ریاض (جنگ نیوز) سعودی اخبار کی رپورٹ میں دعویٰ کیا گیا ہے کہ القاعدہ رہنما اسامہ بن لادن کی ہلاکت ایمن الظواہری کی جانب سے انہیں دھوکا دینے کا نتیجہ ہے۔ سعودی اخبار الوطن کی رپورٹ کے مطابق دونوں رہنماؤں کے درمیان اقتدار کی جنگ چل رہی تھی، 2004ء میں اسامہ بن لادن کی علالت کے بعد مصر سے تعلق رکھنے والے ایمن الظواہری ہی القاعدہ کی قیادت کر رہے تھے لیکن وہ تنظیم پر مکمل کنٹرول چاہتے تھے۔ رپورٹ میں بتایا گیا ہے کہ جس شخص نے اسامہ کے گھر کوریئر پہنچایا وہ دراصل ایمن الظواہری کیلئے کام کرتا تھا اور اسی کے ذریعے ہی امریکی حکام کو اسامہ تک پہنچنے میں کامیاب ہوئے۔ کوریئر پہنچانے والا شخص کویتی نہیں بلکہ پاکستانی تھا اور اسے معلوم تھا کہ اس کی نگرانی کی جا رہی ہے لیکن وہ انجان بنا رہا۔ اخبار میں یہ بھی دعویٰ کیا گیا ہے کہ یہ ایمن الظواہری کے ساتھی ہی تھے جنہوں نے اسامہ بن لادن کو قبائلی علاقوں سے نکل کر ایبٹ آباد کے قریب پناہ لینے کا مشورہ دیا تھا جہاں بالآخر یو ایس سیلز نے انہیں ہلاک کیا۔ بن لادن کو ٹھکانے لگانے کا منصوبہ مصر سے تعلق رکھنے والے القاعدہ کمانڈر سیف العادل کا تھا جو گزشتہ موسم خزاں میں ایران سے پاکستان پہنچے۔ واضح رہے کہ سیف العادل 9/11 کے واقعے کے بعد اسامہ کے ایک بیٹے اور اہل خانہ کے ہمراہ ایران فرار ہوگئے تھے۔ العادل القاعدہ کی مجلس شوریٰ اور تنظیم کی عسکری ونگ کے ممبر بھی ہیں۔ انہوں نے ہی افغانستان، پاکستان اور سوڈان میں القاعدہ کے کارکنوں کو عسکری اور انٹیلی جنس ٹریننگ فراہم کی تھی۔
جنگ

__________________
لا فتی الا علیّ لا سیف الاّ ذوالفقار