کراچی (پ ر) جماعت اسلامی ہمیشہ انتخابات میں حصہ لیتی رہی ہے اور اس بار بھی حصہ لینے کیلئے کاغذات نامزدگی جمع کرائے تھے مگر حکومت نے ہماری تجاویز ماننے سے انکار کردیا اس لئے الیکشن کا بائیکاٹ کیا۔ ان خیالات کا اظہار نائب امیر جماعت اسلامی پاکستان پروفیسر غفور احمد نے امن و امان کی صورتحال اور الیکشن کے بائیکاٹ کے حوالے سے فرانسیسی قونصلر جنرل سے ادارہ نورحق میں جماعت اسلامی کے رہنماؤں سے ملاقات کے موقع پر صحافیوں سے گفتگو کرتے ہوئے کیا۔ انہوں نے کہا کہ احتجاجاً الیکشن لڑنے والی جماعتیں پارلیمنٹ کا بائیکاٹ کرسکتی ہیں۔ فرانسیسی قونصل جنرل پیری سیلان نے جماعت اسلامی پاکستان کے نائب امیر پروفیسر غفور احمد‘ جماعت اسلامی کراچی کے امیر محمدحسین محنتی‘ سیکریٹری جنرل انجینئر حافظ نعیم الرحمن اور سابق رکن قومی اسمبلی و خارجہ امور کے نگراں مظفراحمد ہاشمی سے ادارہ نورحق میں ملاقات کی اور ملکی حالات اور الیکشن پر تبادلہ خیال کیا۔ پیری سیلان نے کہا کہ مغرب میں اسلام اور جماعت اسلامی کے متعلق جو منفی پروپیگنڈا کیا جاتا ہے وہ غلط ہے‘ مجھے پاکستان میں 3 سال سے زائد عرصہ گزرچکاہے مگر میں نے دیکھا کہ اسلام ایک امن پسند دین ہے اور جماعت اسلامی باشعور اور تعلیم یافتہ لوگوں کی تنظیم ہے۔

__________________