اجمیری مینشن سے متصل16 گھروں کے فرش بھی بیٹھ گئے
کراچی (اسٹاف رپورٹر) اجمیری مینشن سے متصل رستم کمپاؤنڈ میں سنگل اسٹوری16 گھروں کے فرش بیٹھ گئے ہیں اور چھتوں اور دیواروں میں دراڑیں پڑنے سے لوگوں نے خوف کے مارے گھر خالی کردیئے ہیں جب کہ اجمیری مینشن کے فلیٹس میں رہائش پذیر افراد کاکہنا ہے کہ عمارت صحیح ہے، گٹر اوور فلو ہونے سے بلڈنگ کے نیچے پانی بھر گیا تھا جسے نکال دیا گیا ہے اور ہم لوگ آرام سے رہ رہے ہیں۔ انہوں نے الزام عائد کیاکہ میڈیا اور کے بی سی اے کے لوگ خوامخواہ ہراساں کر رہے ہیں۔ رستم کمپاؤنڈ کے احاطے میں مختلف گھروں میں رہائش پذیر محمد نعمان، آصف، عمران، مینا بھائی، ننھے بھائی، صالحین اور لطیف نے نمائندہ جنگ کو اپنے گھروں کا معائنہ کرایا جس میں ان تمام تقریباً گھروں کی اجمیری مینشن کے ساتھ کی دیواریں اور فرش بیٹھ گئے ہیں، کافی بڑی دراڑیں پڑنے کے بعد لوگ اپنے گھر چھوڑ چکے ہیں۔ انہوں نے بتایا کہ زیادہ خوفناک صورتحال ایک ہفتہ قبل ہوئی۔ انہوں نے بتایا کہ اجمیری مینشن کے نیچے گودام ہے جس میں ڈیڑھ سے دو فٹ پانی بھر گیا تھا اور یہ صورتحال تقریباً دو سال قبل بھی پیدا ہوئی تھی بلڈنگ کا مالک تمام فلیٹ فروخت کر کے جا چکا ہے۔ انہوں نے بتایا کہ ٹاؤن ناظم صدر دورہ کر کے جا چکے ہیں۔ دوسری جانب اجمیری مینشن کے رہائشیوں کا موقف ہے کہ بلڈنگ بالکل صحیح حالت میں ہے اور ہم آرام سے کھا پی اور رہ رہے ہیں۔ فرسٹ فلور پر فلیٹوں کے مالکان فضل اور یوسف نے موقف اختیار کیا کہ گٹر ابل پڑے تھے جن کو صحیح کر دیا گیا ہے اور ایسی شکایات عام سڑکوں پر دیکھنے میں آتی ہیں، معمولی سا معاملہ تھا، ہم لوگ بے خوف ہو کر سو رہے ہیں۔ انہوں نے کہاکہ ایک کالم معمولی سا متاثر ہوا ہے۔ انہوں نے مزید کہاکہ اجمیری مینشن کی ایسوسی ایشن رستم کمپاؤنڈ کے جن پلاٹوں کو نقصان پہنچا ہے ان کے مالکان کو معاوضے کی ادائیگی کی کوشش کرے گی تاکہ وہ اسے مرمت کرا سکیں۔

__________________