ارباب عوام کے زخموں پر نمک پاشی کررہے ہیں ، نثار کھوڑو



کراچی (اسٹاف رپورٹر) پاکستان پیپلز پارٹی کے رہنما نثار احمد کھوڑو نے سیاسی لیڈروں خاص طور پر سابق وزیر اعلیٰ سندھ ارباب غلام رحیم کی طرف سے پاکستان پیپلز پارٹی کی قیادت پر زہر افشانی کرنے سے گریز کرنے کی تنبیہ کرتے ہوئے کہا ہے کہ جیسے جیسے ارباب رحیم کو جیل میں ڈالنے کے دن قریب آرہے ہیں اس پر پاگل پن کے دورے بھی بڑھتے جارہے ہیں۔ انہوں نے کہا کہ پاکستان کے کروڑوں عوام اپنی محبوب قائد محترمہ بے نظیر بھٹو کی شہادت پر غم زدہ اور ماتم زدہ ہیں ایسے ماحول میں ارباب غلام رحیم جیسے ملک دشمن کردار عوام کے دکھوں اور زخموں پر نمک پاشی کررہے ہیں۔ انہوں نے کہا کہ ارباب غلام رحیم تھرپارکر میں نجی ملیشیا بنارہے ہیں اور وہاں کے ڈی پی اور ساجد علی شاہ ، ٹی پی اوز شرف الدین پلی ، صادق علی شاہ اور افضل انہیں نجی ملیشیا بنانے میں اسلحہ اور ٹریننگ دے رہے ہیں جنہوں نے تھرپارکر کی مختلف سڑکوں پر پرائیویٹ چوکیاں بنارکھی ہیں اور وہاں سے گزرنے والے عوام سے زبردستی لوٹ مار کی جارہی ہے اور ان پر تشدد کیا جارہا ہے جبکہ دوسری طرف ارباب رحیم نے اپنے ماموں زاد بھائی رام سنگھ سوڈی کے بیٹے گمان سنگھ سوڈی کو سندھ کے خزانے سے دو ارب روپے کے ساتھ پڑوسی ملک فرار کرادیا ہے اور اس طرح ارباب غلام رحیم گوربا چوف کے ساتھیوں کا کردار ادا کررہے ہیں۔ نثار احمد کھوڑو نے کہا کہ پاکستان پیپلز پارٹی ارباب غلام رحیم کے میر جعفر اور میر صادق کا کردار ادا کرنے پر قانونی و آئینی احتساب کرے گی۔ انہوں نے کہا کہ ارباب غلام رحیم گیدڑ کی طرح بلوں سے بولنے کی بجائے عوام کے سامنے آنے سے کیوں کتراتے ہیں اور اسی طرح عوام کو اس کا اصل کردار معلوم ہوچکا ہے۔