہ کراچی خون میں نہاگیا لیکن کسی نے کچھ نہیں کیا،ہماراتشکیل کردہ بنچ بھی بہت سے لوگوں کوپسندنہیں،بھتہ خوری کے خاتمے کے لئے قانون سازی کی ضرورت ہے، لارجر بنچ چیف جسٹس پاکستان افتخار محمد چوہدری، مسٹر جسٹس انور ظہیرجمالی، مسٹرجسٹس سرمدجلال عثمانی، مسٹر جسٹس امیر ہانی مسلم اور مسٹر جسٹس غلام ربانی پر مشتمل ہے۔ منگل کوسپریم کورٹ کراچی رجسٹری میں ازخودنوٹس کیس کی سماعت کے دوران چیف جسٹس نے کہا کہ سندھ ہائیکورٹ کے چیف جسٹس مشیرعالم نے تقرری کیلئے سیشن ججوں کے نام بھیجے ہیں لیکن حکومت ان کی بجائے اپنے لوگوں کا تقرر کرنا چاہتی ہے جبکہ سیشن جج کے علاوہ کسی کا تقرر نہیں کیا جاسکتا۔ سپریم کورٹ کے چیف جسٹس افتخارمحمد چوہدری نے ایڈووکیٹ جنرل سندھ عبدالفتح ملک اور آئی جی سندھ واجد درانی سے استفسار کیا کہ آپ نے اجمل پہاڑی سے متعلق انٹروگیشن ٹیم کی رپورٹ پڑھی ہے اور یہ رپورٹ آنکھیں کھولنے کیلئے کافی ہے اور ملکی سالمیت سے متعلق سوال پیدا ہوجاتے ہیں۔ چیف جسٹس نے کہا کہ حکومت بچانی ہے یا ملک بچانا ہے؟ چیف جسٹس نے آئی جی سندھ سے استفسار کیا کہ آپ نے اس رپورٹ کے بعد کیا اقدامات کئے، اجمل پہاڑی کی مشترکہ تحقیقاتی رپورٹ میں اس تنظیم سے متعلق معلومات بھی ہیں کیا اقدامات کئے گئے ہیں۔ چیف جسٹس نے کہا کہ کراچی ملک کا معاشی حب ہے جب ریڑھی والے سے لے کر تاجر کو تحفظ حاصل نہیں ہے تو ملک ترقی کیسے کرے گا۔ جسٹس غلام ربانی نے کہا کہ جے آئی ٹی رپورٹ کی روشنی میں کوئی کارروائی نہیں کی جاتی تو جے آئی ٹی کیوں بنائی جاتی ہے؟ چیف جسٹس نے آئی جی سندھ سے استفسار کیا کہ کامران عرف مادھوری چکرا گوٹھ پولیس پر فائرنگ کے الزام میں گرفتار ہے یا چھوڑدیا جس پر آئی جی سندھ نے کہا کہ کامران مادھوری گرفتار ہے اورزخمی حالت میں ہے جس پر جسٹس امیر ہانی مسلم نے کہا کہ اسے میڈیکل سرٹیفکٹ کے ساتھ عدالت میں پیش کریں،چیف جسٹس نے کراچی باراورسندھ بارکوہدایت کی کہ وہ مافیاز کے خاتمے کے لئے تجاویزدیں،سپریم کورٹ بار ایسوسی ایشن کی صدر عاصمہ جہانگیر نے عدالت کی معاونت کرتے ہوئے کہا کہ بھتہ خوری کے کلچر میں ایم کیو ایم ملوث ہے۔ کراچی ایم کیو ایم کا آج بھی دہشت گردی کا بڑا نیٹ ورک ہے 10 سال سے ایم کیو ایم بھتہ خوری میں ملوث ہے، کراچی میں ایم کیو ایم ابتدا کرتی ہے بعدمیں دیگر جماعتیں بھی اس میں شامل ہوجاتی ہیں، عاصمہ جہانگیر نے کہا کہ کراچی میں مختلف سیاسی مذہبی اور کالعدم جماعتیں بھتہ جمع کررہی ہیں، انٹیلی جنس اداروں کے پاس سرکردہ افراد کی فہرست اور پتے تک موجود ہیں، چف جسٹس نے کہا کہ صدر ایک ٹھیلے والے سے پوچھیں اسے کنٹونمنٹ شہری حکومت وغیرہ کو 400 روپے روز بھتہ دینا پڑتا ہے۔ چیف جسٹس نے ایڈووکیٹ جنرل سے کہا کہ جو چیزیں طلب کی تھیں وہ پیش کریں، ایڈووکیٹ جنرل نے کہا کہ ٹارچر سیل و دیگر فوٹیج عدالت میں نہیں دکھاسکتے کیونکہ اس میں بہت سا مواد ایسا ہے جسے دکھایا نہیں جاسکتا، فوٹیج چیمبر میں دکھائے جاسکتے ہیں۔ چیف جسٹس نے کہا کہ وہ کچھ چیزیں چھپارہے ہیں،چف جسٹس نے کہا کہ آپ سمجھداری سے کام لیں ہم آپ سے بہت کچھ سننا اور سمجھنا چاہتے ہیں۔ چیف جسٹس نے کہا کہ آئینی ادارے کام کررہے ہیں تو پھر یہ بے بسی کا عالم کیوں ہے۔ گزشتہ ماہ 306 افراد کو ہلاک کرنے والے افراد گرفتار کیوں نہیں ہوتے۔

اجمل پہاڑی سے متعلق تحقیقاتی رپورٹ آنکھیں کھولنے کیلئے کافی ہے، حکومت بچانی ہے یا ملک؟ چیف جسٹس

__________________
فیس بک پہ پاک نیٹ کا حلقہ احباب

https://www.facebook.com/groups/pak.net

دوستوں سے گزارش ہے کہ اپنے شائع کردہ موضوع کو یہاں بھی شئیر کردیا کریں تاکہ زیادہ سے زیادہ لوگوں کو پاک نیٹ کی فیملی کا حصہ بنایا جاسکے۔